Шъоущыгъу узым пэшIуекIогъэным и Дунэе мафэ ехъулIэу АР-м медицинэ профилактикэмкIэ и Гупчэ «Неделя открытых дверей» зыфиIорэ Iофтхьабзэ зэхищагъ, ащ иапэрэ мафэ нэбгырэ 20 ауплъэкIугъ. Ахэм зэкIэми тапэкIэ агъэцэкIэн фэе пшъэрылъхэр афашIыгъэх.

Iофтхьабзэм къыдыхэлъытагъэу мыщ къеолIэгъэ пстэуми экспресс-диагностикэ арагъэкIугъ. Ащ хэхьэ лъыдэкIуаер уплъэкIугъэныр, гу-лъынтфэ узхэр къяутэкIыным ищынагъо къэуцумэ агъэунэфыным фэшI ащэчырэр ыкIи апчанэ ипсы­гъуагъэ ашыныр, «КардиовизорымкIэ» яплъынхэр, лъым изытет лабораториемкIэ зэрагъэшIэныр, пкъышъолыр псыхьэгъэным пае специалистхэр гущыIэгъу афэхъунхэр.

Зипсауныгъэ изытет зыуплъэкIу зышIоигъогъэ пстэури Гупчэм испециалистхэм къырагъэблагъэх. ШъузэкIолIэщтыр: урамэу Краснооктябрьскэм иунэу N 43, пчэдыжьым сыхьатыр 8-м къыщегъэжьагъэу пчыхьэм 4-м нэс.

Абрэдж Сэтэнай.