УФ-м шIэныгъэмрэ апшъэрэ гъэсэны­гъэмрэкIэ иминистрэу Валерий Фальковым Урысыем иректорхэм ясоюз изэхэсыгъоу рекIокIыгъэм къызэрэщиIуагъэмкIэ, апшъэрэ гъэсэныгъэ зыщызэрагъэгъотырэ учреждениеу къэралыгъом итхэм ащеджэхэрэм кIымэфэ сессиер Iудзыгъэ шIыкIэм тетэу атыщт.

— Университетхэмрэ студентхэмрэ Iудзыгъэ шIыкIэм тетэу сессиер рагъэкIокIыным тытегущыIэ, ау апшъэрэ гъэсэныгъэ зыщызэрагъэгъотыхэрэр зэфэшIыгъэхэп, ахэм япчъэхэр зэIухыгъэх ыкIи студентхэр ащеджэх, — къыIуагъ министрэм.

Валерий Фальковым зэрилъытэрэмкIэ, университетхэм Iудзыгъэ шIыкIэм тетэу Iоф амышIэ зыхъукIэ, коронавирусым нахь зиушъомбгъуным ищынагъо къэуцу. Студентхэр зэхэхьэх, ахэм узыр зэпахыжьын алъэкIыщт.

Мыекъопэ къэралыгъо технологическэ университетым ипресс-къулыкъу къызэрэщытаIуагъэмкIэ, непэрэ мафэм ехъу­лIэу студентхэм Iудзыгъэ шIыкIэм тетэу лекциехэр арагъэхьых, практическэ шIэныгъэхэр аудиториехэм ащаратых. Iудзыгъэ шIыкIэм тетэу сессиер студентхэм атыным иIофыгъо шъо­лъыр министерствэм щызэхафыщт.

Абрэдж Сэтэнай.