Мэхьанэ зиIэ мафэр зэрэдунаеу щыхагъэунэфыкIы. Зымылъэгъухэу е макIэу зылъэгъухэу щыIэныгъэм чIыпIэ зэжъу щиуцогъэ цIыфхэм об­ществэм, хабзэм анаIэ зэратырагъэтырэр къагъэлъэгъоным ар епхыгъ.

Хьафизэхэм я Урысые об­ществэ и Адыгэ республикэ организацие 1994-рэ илъэсым къыщегъэжьагъэу Iоф ешIэ. Ащ ипшъэрылъ шъхьаIэр зэ­рамы­лъэгъурэмкIэ сэкъатныгъэ зиIэ цIыфхэр къыхэгъэщыгъэнхэр, ахэр социальнэ ыкIи культурнэ лъэныкъохэм, ясэнэхьат епхыгъэу щыIэныгъэм зыкъыхагъэ­гъо­тэ­нымкIэ IэпыIэгъу афэхъугъэныр, IофшIэным ыкIи спортым фэ­щэгъэнхэр ары.

Хьафизэхэм я Адыгэ респуб­ли­кэ организацие итхьаматэу Нэхэе Руслъан гущыIэгъу тыфэ­хъугъ. Iофтхьэбзэ зэфэшъхьафэу зэхащэхэрэм, къэралыгъо IэпыIэгъум, нэмыкIхэми ар къа­тегущыIагъ.

— Непэ зымылъэгъоу сэ­къат­ныгъэ зиIэ нэбгырэ 1300-рэ фэдиз тиреспубликэ щэпсэу, — къыIуагъ ащ. — Ахэм ащыщэу нэбгырэ 1001-р тиорганизацие хэт, ахэм зэкIэми IэпыIэгъу гъэ­нэфагъэ ящыкIагъ. Сыд фэ­дэрэ Iофыгъо изэшIохынкIи рес­публикэ пащэхэр къыддеIэх. Адыгэ Республикэм и ЛIышъхьэу КъумпIыл Мурат иIэпэчIэгъэнэ фонд къыхихи, 2020-рэ илъэсым къэралыгъо IэпыIэгъоу сомэ 764300-рэ къытитыгъ. Ащ ишIуа­гъэкIэ Iофыгъуабэ зэшIотхыгъ, тимышъолъырхэм ащызэхащэрэ Iофтхьабзэхэм тахэлэжьэн амал къытыгъ, социальнэ мэхьанэ зи­Iэ Iофтхьэбзэ 14 зэхэтщэн тлъэкIыгъ.

Обществэм ипащэ къызэ­рэхигъэщыгъэмкIэ, пандемием ыпкъ къикIыкIэ социальнэ-культурнэ, спорт Iофтхьэбзи 3 ныIэп зыхэлэжьэнхэу хъугъэр. Хьа­физэхэм азыфагу спорт пцэ­жъые­ешэнымкIэ зэнэкъокъу Хан­скэм щызэхащагъ. КъэкIошъун зылъэкIыгъэхэр районхэм къарыкIыгъэх. Зымылъэгъухэу сэкъатныгъэ зиIэхэм яфестивалэу «Салют Победы» зыфиIоу Геленджик щыкIуагъэм Мые­къуапэ иорэдыIо купэу «Русская песня» ыкIи студиеу «Сувенир» зыфиIохэрэм ятIонэрэ чIыпIэр къыщыдахыгъ. Джа къалэм етIани щыкIогъэ фестивалым тиныбжьыкIэхэр хэлэжьагъэх ыкIи сертификатхэр къаратыгъэх.

ТигущыIэгъу къызэрэхигъэ­щыгъэмкIэ, Луи Брайля исис­темэкIэ еджэрэ кIэлэцIыкIухэм яамалхэр къагъэлъэгъонымкIэ зэнэкъокъу шэкIогъум и 13-м тхылъеджапIэм щыкIощт. Коронавирусым зызэриушъомбгъурэм къыхэкIыкIэ нахьыжъхэм азыфагу мыгъэ щызэхащэщтэп.

