Коронавирус узыр зэпахыным ищынагъо зэрэщыIэм къыхэкIыкIэ щапIэхэм, общественнэ транспортым, шхапIэхэм, нэмыкIхэм санитарнэ шапхъэхэр зэращагъэцакIэхэрэм епхыгъэ уплъэкIун Iофтхьабзэхэр Адыгеим щылъагъэкIуатэх.

Мыекъопэ къэлэ администрацием ошIэ-дэмышIэ IофхэмкIэ и ГъэIорышIапIэрэ структурнэ подразделениехэм ялIыкIохэмрэ Росгвардием, полицием ыкIи Роспотребнадзорым якъулыкъу­шIэхэр ягъусэхэу республикэм икъэлэ гупчэ исатыушIыпIэхэр, бэдзэрхэр ауплъэкIух.

Къалэу Мыекъуапэ иоперативнэ штаб къызэритыгъэмкIэ, чъэпыогъум и 19-м къыщегъэжьагъэу IофшIэкIо купым хэтхэм объект мини 4,5-рэ ауплъэкIугъ, административнэ хэбзэукъоныгъэхэм алъэныкъокIэ протоколи 100 фэдиз зэхагъэуцуагъ.

Нэгуихъор аIулъынымкIэ сатыушIыпIэхэм ыкIи общественнэ транспортым шапхъэхэр ащыгъэцэкIагъэхэ зэрэхъурэм епхыгъэ дэкIыгъо уплъэкIунхэр шэкIогъум и 16-м зэхащагъэх. Уполномоченнэ къулыкъушIэхэм объект 98-рэ ауплъэкIугъ, нэгуихъор аIулъыным ишапхъэхэр общественнэ транспортым щаукъуагъэу зы протокол зэхагъэуцуагъ.

Къыхэгъэщыгъэн фае, нэгуихъор аIулъыным имызакъоу санитарнэ шапхъэхэр зэрагъэцакIэхэрэри ауплъэкIух. ГущыIэм пае, шэкIогъум и 13 — 14-м Мыекъопэ къэлэ администрацием илIыкIохэм полицием икъулыкъушIэхэр ягъусэхэу общественнэ шхэпIэ чIыпIэхэм яIофшIэн агъэкIэкIыгъэнымкIэ (сыхьатыр 23-м къыщегъэжьагъэ сыхьатыр 6-м нэс) шапхъэхэр зэрагъэцакIэхэрэм епхыгъэ дэкIыгъо уплъэкIунхэр рагъэкIокIы­гъэх. Шапхъэхэр аукъуагъэу протоколи 3 зэхагъэуцуагъ.

Нэгуихъор аIулъынымкIэ ыкIи нэмыкI шапхъэу щыIэхэр дэх имыIэу агъэцэкIэнхэм япхыгъэ Iофтхьабзэхэр мы мафэхэми Мыекъуапэ щылъагъэкIуатэх.

КIАРЭ Фатим.