Адыгэ Республикэм социальнэ-экономикэ хэхъоныгъэ зэришIыщт унэе программэм игъэцэкIэн къихьащт илъэсым Адыгеим щылъагъэкIотэщт. Программэм къыдыхэлъытагъэхэм ащыщ псыхъоу Шъхьагуащэ иджабгъу, исэмэгу нэпкъхэм ягъэпытэн тегъэпсыхьэгъэ Iофтхьабзэхэр зехьэгъэнхэр.

Адыгеим и ЛIышъхьэ пшъэрылъ зэрафишIыгъэм тетэу проектыкIэхэм зафагъэхьазырэу рагъэжьагъ. КъумпIыл Мурат Адыгэ Республикэм иминистрэхэм я Кабинет, Мыекъуапэ иадминистрацие, Адыгэ Республикэм икъэралыгъо бюджет учреждениеу «Стройзаказчикым» ялIыкIохэм тыгъуасэ адыриIэгъэ зэхэсыгъом псыхъоу Шъхьагуащэ инэпкъхэм ягъэпытэнкIэ ашIэщтхэм игъэкIотыгъэу щатегущыIагъэх.

«Унэе программэм диштэу, федеральнэ гупчэр IэпыIэгъу къытфэхъузэ, республикэмкIэ мэхьанэшхо зиIэ пшъэрылъхэм язэшIохын мыгъэ тыфе­жьагъ. Ахэм зэу ащыщ къэлэ паркым дэжь псыхъоу Шъхьагуащэ инэпкъ щыгъэпытэгъэнымкIэ Iофтхьэбзэ гъэ­нэфагъэхэр зехьэгъэнхэр. Мэхьанэ­шхо зиIэ мы проектым ипхырыщынкIэ программэм къытитырэ амалхэр икъоу дгъэфедэнхэ фае», — къыхигъэ­щыгъ КъумпIыл Мурат.

Къэлэ паркым иIэгъо-блэгъу дэжь Шъхьагуащэ инэпкъхэр зэрэщагъэпытэщтхэм къыхэкIэу Адыгеим и ЛIышъхьэ пшъэрылъ афишIыгъ анахьэу къекIущт проектыр къыхахынэу, паркым илъэс гъогухэу цIыфхэр зыщытезекIухьэхэрэр нахь зэтырагъэпсыхьанхэу.

Адыгэ Республикэм икъэралыгъо бюджет учреждениеу «Стройзаказчикым» ипащэу Абрэдж Аслъан къызэриIуагъэмкIэ, проект-сметэ документациер агъэхьазырыгъах. Псыхъо нэпкъэу агъэпытэщтыр километри 2,56-рэ мэхъу. Мыекъопэ ГЭС-м иплотинэ къыщежьэу кIэшIэгъэ лъэмыджым нэсэу сэмэгу нэпкъыр, лъэсрыкIохэм атегъэпсыхьэгъэ лъэмыджым къыщежьэу кIэшIэгъэ лъэмыджым нэсэу джабгъу нэпкъыр агъэпытэнэу рахъухьэ. Джащ фэдэу псы­хъоу Шъхьагуащэ инэпкъ IушIохэр нахь зэты­рагъэпсыхьанэу гухэлъ яI. Ащ пае сомэ миллион 405-м ехъу къыхагъэкIыщт.

Проектым диштэу къэлэ паркым итеплъэ зихъожьыщт. Лъэс гъогухэр, кушъхьэфачъэхэм атесхэм атегъэпсы­хьэгъэ гъогухэр, аттракционхэр, кIэлэцIыкIу спорт джэгупIэхэр, скалодромыр, скейтдромыр ащ къыдэтэджэщтых. ПхъэнтIэкIухэу, нэмыкI псэуалъэхэу дагъэуцощтхэм къэлэ паркыр къагъэ­кIэрэкIэщт. Адыгеим и ЛIышъхьэ пшъэрылъ афишIыгъ цIыфхэм ящынэгъончъагъэ лъэшэу анаIэ тырагъэтынэу, джырэ шапхъэхэм адиштэрэ остыгъэхэр агъэуцунхэу. Къэлэ паркым чъыгхэр, куандэхэр, къэгъагъэхэр щыгъэтIысхьэгъэнхэмкIэ, ахэм псы атекIэгъэнымкIэ пшъэрылъ заулэ афишIыгъ.

2021 — 2022-рэ илъэсхэм проектыр агъэцэкIэн фае. Псэуалъэхэм яшIын заухыкIэ, къэлэ паркым итеплъэ джыри нахь дахэ хъущт, республикэм исхэми, ихьакIэхэми, зекIохэми ар якIопIэщт.

«ЧIыопсым амал къытеты къэлэ паркымрэ «Мэздахэм» къыпэIулъ зыгъэпсэфыпIэ чIыпIэмрэ зэзыпхыщтхэ псэуалъэ Мыекъуапэ щыдгъэ­псынэу. ЧIыопсымкIэ амалэу тиIэхэр тэрэзэу къызфэдгъэфедэнхэ фае. ЦIыфхэм ящыIэкIэ-псэукIэ зыкъезгъэ­Iэтыщт, къалэу Мыекъуапэ итеплъэ зэблэзыхъущт социальнэ псэуалъэхэм ягъэпсыни ар фэгъэхьыгъ», — къыхигъэщыгъ республикэм ипащэ.

Адыгэ Республикэм и ЛIышъхьэ ипресс-къулыкъу