Iофтхьабзэу «Бэщ фыжьыр»

Чъэпыогъум и 15-р «Бэщ фыжьым» и Дунэе мафэу

агъэ­нэфагъ. Мыр мэфэкIэп, гукъаом итамыгъэу щыт ыкIи зи­псауныгъэ амал зэщыкъуа­гъэхэр къызэрэтхэтхэм обществэм ынаIэ тыридзэным, IэпыIэгъу афэхъуным фытегъэ­псыхьагъ. Мазэм къыкIоцI, шэ­кIогъум и 13-м нэс, мыщ епхыгъэу тыди Iофтхьэбзэ зэфэ­шъхьафхэр щырагъэкIокIых.

Бэщ фыжьыр зынэ зымы­­лъэгъухэрэм ятамыгъэ къоды­еп, мыр яIэмэ-псым, «анэхэм» ачIыпI. ЛъэсрыкIо гъогум е нэмыкI лъэгапIэхэм бэщымкIэ зытеохэкIэ, ащ пыIукIырэ ма­къэмкIэ къапыщылъ зэпэчыжьагъэр, зэлъэпэонхэ алъэкIыщт пкъыгъохэр (гущыIэм пае, чъыг­хэр, унэхэр, пкъэухэр), машэ- хэр зэрэщытхэр къашIэ.

Мы мафэм ипшъэрылъ шъхьа­Iэр дунэе нэфым идэхагъэ зымылъэгъухэрэм яIофыгъохэм об­щественностым ынаIэ тыри­дзэныр ары.

ШъунаIэ тешъудзэным пай

Зымылъэгъурэ цIыфхэм Iо­фыгъоу яIэр макIэп. Анахь шъхьаIэхэр — IофшIапIэ Iухьанхэр, медицинэ ыкIи гъэсэнэгъэ фэIо-фашIэхэр, щыIэныгъэм зы­къыхагъотэныр ыкIи Iэрыфэгъу щыIакIэр. Зипсауныгъэ амалхэр зэщыкъогъэ цIыф пстэуми къэра­лыгъом зызэрэфа­гъа­зэрэр зы: «зи къытфэшъумышI тэ тыхэмытэу». Джа еплъыкIэр урысые хэбзэгъэуцугъэм ылъа­псэ зэрашIыщтым ыуж итых. Къэралыгъо программэу «Iэ­рыфэгъу щыIакI» зыфиIорэр пхыращы. ЗэрамылъэгъурэмкIэ сэкъатныгъэ зиIэхэм атегъэ­псыхьэгъэ инфраструктурэр, транспортыр, къэбархэр, ме­дицинэ фэIо-фашIэхэр аIэкIэ­гъэхьэгъэнхэм епхыгъэ Iофтхьабзэхэр мыщ къыдыхэлъытагъэх. Бюджет зэфэшъхьафхэм къа­хэхыгъэ ахъщэр мыщ пэIохьэ.

Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ къы­зэрэщытаIуагъэмкIэ, ыпшъэкIэ зигугъу къэтшIыгъэ программэм ишIуагъэкIэ тифлопкъыгъохэр къафащэфых. Ащ нэмыкIэу сэкъатныгъэ зиIэхэм я Дунэе мафэ къыдыхэлъытагъэу Адыгэ Республикэм и ЛIышъхьэ ыцIэкIэ а организациехэм офиснэ техникэ араты. Зипсауныгъэ зэщыкъуагъэхэу шIэныгъэм, культу­рэм, гъэсэныгъэм, спортым ыкIи общественнэ щыIакIэм гъэхъагъэхэр ащызышIыхэрэм ахъщэ шIухьафтынхэр илъэс къэс ара­тых. Ар сомэ мин 50 фэдиз.

Мыгъэ ахъщэ шIухьафтын къызэратыщтхэм хьафизэ нэбгырищ ахэфагъ.

Хьафизэхэм я Адыгэ респуб­ликэ организацие итхьаматэу Нэхэе Руслъан тизэдэгущыIэгъу икIэухым къызэрэщыхигъэщы­гъэмкIэ, яорганизацие ыпашъхьэ ит гумэкIыгъохэм ядэгъэзы­жьынкIэ Адыгеим и ЛIышъхьэ къотэгъу къафэхъу, хьафизэхэр щыIэныгъэм хэгъэгъозэгъэнхэм фэгъэзэгъэ къулыкъухэми унашъохэр афешIых. Дунэе нэфым идэхагъэ амылъэгъурэми, зэха­шIэным иамалхэр агъотынхэм ащ ынаIэ тырегъэты.

Iэшъынэ Сусан.