Лъэпкъ проектэу «Псауныгъэр къэухъумэгъэныр» зыфиIо­рэм диштэу технологие пэрытхэр зыщыгъэфедэгъэ, Iэпы­Iэгъу псынкIэ къязытырэ федеральнэ медицинэ гупчэхэм сымаджэхэр алъызыгъэIэсырэ санитар авиацием икъулы­къу чэзыу-чэзыоу Адыгеим зыщырагъэушъомбгъоу аублагъ.

АщкIэ ищыкIэгъэ амал­хэр республикэм щызэ­хащагъэх. Медицинэ IэпыIэгъу зэраратырэ оборудование зэрыт вертолетыр Адыгеим къыратыгъ. Чэщи мафи имыIэу, ищыкIагъэу зыхъурэм ар къыз­фагъэфедэн алъэкIыщт.

ШэкIогъум и 11-м апэ­рэу вертолетыр къыз­фа­гъэфедагъ. Мыекъуапэ щыщ сымаджэу гууз лъэш зиIэу технологие пэрытхэр зыщыгъэфедэгъэ Iэпы­Iэгъу псынкIэ зищыкIагъэр Астрахань нагъэсыгъ. Ады­гэ Республикэ клиникэ сымэджэщым иврачхэм сымаджэм апэрэ IэпыIэгъур рагъэгъотыгъ.

Федеральнэ кардиологическэ гупчэу Астрахань щыIэм испециалистхэм аIэкIагъэ­хьафэ нэс тимедицинэ IофышIэхэр ащ игъусагъэх.

Технологие пэрытхэр зы­щыгъэфедэгъэ медицинэ IэпыIэгъу ягъэгъотыгъэнымкIэ, медицинэ фэIо-фашIэхэр нахьышIоу зэ­хэщэгъэнхэмкIэ санитар авиациемкIэ къулыкъум хэ­хъоныгъэ егъэшIыгъэным мэхьанэшхо зэриIэр Адыгеим и ЛIышъхьэ хигъэунэфыкIыгъ.

«Санавиацием ишIуа­гъэкIэ республикэм имеди­цинэ IофышIэхэм сыма­джэхэм псынкIэу медицинэ IэпыIэгъу ягъэгъотыгъэ­нымкIэ амалэу яIэм къыхэ­хъуагъ. ЦIыфхэм ящыIэныгъэ къырыкIощтыр ащ фэдэ IэпыIэгъум бэрэ елъытыгъэу мэхъу. Непэ, зэпахырэ узым лъэшэу зызыщиушъомбгъугъэ лъэхъаным, псауныгъэм икъэу­хъумэн фэгъэзэгъэ къулыкъухэм апашъхьэ пшъэ­рылъышхохэр итых. Ко­ронавирусыр къызэутэлIа­гъэхэм зэряIэзэщтхэм япхыгъэ Iофыгъохэр псын­кIэу зэшIохыгъэнхэ фае. Ащ паекIэ нэмыкI узхэм агъэгумэкIхэрэми IэпыIэгъоу аратырэм къыкIырагъэчы хъущтэп. Туризмэм зызэриушъомбгъущтым, зызыгъэпсэфыхэрэм щынэгъончъагъэ яIэным япхыгъэу санавиациер къыз­фа­гъэфедэн, IэпыIэгъу псын­кIэм фэныкъохэр къушъхьэ кластерым къырахы­хэзэ, медицинэ учреждениехэм къынагъэсынхэ алъэкIыщт», — къыIуагъ КъумпIыл Мурат.

Адыгэ Республикэм псауныгъэр къэухъумэгъэнымкIэ и Министерствэ къызэритыгъэмкIэ, санитар авиацием икъулыкъу рес­публикэм зыщыра-гъэу­шъомбгъумэ, сымэджэ хьы­лъэхэу зищыIэ­ныгъэ къагъэнэжьын алъэ­кIыщтыр нахьыбэ хъущт. ВертолеткIэ федеральнэ медицинэ гупчэм нагъэ­сы­рэ сымаджэу игъом Iэ­пы­Iэгъу зэратырэм псаоу къэнэнымкIэ гугъапIэу иIэр нахьыб. Сымаджэр реанимобилькIэ Астрахань нэгъэсыгъэным сы­хьат 12 пэIохьэмэ, вертолеткIэ сы­хьатищрэ ныкъо­рэкIэ ащ быбынхэ алъэкIыщт.

Санитар авиациемкIэ къулыкъур къызфагъэфедэзэ, медицинэ Iофы­шIэхэм гъогухэм атехъу­хьэрэ тхьамыкIагъохэм ахэфыкъухьэхэрэр, шъобж­хэр зытелъ сыма­джэхэр, гу-лъынтфэ узхэм ыкIи нэ­­мыкI уз хьы­лъэхэм агъэ­гумэкIхэу IэпыIэгъу псынкIэ зищыкIагъэхэр федеральнэ гупчэхэм анагъэсынхэу, ахэм къащарагъэ­Iэзэнхэу рахъухьэ.