Адыгэ Республикэм и ЛIышъхьэу КъумпIыл Мурат Мыекъуапэ иурамэу Михайловам ыцIэ зыхьырэм щашIырэ кIэлэцIыкIу IыгъыпIэмрэ чIыпIэ 1100-рэ зиIэщт гурыт еджэпIакIэр зыщагъэпсынэу агъэнэфэгъэ площадкэмрэ тыгъуасэ ащыIагъ.

ЧIыпIэ 240-рэ зиIэщт кIэлэцIыкIу IыгъыпIэм ишIын блэкIыгъэ илъэсым рагъэжьагъ. Лъэпкъ проектэу «Демографием» игъэ­цэкIэн къыдыхэлъытэгъэ псэуалъэр 2020-рэ илъэсым тыгъэгъазэм аты­нэу щыт. Учреждением ишIынрэ оборудованием изэгъэгъотынрэ сомэ миллиони 170-рэ апэIуагъэ­хьащт. Мылъкур федеральнэ ыкIи республикэ бюджетхэм къахагъэкIыгъ. КIэлэцIыкIу купхэм азы­ныкъор илъэс 1,5-м ще­гъэжьагъэу 3-м нэс зыныбжьхэм ателъытэгъэщт.

ПсэолъэшI ыкIи нэмыкI IофшIэнхэр зэрэлъыкIуа­тэхэрэр республикэм ипащэ зэригъэлъэгъугъ, ана­хьэу анаIэ зытырагъэтын фэе лъэныкъохэр къыгъэ­нэфагъэх.

— Социальнэ лъэны­къом фытегъэпсыхьэгъэ лъэпкъ проектхэм ягъэцэ­кIэн ары непэ анахьэу тынаIэ зытетыр. КIэлэцIыкIу IыгъыпIэхэм, еджапIэ­хэм, IэзэпIэ, культурнэ ыкIи спорт учреждениехэм яшIын а IофшIэным изэ­фэхьысыжьхэм къакIэ-лъы­кIон фае. Хэхъоныгъэ тшIы­нымкIэ мыщ фэдэ со­циальнэ инфраструктурэ зэтегъэпсыхьагъэ тищыкIагъ, — къыIуагъ КъумпIыл Мурат.

Учреждением ишIын зэ­рэлъыкIуатэрэм епхыгъэу къэгущыIагъэх АР-м гъэсэныгъэмрэ шIэныгъэм­рэкIэ иминистрэу КIэрэщэ Анзаур, Мыекъуапэ имэ- рэу Андрей Гетмановыр, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Марк Сервис» зыфиIорэм игенеральнэ пащэу Цуекъо Мурат.

Непэрэ мафэхэм ехъу­лIэу къатитIу хъурэ Iыгъы­пIэм ыпкъ агъэуцугъах, ащ ищыкIэгъэ коммуникациехэр ращэлIагъэх, нэмыкI IофшIэнхэр зэшIуахыгъэх, мыщ къыпэIулъ чIыпIэм изэтегъэпсыхьани аухы.

Адыгеим и ЛIышъхьэ мы район цIыкIум гурыт еджа­пIэр зыщашIыщтым щыIагъ. Ащ чIыпIэ 1100-рэ иIэщт, лъэпкъ проектэу «Гъэсэныгъэм» къыдыхэ­лъыта­гъэу щыт. Учреждением ишIын 2021 — 2022-рэ илъэсхэм рагъэжьэнэу агъэ­нафэ.