«ТекIоныгъэр — лIэужхэм яшIэжь»
ТекIоныгъэм ия 75-рэ илъэс, Мыекъопэ къэзэкъ отделыр илъэси 150-рэ зэрэхъурэм афэгъэхьыгъэу «ТекIоныгъэр — лIэужхэм яшIэжь» зыфиIорэ зэнэкъокъур республикэм щырагъэжьагъ.
— Хэгъэгум итарихъ къэзэкъхэм нахьышIоу ашIэным, ТекIоныгъэм икъыдэхын лIыхъужъныгъэ щызезыхьагъэхэм, унагъом щыщхэр фашист техакIохэм язэхэкъутэн зэрэхэлэжьагъэхэм, ныбжьыкIэхэр шIэжь яIэу пIугъэнхэм, Хэгъэгу зэошхом илъэхъан, заом ыуж щыIэныгъэр зыпкъ игъэуцожьыгъэнымкIэ Советскэ Союзым ицIыфхэм къинэу зэпачыгъэм, заом илIыхъужъхэм лъытэныгъэу афэтшIырэм икъыхэгъэщын, ТекIоныгъэм тызэрэрыгушхорэм афэгъэхьыгъэ тхыгъэхэр зэнэкъокъум къырахьылIэнхэу тяжэ, — къытиIуагъ Мыекъопэ къэзэкъ отделым ипащэу Александр Даниловым.
Хэлэжьэщтхэр, атхыщтыр
Зэнэкъокъум хэлэжьэн зылъэкIыщтхэр купищэу гощыгъэх. Илъэси 5 — 11, илъэс 11 — 18 зыныбжьхэр, илъэс 18-м къехъугъэхэр.
Видео-зэдэгущыIэгъухэу ветеранхэм адашIыгъэхэм, Адыгэ Республикэм щыщхэу Хэгъэгу зэошхом лIыгъэ щызезыхьагъэхэм, заом ыкIыб щыIэхэу Iоф зышIагъэхэм ТекIоныгъэм и Мафэ къызэрагъэблэгъагъэм, шIэныгъэлэжьхэм язэфэхьысыжь тхыгъэхэм, лIыхъужъ ыкIи лэжьэкIо щытхъум япхыгъэ чIыпIэхэм яхьылIэгъэ тхыгъэхэм, музейхэмрэ еджапIэхэмрэ якъэгъэлъэгъонхэм ыкIи янэрылъэгъу IэпыIэгъухэм, фэшъхьафхэм зэнэкъокъур афэгъэхьыгъ.
Усэхэр зытхыхэрэр Iофтхьабзэм чанэу хэлэжьэщтхэу тэгугъэ. Мыекъопэ къэзэкъ отделым фэгъэхьыгъэ усэхэм зэхэщакIохэр къяжэх.
Къэзэкъхэр, урысхэр, адыгэхэр, нэмыкI лъэпкъхэр зэнэкъокъум хэлэжьэнхэу зэхэщакIохэм рагъэблагъэх.
Мыекъопэ къэзэкъ отделым ипащэ игуадзэу Екатерина Загорулько къытиIуагъ зэнэкъокъум хэлажьэхэрэм атхыгъэхэр, видео къэгъэлъэгъонхэр Интернетым инэкIубгъохэм ащытлъэгъун зэрэтлъэкIыщтыр.
Зэнэкъокъум хэлажьэ зышIоигъохэм тыгъэгъазэм и 2-м нэс зэхэщакIохэм макъэ арагъэIун фае. Узыгъэгъозэщт телефоныр: 89627678193.
Зэнэкъокъур онлайн шIыкIэм тетэу зэхащэ. Тызыщыпсэурэ хэгъэгум, шъолъырым ятарихъ нахьышIоу тшIэным, пIуныгъэм имэхьанэ къэIэтыгъэным афэгъэхьыгъэ тхыгъэхэр лъэпкъхэм язэпхыныгъэ фэIорышIэщтэу тэлъытэ.
ЕджакIохэр, тхакIохэр, шIэныгъэлэжьхэр, шIэжьым фэгумэкIыхэрэр темэ хэхыгъэхэмкIэ шъутх, шъуиеплъыкIэхэр къишъуIотыкIых. Шъо шъутхырэр цIыфхэм алъыIэсыщт, тарихъым нэкIубгъо шъхьафэу къыхэнэщтых.
Шъуитхыгъэхэм зэхэщакIохэр къяжэх.