Тхылъхэр ишъумыдзыжьых

Шъузэджэгъэхэ тхылъэу шъузфэмыежьхэр ишъумыдзыжьынхэу компаниеу «ЭкоЦентрэр» къышъоджэ!

ЦIыфхэм тхылъхэр хэкIым зэрэхадзэжьыхэрэр нахьыбэ хъугъэу региональнэ операторым ыгъэунэфыгъ. Нахь тэрэзэу къэпIон хъумэ, зыгорэ афэеным, аштэнхэм щыгугъыхэу хэкIитэкъупIэ площадкэхэм къатыралъхьэх. Ау нахьыбэрэмкIэ, ахэр зыми ыштэхэрэп, нэмыкI пыдзэфэ пытэхэм ягъусэу Iуащых. «ЭкоЦентрэр» къышъолъэIу аущтэу шъумышIынэу, цIыфхэр бэу зыщызекIоу, зыщалъэгъущтхэм къэжъугъэнэнхэу. ГущыIэм пае, шхапIэм къычIэшъун е общественнэ транспортым икъэуцупIэ горэм къыIужъугъан.

Мыекъуапэ пштэмэ, тхылъхэр къэбгъэнэнхэм фэгъэпсыгъэу къэлэ паркым чIыпIэ иI. Джащ фэдэу урамхэу Пионерскэмрэ Гоголым ыцIэ зыхьырэмрэ зыщызэблэкIыхэрэм, Адыгэ къэралыгъо университетым инаучнэ библиотекэ дэжькIэ, ащагъэ­псыгъ. «Телега» ащ зэреджагъэхэр. Дэгъоу къызэтенэгъэ тхылъхэр ащ щыптынхэ плъэкIыщт.

Узэджэн умылъэкIыщтэу, дэеу къызэтенагъэхэри хэкIым хэшъумытакъоу, маккулатурэм иугъоин фытегъэпсыхьэгъэ Iофтхьабзэ зызэхащэкIэ яшъутыжьхэмэ нахьышIу.

МэфипшI пэпчъ

Адыгеим хэкIыр щыдэзыщырэр пстэумкIи автомашинэ 61-рэ мэхъу. Ахэр санитарнэ шапхъэхэм адиштэу гъэкъэбзэгъэнхэм шъолъыр операторым ынаIэ лъэшэу тет.

Транспортыр зэкIолIэжьырэ базэхэр Мыекъуапэрэ поселкэу Инэмрэ зыдэтхэр. МэфипшI пэпчъ ахэм автомашинэхэр ащатхьакIых, дезинфекцие ащашIых. Мы уахътэм, зэпахырэ узэу дунаир зэлъызыкIугъэм илъэхъан, мы Iофым нахь лъэшыжьэу региональнэ операторыр лъэплъэ.

Вирусым ущызыухъумэхэрэр щыIэныгъэм щыщ хъугъэх. Ахэр зыдгъэфедэхэрэм ыуж хэкIыр зэрылъ щалъэм итэдзэжьы, нэужым пыдзафэхэр Iузыщырэ машинэм макIох. «ЭкоЦентрэм» санитарнэ шапхъэхэм ягъэцэкIэн ынаIэ тет, шъори ахэм ягъэ­кIодын шъуфэсакъынэу къышъоджэ.

Шъугу къэтэгъэкIыжьы, маскэу бгъэфедэгъахэр пакетым иплъхьанышъ, пыппхыкIын фае. Джащыгъум ащ иягъэ зыпарэми ригъэкIыщтэп.

ПэIудзыгъэу Iоф тэшIэ

«ЭкоЦентрэм» зэригъэунэфыгъэмкIэ, цIыфхэр шъо­лъыр операторым къызэрэфытеохэрэр нахь макIэ хъугъэ. ГущыIэм пае, блэкIыгъэ чъэпыогъу мазэм гъогогъу миным ехъу зыкъызэрэфагъэзагъэр. Ащ ыпэрэ мазэм егъэпшагъэмэ, ар проценти 5,5-кIэ нахь макI.

— ЦIыфхэм упчIэу къатыхэрэм, Iофыгъоу къыхагъэщыхэрэм бэкIэ япхыгъ тиIофшIэн изэхэщэн. Мары игъом хэкIыр дэщыгъэ зэрэхъурэм ишIуагъэкIэ, графикыр зэрэгъэпсыгъэм цIыфхэр ыгъэгумэкIыжьыхэрэп. Автомашинэр къызщыкIощтыр зэкIэми ашIэ хъугъэ. Мы уахътэм тиIофышIэхэми, цIыфэу республикэм щыпсэухэрэми ящынэгъончъагъэ нахь гъэлъэшыгъэу тынаIэ тетышъ, офисхэм зыпари къядгъэблагъэрэп. Ау интернет нэкIубгъор зэтедгъэуцуагъэу, пэIудзыгъэ шIыкIэм тетэу Iоф тэшIэ, — къыIуагъ ООО-у «ЭкоЦентр» зыфиIорэм и Адыгэ шъолъыр къутамэ ипащэу Алыбэрд Налбый.

Шъугу къэтэгъэкIыжьы, региональнэ операторым изэикI колл-гупчэ сыхьатыр 7-м щегъэжьагъэу 20-м нэс Iоф ешIэ. Мары телефонхэр: 8.800-707-05-08, 8(8772) 21-06-00.

Ащ имызакъоу, диспетчер къулыкъуми шъуиупчIэхэм джэуап­хэр къаритыжьыщтых. Мы номерымкIэ шъутеон шъулъэкIыщт: 8-962-868-14-62.

ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу.