БзэджэшIэгъэ 400-м ехъу къыхагъэщыгъ

УФ-м хэгъэгу кIоцI IофхэмкIэ и Министерствэ исистемэ хахьэу полицием иуполномоченнэ участковэхэм яподразделение икъулыкъушIэхэм я Мафэ хагъэунэфыкIыгъ.

КъэIогъэн фае мэхьанэшхо зиIэ къулыкъухэм мыр зэу зэращыщыр. Участковэ къулыкъушIэхэр мафэ къэс бзэджашIэхэм апэуцужьых, цIыфхэм ящынэ­гъончъагъэ къаухъумэ.

Мы мафэм ехъулIэу полицием иуполномоченнэ участкови 130-мэ АР-м хэгъэгу кIоцI IофхэмкIэ и Министерствэ епхыгъэу Iоф ашIэ. Мыхэм ащыщыбэхэм IэпэIэсэныгъэшхо ахэлъэу, ящытхъу арагъаIозэ япшъэрылъхэр агъэцакIэ.

Полицием иуполномоченнэ участковэхэм ыкIи зы­ныбжь имыкъугъэхэм яIофыгъохэмкIэ отделым ипащэу Сергей Баклановым къызэриIуагъэмкIэ, 2020-рэ илъэсым имэзипшIым къыкIоцI къулыкъум иIофышIэхэм бзэджэшIэгъэ 420-рэ къыхагъэщыгъ. Мы уахътэм къыриубытэу полицием иуполномоченнэ участковэхэм административнэ хэбзэукъоныгъэ мини 5,5-м ехъу агъэунэфыгъ. Джащ фэдэу телефон зэкъодзакIохэм ыкIи Интернет-гъэпцIакIохэм, шъон нэпцIхэр зышIыхэрэм якъыхэгъэщынкIэ пэшIорыгъэшъ Iофтхьабзэхэр лъагъэкIуатэх.

Къулыкъур зыщыIэм къыщегъэжьагъэу, илъэс 97-м къыкIоцI, Урысыем хэгъэгу кIоцI къулыкъум исистемэ пытэу хэуцуагъэу Iоф ешIэ.

Наркотикым пэшIуекIох

«Хьадэгъур зыщащэрэр ошIэмэ ма­къэ къытэгъэIу» зыфиIорэ Уры­сые Iофтхьабзэм иятIонэрэ уцу­гъо икIэуххэр АР-м хэгъэгу кIоцI Iоф­хэмкIэ и Министерствэ зэфи­хьы­сы­жьыгъэх.

Наркотикхэм апэшIуекIорэ Урысые Iофтхьабзэм пшъэрылъэу иIэр хэбзэнчъэу наркотикыр къезыгъэ­кIокIыхэрэм апэуцужьыгъэным общественностыр къыхэгъэлэжьэгъэныр, ащкIэ пэшIорыгъэшъ Iофтхьабзэхэр зэхэщэгъэнхэр, джащ фэдэу наркотикым пыщагъэ хъугъэхэу, зызыгъэхъужьынэу фаеу ведомствэм зыкъыфэзгъэзагъэхэм IэпыIэгъу афэхъугъэныр ары.

2020-рэ илъэсым чъэпыогъум и 19-м къыщегъэжьагъэу и 30-м нэс Адыгеим иполицие икъулыкъушIэхэм республикэм щыпсэухэрэр рагъэблэгъагъэх, наркотикыр хэбзэнчъэу къезыгъэкIокIыхэрэм якъы­хэгъэщынкIэ Iофыгъо зэфэшъхьафхэр зэрахьагъэх.

Iофтхьабзэр окIофэ хэгъэгу кIоцI къулыкъум дэо тхылъ 40 фэдиз къыIэкIэхьагъ. Наркотикыр хэбзэнчъэу къызэрэрагъэкIокIырэм епхыгъэу бзэджэшIэгъи 9 ыкIи административнэ хэбзэукъоныгъэ 26-рэ атхыгъ. ЗэкIэмкIи наркотик зыхэлъ пкъыгъо грамм 250-м ехъу къапкъырахыгъэх.

Джащ фэдэу Iофтхьбазэм илъэныкъо шъхьаIэхэм ащыщ хъугъэ Iудзыгъэ шIыкIэм тетэу ныбжьыкIэхэм пэшIорыгъэшъ Iофтхьабзэхэр зэрафызэхащагъэхэр. Мыщ фэдэ шIыкIэмкIэ къыткIэхъухьэрэ лIэ­ужхэм агурагъэIуагъ наркотикым дэеу къыздихьын ылъэкIыщтыр.

Сомэ миллиони 3-м ехъу шIуатыгъугъ

Мобильнэ телефоныр къызфагъэ­фе­дэзэ гъэпцIагъэ зыхэлъ бзэджэшIагъэ Мыекъуапэ щызэрахьагъэу щагъэу­нэфыгъ.

