2021 — 2023-рэ илъэсхэмкIэ УФ-м ибюджет фэгъэхьыгъэ законо­про­ектэу Къэралыгъо Думэр ятIонэрэ еджэгъумкIэ зыхэплъэщтым со­циальнэ мэхьанэ зиIэ гъэтэрэзыжьынхэр фэшIыгъэнхэм поли­тиче­скэ партиеу «Единэ Россиер» кIэщакIо фэхъугъ.

Ахэр къуаджэхэмрэ къа­лэ­хэмрэ яинфраструктурэ на­хьышIу шIыгъэным, цIыфхэр социальнэу ухъумэгъэнхэм, ошъогу транспортыр зыгъэфе­дэхэрэм апае субсидиехэм афэгъэхьыгъэх.

«Единэ Россием» и Генсовет исекретарэу Андрей Турчак къызэриIуагъэмкIэ, цIыф къызэрыкIохэм, бизнесменхэм, экспертхэм яеплъыкIэхэр, яшIоигъоныгъэхэр гъэтэрэзыжьынхэм лъапсэ афэхъугъэх. УФ-м и Правительствэрэ финансхэмкIэ Министерствэмрэ ягъусэхэу Iоф ахэм адашIагъ.

— Гъэтэрэзыжьынхэр пычыгъуищэу бгощынхэ плъэкIыщт, — къыIуагъ Генсоветым исекретарь. — Апэрэр къалэхэмрэ къуаджэхэмрэ яинфраструкту- рэ нахьышIу шIыгъэным фэгъэ­хьыгъ. Къуаджэхэм культурэм иунэхэр ащышIыгъэнхэу ащ къы­щыдэлъытагъ. Сомэ миллион 776,1-рэ пэIухьащт. ПстэумкIи ащ фэдэ унэ 303-рэ ашIынэу агъэнэфагъ.

Андрей Турчак кьызэриIуагъэмкIэ, культурэм иунэхэм ящыкIагъэр афэщэфыгъэнхэм пае сомэ миллион 65-рэ гъэ­нэфэгъэнэуи партием пред­ложение къыхьыгъ. АщкIэ учреждение мин фэдизмэ Iэпы­Iэгъу агъотыщт. Илъэсищым псэолъи 172-рэ ашIынэу ары зэрэщытыр.

Джащ фэдэу искусствэхэмкIэ кIэлэцIыкIу еджэпIи 165-рэ шъолъыр 27-мэ ащагъэкIэжьыщт. Ащ пае сомэ миллион 345-рэ агъэнэфагъ. Къэлэ цIыкIухэм ятеатрэхэм IэпыIэгъоу аратыщтыр сомэ миллион 249-кIэ нахьыбэ шIыгъэными партием исатыр хэтхэр кIэщакIо фэхъугъэх.

Къоджэ еджапIэхэм яспортзалхэм ягъэкIэжьын пэIухьащт мылъкури сомэ миллиони 150-кIэ нахьыбэ шIыгъэн фаеу алъы­тагъ. Ар псэолъэ 907-мэ афэхъущт. Ащ нэмыкIэуи сомэ миллиардитIу ахъщэ IэпыIэгъу тедзэу ФОК-м афагъэхьыщт.

«Единэ Россиер» ипредло­жениекIэ чIыпIэхэм язэтегъэ­псыхьан пэIуагъэхьащт мылъкур сомэ миллиардитIукIэ нахьыбэ хъущт. Ащ ишIуагъэкIэ 2021-рэ илъэсым фэтэрыбэу зэхэт унэ­хэм ящагоу ыкIи общественнэ чIыпIэу 900 фэдиз агъэкIэ­жьыщт. Илъэсищым ащ фэдэ объект мин 16,5-рэ зэтырагъэ­псыхьанэу агъэнэфагъ.

Мыхэр зэкIэ гъэтэрэзыжьынхэм яапэрэ пычыгъо хэхьэх. ЯтIонэрэр хэушъхьафыкIыгъэ цIыф купхэм социальнэ Iэпы­Iэгъу тедзэ ятыгъэным фэгъэ­хьыгъ. «Единэ Россием» ипредложениекIэ шахтер къалэхэмрэ поселкэхэмрэ хэхъоныгъэ ягъэ­шIыгъэным фэгъэхьыгъэ чIыпIэ программэхэм япхырыщын пэ­Iуагъэхьащт ахъщэр сомэ мил­лиардитIукIэ нахьыбэу афа­тIупщыщт. Партием ифракциеу УФ-м и Къэралыгъо Думэ хэтым ипащэу Сергей Неверовым къызэриIуагъэмкIэ, социаль­нэ псэуалъэхэм ягъэкIэжьын, нахьыпэкIэ къушъхьэ IофшIэнхэр зыщызэшIуахыгъэ чIыгухэм язэ­гъэфэжьын ыкIи зэхэоным нэ­сыгъэ унэхэм ачIэсхэм ягъэкощын а мылъкур пэIуагъэхьащт.

