Коронавирусыр къышъоутэлIагъэу IэпыIэгъу псынкIэ языгъэгъотырэ медицинэ IофышIэхэм шъукъяджагъ, ау бригадэу къэкIуагъэм IэпыIэгъоу къышъуитын фаер шъушIэрэп. Шъуипсауныгъэ изытет елъытыгъэу ахэм къышъуашIылIэн алъэкIыщтыр къышъуфызэхэтэфы.

— Сымаджэм ычыишъхьэ сыдигъуа зиIабэхэрэр, анализ ашIыщтыр зырахырэр?

Сымаджэм итемпературэ 37,5-м зышъхьа­дэкIыкIэ, ар пскэ е жьы ымыгъот зыхъукIэ поликлиникэм Iут врачыр е IэпыIэгъу псынкIэмкIэ бригадэу къэкIуа­гъэм хэтыр сымаджэм ычыишъхьэ еIабэ, анализ ашIыщтыр рехы. Джащ фэдэу коронавирусыр къызэутэлIагъэм иIа­хьылхэм, пневмониер къызэузыхэрэм, зыныбжь илъэс 65-м шъхьадэкIыгъэхэу пскэхэрэм, пэтхъу-Iутхъу зиIэхэм, зычый узыхэрэм, IэкIыб къэралыгъохэм къарыкIыжьыгъэхэу коронавирусыр къызыпыпкIагъэкIэ зэнэгуехэрэм анализ ашIыщтыр ячыишъхьэ рахын фае. Мэфи 2 — 3-кIэ а анализхэм якIэуххэр хьазырынхэ фае.

— Сыдигъуа лъыр анализ зашIырэр?

— Мыхьылъэ дэдэу сымаджэу сымэджэщым чIэлъым е коронавирусым нэмыкIэу хэужъыныхьэгъэ уз зиIэу унэм зыщеIазэхэрэм врачым ащ фэдэ анализыр атынэу къафегъэнафэ.

— Сымаджэм итхьабылхэр компьютернэ томографиемкIэ сыдигъуа за­уплъэкIурэр?

— Коронавирусым гурытэу ыкIи хьылъэу ыгъэгумэкIыхэрэр ащ фэдэ шIыкIэкIэ врачым арегъэуплъэкIух. Мыщ дэжьым бэ ащ къыдилъытэрэр: сымаджэм ыныбжь, хэужъыныхьэгъэ узэу иIэхэр, зыгъэгумэкIырэр, жьы къызэрищэрэр, тхьабылхэм зядэIу нэуж нафэ къыфэхъугъэхэр.

— Коронавирус къызэутэлIагъэр сыдигъуа сымэджэщым зычIагъэгъуалъхьэрэр?

— Коронавирус къызэутэлIагъэр сымэджэщым агъэгъолъы мыхэм ащыщ зыралъэгъулIэкIэ: сатурациер процент 95-м нахь макIэ зыхъукIэ, температурэр 38-м зынэсыкIэ е ащ къызехъукIэ, тхьабылитIуми процент 25-м ехъукIэ зэхъо­кIыныгъэхэр афэхъугъэу, пневмоние иIэу загъэунэфыкIэ. Джащ фэдэу медицинэ IофышIэхэм агъэгъолъынхэ фае зыныбжь илъэс 65-м шъхьадэкIыгъэхэу хэужъыныхьэгъэ уз зиIэхэр, общежитиехэм ыкIи цIыфыбэ зэрыс фэтэрхэм ащыпсэухэрэр.

— ЗычIагъэгъолъхьащт сымэджэщыр ежь-ежьырэу цIыфхэм къыхахын алъэкIыщта?

— Участковэ врачыр е IэпыIэгъу псынкIэ къязытырэ медицинэ IофышIэр ары ахэр гъолъынхэу зыгъэнафэрэр. Ковиднэ стационар анахь благъэм ахэр теохэшъ, чIыпIэ нэкIхэр щыIэмэ зэрагъашIэ. Ахэр ары сымаджэр зыдащэщтымкIи унашъо зыштэрэр. Арышъ, зыдагъэгъолъыщтыр сымаджэм къыхихын ылъэкIыщтэп.

— Шапхъэу щыIэхэр заукъо­хэкIэ сыда ашIэщтыр?

— КоронавирусымкIэ линие плъыр зыкIым ителефонэу 9-800-2000-112-мкIэ е шъуишъолъыр илиние плъыр ителефонкIэ шъутеон шъулъэкIыщт. Джащ фэдэу ОМС-мкIэ шъуистраховой лIыкIо зыфэжъугъэзэн шъулъэкIыщт.