Шъуипсауныгъэ шъуфэсакъ!
ЩыIэныгъэм къыхэхьэгъэ зэпахырэ узэу коронавирусым зыщытыухъумэныр непэрэ мафэм ишапхъэхэм ащыщ хъугъэ. Ау ащкIэ пшъэдэкIыжьэу ахьырэр пстэуми зэфэдэу къагурыIорэп. Iофыгъом ыгъэгумэкIэу цIыфхэм зафегъазэ медицинэ профилактикэмкIэ Адыгэ республикэ гупчэм иврач шъхьаIэу Мэт Заремэ.
— ЦIыфхэм ящыIэныгъэ зыхьырэ уз мэхъаджэр къышъупымыхьаным фэшI къагъэнэфэгъэ щынэгъончъэ амалхэр зэкIэ зешъухьанхэ фае, — еIо ащ. — Шъуипсауныгъэ шъоры зыIэ илъыр, шъуфэсакъ! Анахь шъхьаIэхэм ащыщ нэгуихъор жъугъэфедэныр ыкIи ар игъом зэблэшъухъуныр. Нахьыбэрэ шъуIэхэр шъутхьакIых, амал зэриIэкIэ шъунэгу шъукIэмыIаб. Метрэ 1,5-рэ зэпэчыжьагъэр адэшъуIыгъыныр зыщышъумыгъэгъупш. ЦIыфыбэ зыщызэрэугъоирэ чIыпIэхэм шъумыкIу.
ТигущыIэгъу анахьэу зыкъызыфигъазэхэрэр уз гъэтIылъыгъэ зиIэ цIыфхэр ары. ЛъыдэкIуаем, жьымыгъотым, шъоущыгъу ыкIи гу-лъынтфэ системэм яузхэм анахьэу ыгъэгумэкIыхэрэр медицинэм иIофышIэхэм игъом якIолIэнхэу щыт. Сыда пIомэ мы купым хахьэхэрэм коронавирусыр къызяутэкIыкIэ хьылъэу апэкIэкIышъ, ищыкIэгъэ Iэзэгъур игъом зэрахьылIэмэ ишIуагъэ къэкIощт. Iэшъынэ Сусан.