— УФ-м и Президент ижъоныгъокIэ унашъохэм ащыщэу жъы хъугъэу, зэхэоным нэсыгъэ унэхэм ачIэсхэм ягъэкощын фэ­гъэхьыгъэм игъэцэкIэн Адыге­им щылъагъэкIуатэ, — къыIуагъ АР-м и Къэралыгъо Совет — Хасэм псэолъэшIынымкIэ, транспортымкIэ, зэпхыныгъэмкIэ ыкIи псэупIэ-коммунальнэ хъызмэтымкIэ и Комитет ипащэу, партием ишъолъыр политсовет хэтэу Олег Картамышевым. — Ащ фэгъэхьыгъэ программэм ипхырыщын АР-м и ЛIышъхьэу, партием ишъолъыр къутамэ исекретарэу КъумпIыл Мурат лъэшэу ынаIэ тет. Рес­публикэм ихэбзэ гъэцэкIэкIо органхэмрэ псэупIэ-коммунальнэ хъызмэтым зэхъокIыныгъэ­хэр фэшIыгъэнхэмкIэ Фондымрэ зэпхыныгъэ яIэу, Iофэу зэда­шIагъэм ишIуагъэкIэ цIыфхэм ягъэкощын фытегъэпсыхьэгъэ программэу 2025-рэ илъэсым нэс телъытагъэр нахьыжьэу зэ­рэгъэцэкIэгъэщтым фэгъэхьыгъэ зэзэгъыныгъэм кIэтхагъэх. 2022-рэ илъэсым тыгъэгъазэм и 31-м нэс программэм къыдыхэлъытагъэхэр гъэцэкIагъэ хъунхэу Адыгеим пшъэрылъ ыштагъ. 2017-рэ илъэсым зэхэоным нэсыгъэу алъытэгъэ унэ 29-мэ, ар квадратнэ метрэ мини 7,9-рэ мэхъу, ачIэс нэбгырэ 425-мэ псэукIэ амалэу яIэр нахьышIу хъущт. 2019-рэ илъэсымкIэ пшъэрылъхэр пIалъэм нахьыжьэу гъэцэкIагъэхэ хъугъэ. Тызыхэт илъэсымкIэ, мы уахътэм нэс пштэмэ, процент 93-р хэгъэкIыгъах. Илъэсым ыкIэм нэс пстэури пхырыщыгъэ хъущт.

«Единэ Россиер» кIэщакIо зыфэхъугъэ гъэтэрэзыжьынхэм яящэнэрэ пычыгъо псэупIэ цIыкIухэм связым иамалхэр аIэкIэгъэхьэгъэнхэм, интернет яIэным фэгъэхьыгъ. Ащ къыщыдэлъытагъэхэм сомэ миллиарди 6,2-рэ атефэщт. Мы лъэныкъом мылъку нахьыбэу пэIухьэмэ, нэбгырэ 250 — 500 зыдэс псэу­пIэхэм зэкIэми интернетыр яIэ хъущт.

Андрей Турчак къызэриIуагъэмкIэ, къихьащт илъэсым нэ­бгыри 100 — 250-рэ зыщы­псэухэрэм интернетыр ащагъэ­псынэу рагъэжьэщт. Гъэтэрэзыжьыным ишIуагъэкIэ Iофхэр нахь псынкIэу лъыкIотэщтых.

Ахэм анэмыкIэу гурыт ыкIи апшъэрэ еджапIэхэм патриотическэ пIуныгъэм защегъэушъом­бгъугъэным фэгъэхьыгъэ зако­нэу УФ-м и Президент кIэща- кIо зыфэхъугъэм игъэцэкIэн пэIухьащт мылъкум фэгъэхьыгъэ гъэтэрэзыжьыными партиер кIэщакIо фэхъугъ. Ащ пае сомэ миллиарди 3,4-рэ бюджетым къыщыдэлъытыгъэн фаеу «Единэ Россием» ылъытагъ.

Мылъкур гурыт ыкIи профессиональнэ училищэхэм ачIэсхэм япIун фэгъэхьыгъэ программэм игъэхьазырын, «Юнармием» ипроектхэмрэ иIофтхьабзэхэм- рэ япхырыщын, язэхэщэн, нэмыкIхэм апэIуагъэхьащт.

«Единэ Россиер» гъэтэрэзы­жьынэу кIэщакIо зыфэхъугъэхэм зэкIэмкIи сомэ миллиард 14 атефэщт.

Шъугу къэдгъэкIыжьын, УФ-м ибюджет фэгъэхьыгъэ законопроектэу Къэралыгъо Думэр апэрэ еджэгъумкIэ зыхэплъа­гъэм партием дыригъэштагъ. «Единэ Россиемрэ» УФ-м иминистрэхэм я Кабинетрэ зэгъу­сэхэу а тхылъым мэзэ пчъа­гъэрэ Iоф дашIагъ. Партием ипроектэу пхырыщыгъэ хъугъэ­хэм къагъэлъагъорэм къыпкъы­рыкIыхэзэ, предложениехэр агъэхьазырыгъэх. Федеральнэ бюджетым цIыфхэр социальнэу къеухъумэх, шъолъырхэм Iэпы­Iэгъу ареты.

Хэутыным фэзгъэхьазырыгъэр ХЪУТ Нэфсэт.