Игъорыгъоу пхыращы
Къэралыгъо программэу «Тилъэпкъэгъухэу IэкIыб къэралыгъохэм ащыпсэухэрэр ежь яшIоигъоныгъэкIэ Адыгэ Республикэм къэкощыжьынхэмкIэ IэпыIэгъу афэхъугъэныр» зыфиIорэр пхырыщыгъэным иIофыгъохэм афэгъэзэгъэ межведомственнэ комиссием зичэзыу зэхэсыгъо иIагъ.
Ар зэрищагъ Адыгэ Республикэм и Премьер-министрэ игуадзэу Наталья Широковам.
Ащ ипэублэ псалъэ къызэрэщиIуагъэмкIэ, Урысые Федерацием ипрограммэ диштэу илъэситIу мэхъу тэ тишъолъыри ар зыщагъэцакIэрэр. Къэралыгъо программэр пхырыщыгъэнымкIэ ащ фэгъэзэгъэ ведомствэ пстэуми зэзэгъыныгъэхэр адашIыгъэх. Джащ фэдэу мы илъэсым имэзи 10 Iофэу ашIагъэр зэрэзэфахьысыжьыщтыр, тапэкIэ анахьэу анаIэ зытырагъэтыщтхэм ахэплъэнхэу зэрэзэрэугъоигъэхэр Наталья Широковам къыхигъэщыгъ.
Зэхэсыгъом апэрэ Iофыгъоу зытегущыIагъэхэр къэралыгъо программэу «Тилъэпкъэгъухэу IэкIыб къэралыгъохэм ащыпсэухэрэр ежь яшIоигъоныгъэкIэ Адыгэ Республикэм къэкощыжьынхэмкIэ IэпыIэгъу афэхъугъэныр» зыфиIорэм епхыгъэу 2020-рэ илъэсым зэрахьэгъэ IофшIэныр ары. Ащ къытегущыIагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.
Ащ къызэриIуагъэмкIэ, 2019-рэ илъэсым иятIонэрэ илъэсныкъо къыщегъэжьагъэу программэр республикэм щыпхыращы ыкIи ар 2021-м нэс телъытагъ. ЗыфэIорышIэрэр IэпэIэсэныгъэ ин зыхэлъ тилъэпкъэгъухэу IэкIыб къэралыгъохэм ащыпсэухэрэр тишъолъыр къагъэзэжьын, республикэм исоциальнэ-экономикэ хэхъоныгъэ яIахьышIу халъхьаныр ары.
ЫпшъэкIэ зыцIэ къетIогъэ комитетыр программэм игъэцэкIэн фэгъэзагъ, кощын IофхэмкIэ ГъэIорышIапIэми Iофыгъохэр зэшIуехых. Ащ хэлажьэрэмрэ иунагъорэ Адыгеим ишъолъыр къыхиубытэрэ муниципальнэ образованиехэм ащыпсэун фит. Тилъэпкъэгъухэр къэкощыжьынхэм кIэгъэгушIугъэнхэм, ахэр щыIэныгъэм хэгъэгъозэгъэнхэм афэшI цIыфхэм IофшIэн ягъэгъотыгъэнымкIэ къэралыгъо къулыкъум программэ гъэнэфагъэ зэхигъэуцуагъ. Джащ фэдэу къэкощыжьыкIэрэм псэупIэ зэригъэгъотынымкIэ зэтыгъо ахъщэ IэпыIэгъу ыкIи гъэсэныгъэу IэкIыбым щызэригъэгъотыгъэр мыщ къыщигъэшъыпкъэжьынымкIэ пэIухьащтыр ратыщт.
— Мы илъэсым тилъэпкъэгъу 40 къэдгъэкощыжьынхэу итхъухьэгъагъ: программэм хэлажьэмэ зышIоигъо нэбгыри 10-р ыкIи ахэм яунагъохэм арыс нэбгырэ 30-р, — къыIуагъ Шъхьэлэхъо Аскэр. — Ау ушъхьагъу зэфэшъхьафхэм апкъ къикIыкIэ тфэгъэхъугъэп. Ахэм зэу ащыщ коронавирусым зимыушъомбгъунымкIэ къэралыгъо гъунапкъэхэр зэрэзэфашIыгъагъэхэр. 2020-рэ илъэсым ищылэ — чъэпыогъу мазэхэм программэм хэлажьэ зышIоигъомэ ялъэIу тхылъ 27-рэ хэгъэгу кIоцI IофхэмкIэ Министерствэм кощын IофхэмкIэ и ГъэIорышIапIэ къикIи Комитетым къыIэкIэхьагъ. Ахэм ахэплъагъэх ыкIи япэсыгъэ унашъохэр аштагъэх. Программэм ишапхъэхэм адимыштэу алъытэгъэ лъэIу тхылъи 7-р зэкIагъэкIожьыгъ, нэбгыри 5 учетым хагъэуцуагъ.
Комитетым итхьаматэу Шъхьэлэхъо Аскэр къызэрэхигъэщыгъэмкIэ, илъэсыр къызихьагъэм къыщегъэжьагъэу нэбгырэ 30-мэ шIыкIэ зэфэшъхьафхэмкIэ закъыфагъэзагъ. Программэм хэлажьэхэрэм зэхэф фэIо-фашIэхэр афагъэцэкIагъэх.
Къэралыгъо программэр пхырыщыгъэнымкIэ Комитетым епхыгъэу Общественнэ совет, комиссие зэхащагъэх. Мы уахътэм етIупщыгъэу тилъэпкъэгъухэм макъэ зэрарагъэIущтым ыуж итых. Ащ пае Комитетми сайт ыгъэпсыгъ, цIыфхэм IофшIэн ягъэгъотыгъэнымкIэ къэралыгъо къулыкъум Адыгэ РеспубликэмкIэ и ГъэIорышIапIэ автомат мэкъэгъэIу системэу «Соотечественники» зыфиIорэм IофшIэпIэ чIыпIэу, IэнатIэу щыIэхэр къырегъахьэх.
Межведомственнэ комиссием хэлажьэхэрэм анахьэу анаIэ зытырагъэтыщт лъэныкъохэр агъэнэфагъэх, тхылъхэм, нэмыкI тхьапэхэм ягъэпсын Iофыгъоу къапыкIыхырэм ядэгъэзыжьын фэIорышIэщт хэкIыпIэхэр къагъотынхэу рахъухьагъ.
Iэшъынэ Сусан.