Илъэс 81-рэ зыныбжь пенсионерыр гъэпцIакIохэм агъэдели, сомэ миллиони 2,2-м ехъу шIуаты-гъугъ. Урысыем и МВД иотделэу Мыекъуапэ щыIэм мыщкIэ уголовнэ Iоф къызэIуихыгъ.

Мыщ ыпэкIи, 2019-рэ илъэсым жъоныгъуакIэм ныбжь зиIэ хъулъфыгъэр щэкIо-гъэпцIакIохэм агъэдели, сомэ мин 800-м ехъур шIуатыгъугъ. АгъэпцIагъэм къызэриIуагъэмкIэ, бзэджашIэхэм атыгъугъэр къырагъэгъэзэжьыным ифэIо-фашIэхэр зыгъэцэкIэрэ организацием зафигъэзагъ. Хъулъфыгъэм илъэIу фагъэцэкIэным пае, якартэ ахъщэ афыригъэхьан фаеу къыраIуагъ. ЫмышIэхэрэм цыхьэ афишIи хъулъфыгъэм гъогогъу 20-м ехъурэ, сомэ мин 70-м къыщегъэжьагъэу сомэ мини 120-м нэсэу ахъщэр ясчет афыригъэхьагъ.

БзэджашIэхэм якъычIэгъэщынкIэ мы уахътэм оперативнэ-лъыхъун Iофтхьабзэхэр полицием иIофышIэхэм зэрахьэх.

ЗэкIэмкIи пенсионерым шIуатыгъугъэр зыфэдизыр полицием иIофышIэхэм къызалъытэжьым, ар сомэ миллионищым ехъугъ.

Ахъщэ нэпцIыр

Сомэ мини 5 хъурэ ахъщэ нэп­цIыр Мыекъуапэ дэт банкым къыIэ­кIэхьагъэу Мыекъуапэ иполицие идежурнэ часть макъэ къырагъэIугъ.

Эксперт-криминалистхэм уплъэкIунхэр зашIыхэм, ахъщэр нэпцIэу къычIэкIыгъ.

Мы уахътэм ехъулIэу ахъщэ нэпцIыр зышIыгъэм ыкIи ар IузыгъэкIыгъэм икъыхэгъэщын епхыгъэ Iофтхьэбзэ зэхэубытагъэхэр хэбзэухъумакIохэм зэрахьэх. МыщкIэ уголовнэ Iоф къызэIуахыгъ. Санкцием къызэригъэнафэрэмкIэ, бзэджашIэм илъэси 8 хьапс къыхьын ылъэкIыщт.

Адыгеим иполицие цIыфхэм закъыфегъазэ ахъщэм епхыгъэ фэIо-фашIэхэр агъэцакIэхэ хъумэ сакъыныгъэ къызхагъэфэнэу. ЗыгорэкIэ ахъщэм итеплъэ ишъыпкъапIэ шъуехъырэхъышэу щытмэ, банкым зыфэжъугъаз ыкIи полицием ителефон номерэу 02-м (102-м) шъутеу.

Уголовнэ Iофыр зэхафыгъ

УФ-м хэгъэгу кIоцI IофхэмкIэ и Министерствэ иотделэу Мые­къуапэ щыIэм илъэс 36-рэ зы­ныбжь хъулъфыгъэм ылъэныкъокIэ къы­зэIуи­хыгъэ уголовнэ Iофым изэ­хэфын аухыгъ.

Наркотикыр хэбзэнчъэу къызэрэригъэкIокIыгъэм епхыгъэу ар агъэмысэ.

Уголовнэ Iофыр къызэIуахыным лъапсэ фэхъугъэр мы илъэсым бэдзэогъум «Iушъхьэ-2020» зыфиIоу наркотикыр хэбзэнчъэу къезыгъэкIокIыхэрэм алъыплъэрэ къэлэ подразделением иполицие зэхищэгъэ Iофтхьабзэм изэфэхьысыжьхэр ары. Джащыгъум лъыхъуакIохэм къэбар къаIэкIэхьагъ ыпэкIэ хьапс зытелъыгъэ хъулъфыгъэм хэбзэнчъэу наркотикыр къызэрэригъэкIокIырэр.

Хъулъфыгъэм иунэ къызалъыхъум, кIэп грамм 430-м ехъу къырагъотагъ. Ащ нэмыкIэу ар къыгъэкIэу къычIагъэщыгъ. Хъулъфыгъэм къыфызэIуахыгъэ уголовнэ Iофыр Мыекъопэ къэлэ хьыкумыр хэплъэнэу фагъэхьыгъ.

НэкIубгъор къэзыгъэхьазырыгъэр КIарэ Фатим.