КIымафэм фэхьазырых

ПАО-у «Россети» зыфиIорэм ипа­щэу Павел Ливинскэм 2020 — 2021-рэ илъэсхэм якIымэфэ уахътэ компаниеу «Россети Кубань» зэ­рэ­фэхьазырыр къэзыушыхьатырэ тхылъыр джырэблагъэ къыритыгъ.

Краснодар краимрэ Адыгэ Республикэмрэ ащы­псэухэрэм зэпыугъо фэмыхъоу электроэнергиер къаIэкIэхьаным пае трансформатор 459-рэ, электричествэм икIуапIэу километрэ 11891-рэ, подстанцие 2029-рэ ауплъэкIугъ, линиехэр амыгъэфыкъонхэм фэшI чъыг сатырхэр гектар 1942-рэ хъоу агъэкъэ­бзагъ, пкъэу 6572-рэ зэблахъугъ.

ЗыгорэкIэ ошIэ-дэмышIэ Iоф къэхъоу электричествэр къэзытырэ псэуалъэхэр зэщигъакъохэмэ, зэрэзэтырагъэуцожьыщтхэм пае нэбгырэ 1801-рэ зыхэт бригадэ 392-рэ, техникэу 715-рэ агъэхьазырыгъ. Электричествэм икъэкIопIи 120-рэ IэпэчIэгъанэу яI.

— Гъэмафэр зытекIыкIэ бжыхьэ-кIымафэу къакIорэм псэуалъэхэр зэрафэдгъэхьазырыщтыр пшъэрылъ шъхьаIэу тиIэхэм ащыщ мэхъу, — къыIуагъ ПАО-у «Россети Кубань» зыфиIорэм ипащэу Сергей Сергеевым. — Пшызэ шъолъыр ыкIи Адыгеим ащы­псэухэрэм электричествэр, фабэр игъом аIэкIэдгъэ­хьаныр тиIофшIэн шъхьаIэу зэрэщытыр къыдгурыIозэ, гъэцэкIэжьынхэм афытегъэпсыхьэгъэ программэм къыщыдэлъытагъэр зэкIэ хэзыгъэ имыIэу дгъэцэкIагъэ. Энергетикэм епхыгъэ псэуалъэхэм ягъэцэкIэжьын, нэ­мыкI фэIо-фашIэу яшIылIэгъэн фаехэм пстэумкIи сомэ миллиарди 3 апэIудгъэхьагъ.

КIэу агъэуцух

2020-рэ илъэсэу тызыхэтыр къызи­хьа­гъэм къыщегъэжьагъэу «Россети Кубань» и Адыгэ шъолъыр къутамэ подстанцие 29-рэ ыгъэуцугъ, элек­тричествэм икIуапIэу километрэ 34,5-рэ ыгъэпсыгъ.

ПсэолъакIэхэм Краснодар краим и Апшеронскэ, Шытхьэлэ ыкIи Адыгеим и Джэджэ, Мыекъопэ, Кощ­хьэблэ, Красногвардейскэ, Шэуджэн районхэм, къа- лэу Мыекъуапэ ащыпсэухэрэм электроэнергиер аIэ­кIагъэхьащт.

Киловатт 0,4-6-10 къэзытыщт псэуалъэхэр цIыфхэм электричествэр язытырэ кIуачIэхэр нахьыбэ шIы­гъэнхэм фэгъэхьыгъэ зэзэгъыныгъэм къыщыдэлъытагъэу агъэуцугъэх. Трансформаторхэмрэ кIуа­пIэхэмрэ яшIынкIэ технологие пэрытхэм адиштэрэ мат­е­риалхэр агъэфедагъэх. Электричествэр зэры­кIощтхэр илъэсыбэрэ бгъэфедэн плъэкIынэу гъэпсыгъэх ыкIи анахь щынэгъончъэу алъытэрэ гъучIычхэм аха­шIыкIыгъэх. Подстанциехэр лъэхъаным диштэрэ оборудованиехэмкIэ зэтегъэпсыхьагъэх.

— Электроэнергием ипсэолъакIэхэм унэхэр игъом япхыгъэнхэр, фэIо-фашIэхэр икъоу цIыфхэм афэгъэцэкIэгъэнхэр пшъэрылъ шъхьаIэу тиIэхэм ащыщ. Ащ пае кIэу тэшIых, шIыгъахэхэр лъэхъаным диштэу тэгъэкIэжьых, — къыхигъэщыгъ ПАО-у «Россети Кубань» и Адыгэ шъолъыр къутамэ ипащэу Рустам Магдеевым.

Мы къутамэм Краснодар краимрэ Адыгэ Респуб­ликэмрэ арытхэу киловатт 35-110-рэ къэзытырэ подстанцие 59-рэ, киловатти 6-10/0,4 кIуачIэу зиIэ трансформатор 2097-рэ ыкIи электричествэм икIуапIэу километрэ 8977-рэ епхыгъ. ПстэумкIи квадратнэ метрэ мин 83,8-рэ мэхъу фэIо-фашIэхэр зыщигъэцакIэрэр, нэбгырэ миллиони 6-м ехъу ащ щэпсэу.