Iэм щафэрэ зэхэшIыхьагъэхэр зэрэжъугъэфедэщтхэр
Коронавирусыр къызэузыхэрэм япчъагъэ зэхапшIэу Адыгеим зыкъыщиIэтыгъ.
Мы мафэхэм пчъагъэр лъэгапIэхэм ашъхьадэкIыгъ ыкIи чэщ-зымафэм нэбгырэ 81-мэ ар яIэу агъэунэфыгъ. COVID-19-м ищынагъо зызэрэщытыухъумэщт шIыкIэхэр зэпымыоу Роспотребнадзорым тыгу къегъэкIыжьых. Ныбжь зиIэхэми, кIэлэцIыкIухэми япсауныгъэ ылъапсэр Iэхэр къэбзэнхэр ары. Сыда пIомэ IэхэмкIэ вирусыр зытелъын ылъэкIыщт пкъыгъо зэфэшъхьафхэм цIыфыр атеIабэ. Ау ахэр бэрэ зытхьакIынхэ амал зимыIэхэм кIышъом шIоир тезымыгъэхьэрэ зэхэшIыхьагъэхэр (антисептикхэр) агъэфедэнхэ фае.
КIышъом шIоир тезымыгъэхьэрэ зэхэшIыхьагъэр джырэ лъэхъаным Iэхэр дезинфекцие зэрашIырэ амалышIоу къежьагъэхэм ащыщ. Ащ игъэфедэн къызэрыкIоу ыкIи къызэрагъахъохэрэр Iэрыфэгъоу зэрэщытхэм фэшI, анахьэу пандемием илъэхъан, дэгъоу ащэфыхэ хъугъэ. Ау ахэм якъыхэхын екIолIэкIэ гъэнэфагъэ иIэнэу щыт: зытегъэпсыхьагъэм, спиртэу хэтыр зыфэдизым, зэрэбгъэфедэщт шIыкIэм унаIэ атебдзэщт.
Бэрэ шъуIэхэр шъутхьакIых. COVID-19-р профилактикэ шIыгъэнымкIэ джа амалыр ары непэкIэ анахьэу шIуагъэ къэзытырэр. НэгъэупIэпIэгъу 40 — 60-м къыкIоцI сабынкIэ Iэр птхьакIын фае. Общественнэ чIыпIэм щыIэ псыр къызэрычъырэ пкъыгъор жъугъэфедагъэмэ, тхылъыпIэкIэ ар ежъугъэтыжь. Сабын пытэр шъумыгъэфедэмэ нахь тэрэз, ащ организмэ цIыкIухэр къытенэнхэ елъэкIы.
Антисептикхэр жъугъэфедэх. Ахэр къэшъущэфынхэ зыхъукIэ язэхэлъыкIэ шъунаIэ тешъудз. Этанолыр — процент 80-м, глицериныр — процент 1,45-м ыкIи «перекись водорода» зыфиIорэр процент 0,125-м фэдизэу хэлъынхэ фае.
— КъыжъугурыIон фае, нэгъэупIэпIэгъуи 5-м къыкIоцI антисептикыр Iэгу кIоцIым щэофэкIэ зэрэмыхъущтыр. Ар зэрэбгъэфедэщт шIыкIэу тетхагъэм гуфаплъэу шъуеджэнэу щыт. КIышъом шIоир тезымыгъэхьэрэ зэхэшIыхьагъэр Iэхъомбэ тIуакIэхэм дэгъоу адэжъугъахьэзэ нэгъэупIэпIэгъу 30-м нахь мымакIэу, огъушъыфэ щыпфэн фае, — къыщаIуагъ ведомствэм.