Адыгеим и ЛIышъхьэу КъумпIыл Мурат рес­публикэм ипредприятие пэрытхэм ащы­щэу ООО-у «Комплекс Агро» зыфи­Iо­рэм иIофшIэн зэрэзэхищэрэм, ар зэра­гъэ­кIэжьы­гъэм нэIуасэ зафишIыгъ.

Зигугъу къэтшIыгъэ предприя­тиер пхъэшъхьэ-мышъхьэхэмрэ хэтэрыкIхэмрэ переработкэ шIыгъэнхэм, пхъэшъхьэ-мышъхьэпсхэм якъыдэгъэкIын, хэтэ­рыкIхэм ягъэшIоIун афэгъэзагъ.

Джащ фэдэу мы предприя­тием щыIагъэх Адыгэ Респуб­ликэм мэкъу-мэщымкIэ иминистрэу Къуанэ Анзаур, Адыгэ Республикэм экономикэ хэхъо­ныгъэмрэ сатыумрэкIэ иминист­рэу Шэуджэн Заур, Мыекъуапэ имэрэу Андрей Гетмановыр.

ООО-у «Комплекс Агро» зы­фиIорэм игенеральнэ директорэу Александр Денисовым цеххэм Iоф зэрашIэрэр къа­ригъэлъэгъугъ, технологическэ процессыр зэрэкIорэм къытегущыIагъ. Илъэс 22-рэ хъугъэу предприятием Iоф ешIэ. Мыщ IофшIэпIэ чIыпIэ 300 фэдиз щы­зэхэщагъ, республикэм щы­псэухэрэм лэжьэпкIэ дэгъу ащ къыщагъахъэ.

Илъэс къэс ООО-у «Комплекс Агро» зыфиIорэм продукцие лъэпкъ зэфэшъхьафхэу тонн мин 15 фэдиз къыдегъэкIы. «Бабушкино лукошко», «Фрумка», «Тема» зыфиIорэ товархэу ыкIи нэмыкIхэу мыщ къыщы­дагъэкIхэрэр хэгъэгум ишъолъыр пстэуми, IэкIыб къэралыгъохэм ащыщхэми аIэкIагъахьэх.

Адыгеим и ЛIышъхьэ предприятием хэхъоныгъэ ышIынымкIэ амалэу иIэхэр зэригъэшIагъэх. Компанием ипащэхэм зэ­ралъытэрэмкIэ, производст­вэм зыкъезыгъэIэтыгъэр ар зэрагъэкIэжьыгъэр ары. Джыдэдэм кIэлэцIыкIу шхыныгъохэр къыдэзыгъэкIырэ линиер атIупщыгъ, зы сыхьатым къэмлэнэ 6000 ащ къыдегъэкIы.

Александр Денисовым къызэриIуагъэмкIэ, 2019-рэ илъэсым къыщегъэжьагъэу инвестиционнэ проектыр пхыращы, Италиемрэ Испаниемрэ оборудование дэгъу къащащэфыгъ. Сомэ миллиони 130-рэ хъурэ инвестициехэр проектым халъхьагъэх. Ащ щыщэу сомэ миллион 55-р фэгъэкIотэныгъэ зиIэ инвестиционнэ чIыфэу щыт. Урысые Федерацием и Пра­вительствэ иунашъоу фэгъэ­кIотэныгъэ зиIэ чIыфэхэр мэкъумэщым щылажьэхэрэм ятыгъэным ехьылIагъэм диштэу ар къафыхагъэкIыгъ.

Адыгеим и ЛIышъхьэ оборудованиякIэр зэригъэлъэгъугъ, ООО-у «Комплекс Агро» зыфиIорэм иIофшIэн осэшIу къыритыгъ. Къэралыгъо IэпыIэгъур къызфэбгъэфедэзэ, предпри­нимательствэм зебгъэушъомбгъун зэрэплъэкIыщтымкIэ ащ щысэшIухэр къегъэлъагъох.

«Экономикэм хэхъоныгъэ егъэшIыгъэным тэркIэ мэхьа­нэшхо иI. ЦIыфхэм ящыкIэгъэ товархэр нахьыбэу предприятиехэм къыдагъэкIыхэ тшIоигъу. Ащ дакIоу нэмыкI отраслэхэми хэхъоныгъэ ашIыщт, бэдзэрхэм гъомылэпхъэ лъэпкъ дэгъухэр бэу къарыхьащтых. КIэлэцIыкIу шхыныгъохэмрэ цIыфхэм япсау­ныгъэ игъэпытэнрэ афэгъэхьыгъэ зыхъукIэ, анахьэу ащ мэхьанэшхо иI. Республикэ хэбзэ Iэшъхьэтетхэр ООО-у «Комплекс Агро» зыфиIорэм фэдэ предприятие пэрытхэм IэпыIэгъу афэхъуным сыдигъуи фэхьазырых. Коронавирусым лъэшэу зызыщиушъомбгъугъэ лъэхъаным къэ­ра­лыгъо IэпыIэгъоу ара­тыхэрэм афэдэхэр арагъэгъотыным хэгъэгум ипащэхэр фэ­хьазырых», — къыхигъэщыгъ КъумпIыл Мурат.

Адыгеим и ЛIышъхьэ Адыгэ Республикэм мэкъу-мэщымкIэ и Министерствэ, Адыгэ Рес­пуб­ликэм экономикэ хэхъоныгъэм­рэ сатыумрэкIэ и Минис­терствэ, къалэм япащэхэм пшъэрылъ афишIыгъ бизнес цIыкIумрэ гурытымрэ япроизводствэхэр агъэкIэжьынхэм кIагъэгушIунхэу.

Адыгэ Республикэм и ЛIышъхьэ ипресс-къулыкъу