Адыгеим икоммунальнэ къулыкъухэм кIымэфэ уахътэм къалэхэм яфэIо-фашIэхэр зэрагъэцэкIэщтхэм изыфэгъэхьазырын аухыгъ.

Ос къесымэ е щтыргъукI къэхъумэ, ахэм къыздахьыгъэ Iофыгъохэм ядэгъэзыжьын пае техникэ зэфэшъхьафэу пстэумкIи 20 Мыекъуапэ щызэтырагъэпсыхьагъ.

Организациеу ахэм афэгъэзагъэм къызэрэщаIуагъэмкIэ, осыр, мылыр гъогум тырахыщт ащ фытегъэпсыхьэгъэ псэолъэ зэфэшъхьафхэр зыпыгъэнэгъэ КамАЗ-м, осыр ыугъоинышъ, Iузыщыщт автомашинэхэри яIэх. КъызигъэщтыкIэ гъогур цIэнлъагъо мыхъуным пае тыратэкъощтхэри, транспортым ищыкIэгъэ щыфэ-гъэстыныпхъэ материалхэри агъэхьазырыгъэх. «Благоустройство» зыфиIорэ муниципальнэ ГъэIорышIапIэм ипащэу Анатолий Парулавэ къызэриIуагъэмкIэ, хъызмэтшIапIэу къалэхэм ягъэкъэбзэн фэгъэзагъэм ом зыкъызэблихъумэ Iоф зэришIэрэм лъыплъэщтхэм ясписки зэхагъэуцуагъ.