КоронавирусыкIэу дунаир зэлъызыкIугъэм пэшIуекIорэ Iофтхьабзэхэм ащыщэу УФ-м ПенсиехэмкIэ ифонд и Къутамэу АР-м щыIэм епхыгъэ чIыпIэ къулыкъухэм цIыфхэм яфэIо-фашIэхэр пэIудзыгъэ шIыкIэм тетэу агъэцакIэх.

А гущыIэмкIэ цIыфым ыцIэ, ылъэкъуацIэ, ятэ ыцIэ къеушыхьатых. Фондым испециалистхэм телефонымкIэ къаIо мы­хъущт къэбар зэфэшъхьафыбэ законым щыгъэнэфагъ. ГущыIэм пае, цIыфым ипенсие е социальнэ ахъщэ тынэу фагъэнэфагъэр зыфэдизыр, зэхъокIыныгъэу ащ фэхъугъэхэр, нэмыкI къэбарэу апылъхэр... Код гущыIэм ахэр къыуаIонхэу амал къеты. Сыда пIомэ, ар цIыфым ежь иунаеу тетхагъэ мэхъу, нэмыкI зыпарэми а гущыIэ дэдэр ратыжьырэп.

Код гущыIэу о уиунэещтыр УФ-м ПенсиехэмкIэ ифонд иинтернет нэкIубгъо щыбгъэпсыгъэ «унэе кабинет» щызэбгъэшIэн плъэ­кIыщт. Ащ пае «Настройки индификации лич­ности посредством телефонной связи» зыфи­Iорэр къызэIупхыщт, нэ­ужым гущыIэр къыуатыным пае лъэIу тхылъыр птыщт. Ар къызыуатырэм ыуж «линие плъырым» иномеркIэ утеоу пцIэ, плъэкъуацIэ, уятэ ыцIэ, паспортым итхагъэхэр ыкIи а гущыIэр зяпIокIэ, о къыпфэгъэхьыгъэу уищы­кIагъэр зэкIэ къыуаIощт.

Шъугу къэтэгъэкIыжьы, мы уахътэм ПенсиехэмкIэ фондым икъулыкъоу цIыф­хэм Iоф адэзышIэрэм уекIолIэным пае пэшIорыгъэшъэу зябгъэтхын фае. ФэIо-фашIэхэм янахьыбэр пэIудзыгъэ шIыкIэм тетэуи агъэцакIэ. Телефонхэр фондым иинтернет нэкIубгъо ибгъотэщтых. Ащ пае «Контакты региона» зыфиIорэр къызэIупхын фае.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу