ИкIэлэцIыкIугъом къыщегъэжьагъэу сэнэхьатэу зэрылэжьэнэу зыкIэхъопсырэр къыхэзыхырэ цIыфым гухэлъэу ышIыгъэр щыIэныгъэм зэрэщыпхырищыщтым щэч хэлъэп. Ащ игупшысэхэр илъэс зэкIэлъыкIохэм ыгъашIоу зыдиIыгъыщт, нэужым ищыIэныгъэ гъогу рипхыным фэхьазырэу апшъэрэ гъэсэныгъэ зыщызэригъэгъотыщтым зигъэзэщт.

— Гурыт еджапIэр къэсыухы зэхъум сызщыпсэурэ къуаджэм нахь пэIудзыгъэ къалэ сыкIон гухэлъ сшIыгъэ, — къытфеIуатэ ЛIэхъусэжъ Хъусен. — Ащ къыхэкIэу Ростов-на-Дону зызгъэзагъ. Iахьыл-гупсэ зыдэмы­сэу, ны-тыхэм чыжьэу уакIэ­рычыгъэу, уизакъоу упсэун фаеу зэрэщытым гупшысэу сигъэшIыщтыгъэр макIэп, ау сиIуагъэ зэкIэсхьажьыгъэп ыкIи къэлакIэм «ипчъэхэр» къызэIусхыгъэх.

ЛIэхъусэжъ Хъусен Шэуджэн районым ит къуаджэу Мамхыгъэ 1995-рэ илъэсым къыщы­хъугъ. Гурыт еджапIэм чанэу зыкъыщигъэлъагъозэ щеджагъ. 2013-рэ илъэсым Ростов къэралыгъо псэолъэшI университетым чIэхьагъ. Тыкъэзыуцухьэрэ дунаир инженернэ лъэныкъомкIэ къэухъумэгъэным фэгъэзэгъэ сэнэхьат къыхи­хыгъ.

КъызхэкIыгъэ лъэпкъым гуфэбэныгъэ ин зэрэфыриIэм ишыхьатэу Хъусен адыгэхэм язэхахьэхэм ахэлажьэу ыуб­лагъ. Сыд фэдэ Iофтхьабзэ рагъэкIокIыми апэрэ сатырым хэтхэм ар ащыщыгъ.

— Илъэс заулэкIэ сэщ на­хьыжъ ныбджэгъухэр сиIагъэх. Ахэм сырягъусэу Ростов дэс адыгэхэм язэхахьэхэм защызгъэгъозагъ, — къытфеIуатэ тигущыIэгъу. — Ащ къыщегъэ­жьагъэу силъэпкъэгъухэр зыхэт купым хэхъоныгъэхэр ышIынхэм, тизэхахьэхэр нахьыбэ хъунхэм сыфэлажьэ.

Адыгэ, Къэбэртэе-Бэлъкъар, Къэрэщэе-Щэрджэс респуб­ликэхэм къарыкIыгъэ ныбжьыкIэхэм зыкIыныгъэ азыфагу илъэу Ростов щыпсэунхэм пылъых. Ахэр зэфэтхэжьых, зэгъусэхэу къакIухьэ, джэгукIэ зэфэшъхьафхэр, зэхэхьэ гъэшIэгъонхэр зэхащэх.

— Апэрэ Iофтхьабзэу сызы­хэ­лэжьэгъагъэр сыгу къинэ­жьыгъ, — игукъэкIыжьхэмкIэ къыддэгуащэ Хъусен. — Мыщ дэс адыгэхэр зэкIэ зэзыпхырэ зэхахьэр Iоныгъо мазэм ыкIэм рагъэкIокIыгъагъ. Адыгэ респуб­ликищымэ къарыкIыгъэхэу Ростов щыпсэухэрэр нэIуасэ зэфэхъунхэм, зэрэшIэнхэм ар фэIорышIагъ. Зэнэкъокъухэр, джэгукIэ зэфэшъхьафхэр, къэшъо жъынчхэр, пстэури зэкIу­жьэу Iофтхьабзэм къешIэкIы­гъагъэх.

Еджэным ишъыпкъэу зэрэпылъым дакIоу лъэпкъ Iофыгъо­хэри Хъусен зыщигъэгъупшэщтыгъэхэп. Адыгэ джэгухэм, зэхахьэхэм, зэIукIэгъухэм язэ­хэщакIохэм сыдигъуи ахэтыгъ.

Я 4-рэ курсыр къызщиухырэ уахътэм къэлэгъэпсынымкIэ ГъэIорышIапIэу Рос­тов дэтхэм ащыщ Iоф щишIэнэу Хъусен макIо, еджэным ар дихьызэ университетыр къыу­хыгъ, магистратурэри зэри­нэкIыгъ.

— СиIофшIэн сшIогъэшIэгъон, сыгу етыгъэу сэгъэцакIэ, — къытфеIуатэ тигущыIэгъу. —ПсэупIэ-коммунальнэ хъызмэтым епхыгъэ Iофыгъохэр зэшIотэхых. Ворошиловскэ районым имуниципальнэ учреждение къэ­лэгъэ­псынымкIэ и ГъэIорышIапIэ Iоф щысшIэнэу езгъэжьагъ. Ащ илъэс заулэрэ сыIутыгъэу нэмыкI район зызгъэзэнэу къысэджагъэх. 2019-рэ илъэсым къыщегъэжьагъэу Пролетарскэ районым тигущыIэгъу Iоф щешIэ. Ащ тызэрэщигъэгъозагъэмкIэ, инженер шъхьаIэм игуадзэу джырэ уахътэ мэлажьэ.

Хъусен зыфагъэзэрэ Iофыр зэрифэшъуашэу зэригъэцакIэ­рэм фэшI иIоф­шIэгъухэм лъытэ­ны­гъэ къыфашIы. Ащ дакIоу цIыфы­ныгъэ­шхо, шъхьэ­кIэфэ­ныгъэ ин хэлъэу мэзекIо. Адыгэ унагъо зэ­рэща­гъэса­гъэр, шэн-хэбзэ да­хэу ны-тыхэм къыхалъхьагъэхэм атетэу мэпсэу.

Чыжьэу щыIэу мэпсэуми, цIыфым илъэпкъ зыфекъудыи. Ащ фэдэу Хъу­сени Адыгеим ыгъэ­зэжьын гухэлъыр зыдиIыгъ.

— ШIэныгъэу, опытэу сIэкIэ­лъым хэзгъахъомэ, сыкъызщыхъугъэ республикэм сыкIо­жьынэу сыфай, — игупшысэхэмкIэ къыддэгуащэ ЛIэхъусэжъ Хъусен. — Адыгеим сыфэлэжьэн, ащ амалэу сиIэмкIэ хэхъоныгъэхэр езгъэшIынхэр уасэ зимыIэ насыпэу сэлъытэ.

Гухэлъ анахь лъапIэу тигущыIэгъу иIэр гъэцэкIагъэ зыхъу­щтыр гъэнэфыгъуай. Илъэс, илъэситIу е тфы тешIэщтыр, ау ар нахь псынкIэу къэблэгъэным мафэ къэс фэкIощт.

Абрэдж Сэтэнай.