Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIоу 2020-рэ илъэсым телъытагъэр Адыгеим щыгъэцэкIагъэ зэрэхъурэм фэгъэзэгъэ IофшIэкIо купым изэхэсыгъо «Адыгеяавтодорым» щыкIуагъ. Ар зэрищагъ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевым. Пэублэм «Адыгеяавтодорым» ипащэу Алексей Корешкиным къызэриIуагъэмкIэ, УФ-м и Правительствэ иунашъо къыдыхэлъытагъэу шъолъыр проектым хахьэу 2021-рэ илъэсым гъогухэм ягъэ­цэкIэжьынкIэ федеральнэ бюджетым щыщ ахъщэу сомэ миллиони 165,5-р Адыгеим къыфатIупщыгъ. МыщкIэ автомобиль гъогу километрэ 15,6-рэ зи­кIыхьагъэр агъэцэкIэжьын гухэлъ яI.

Сомэ миллион 73,7-рэ зытефэщт автомобиль гъогу километри 8,4-мэ ягъэцэкIэжьынкIэ чIыпIи 6 агъэнэфагъ. Зэнэкъокъухэр зэхащагъэх, IофшIэнхэр мы илъэсым тыгъэгъазэм и 10-м нэс аухынхэу щыт. Къихьащт илъэсым джыри псолъэ 32-рэ агъэцэкIэжьын гухэлъ яI. ЗэкIэмкIи 2021-рэ илъэсым объект 38-мэ IофшIэнхэр арашIылIэнхэу агъэ­нафэ.

Мыекъопэ къэлэ администрацием псэупIэ коммунальнэ хъызмэтымкIэ ыкIи зэтегъэпсыхьэгъэнымкIэ и ГъэIорышIапIэ ипащэу Оксана Алтуховам къызэриIуа­гъэмкIэ, 2021-рэ илъэсым телъытэгъэ шъолъыр проектым хахьэу, сомэ миллион 95,2-рэ ыкIи сомэ миллиони 106,8-рэ зытефэрэ зэзэгъыныгъитIу адашIыгъ. Апэрэ едзыгъом къыдыхэлъытагъэу гъогу чIыпIи 10-м щыщэу 9-р агъэцэкIэжьыгъ.

ЯтIонэрэ едзыгъом хахьэу Мыекъуапэ игъогу участкиплIымкIэ зэзэгъыныгъэм кIэтхагъэх. Мы уахътэм Мыекъуа­пэ иурамэу Подлесноим гъэцэкIэжьынхэр щырагъэжьагъэх. Зэзэгъыныгъэм къызэрэдилъытэу IофшIэнхэр тыгъэгъа­зэм ыкIэм нэс къаухынхэу щыт.

Яблоновскэ агломерациемкIэ урамитIу — Титовым ыкIи Широкэм гъэкIэжьынхэр арашIылIэнхэу агъэнафэ. Мы уахътэм объектитIури ащ фагъэхьазырых. О. Алтуховам къызэриIуагъэмкIэ, лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэм хахьэу агъэнэфэгъэ проектхэмкIэ IофшIэныр Мыекъуапэ мы мафэхэм щаухыгъ. Гъогу зэхэкIыпIэ 19 агъэтхъыгъ, гъогу участки 3-р занкIэ ашIыжьыгъ, урамхэу Пионерскэм, Хьахъу­ратэм ыцIэ зыхьырэм ыкIи Пролетарскэм гъогу тамыгъи 169-рэ атырагъэуцуагъэх.

Проектэу «ТекIоныгъэм иурам» зыфиIорэм хахьэу гъожь-фыжьышъо зэ­хэлъкIэ участкищыр агъэтхъыщт ыкIи ахэр къашIыхьащтых. Ащ нэмыкIэу зэзэгъыныгъэу ашIыгъэм хахьэу гъогур къэзыгъэнэфырэ пкъэоу урамэу Победэм тетым илъ остыгъэхэр зэблахъу­щтых. Джащ фэдэу Маим и 9-м ыцIэ зыхьырэ урамым асфальт тыралъхьагъ.

Зэхэсыгъом къызэрэщаIуагъэмкIэ, хэбзэгъэуцугъэм къыдыхэлъытагъэу IофшIэнхэр рагъэжьэнхэм ыпэ проектыр штэгъэн ыкIи схемэр гъэнэфэгъэн фае. Валерий Картамышевым къызэрэкIигъэ­тхъыгъэмкIэ, гъогу тамыгъэхэм ягъэтхъынкIэ шIокI имыIэу Адыгэ къэралыгъо автоинспекцием зэзэгъыныгъэхэр дашIынхэ фае.

«Адыгеяавтодорым» иIофышIэ къызэриIуагъэмкIэ, километрэ 1318-рэ зи­кIыхьэгъэ шъолъыр мэхьанэ зиIэ автомобиль участкэ 30-р ауплъэкIугъ ыкIи щыкIагъэхэр дагъэзыжьыгъэх. Мы уахътэм ехъулIэу ахэмкIэ зэфэхьысыжьхэр ашIых.

Шъолъыр гъогухэр щынэгъончъэу щытынхэмкIэ гупчэм ипащэу Аргун Даур къызэриIуагъэмкIэ, гъогурыкIоным ишапхъэхэр зыукъохэрэр къыхэгъэщыгъэнхэмкIэ мы илъэсым камерэ 52-рэ агъэуцунэу пшъэрылъ яI. Ахэм ащыщэу 32-р федеральнэ, 17-р чIыпIэ ыкIи 3-р шъолъыр мэхьанэ зиIэ гъогух. Мы уахътэм ехъулIэу шъолъыр ыкIи чIыпIэ сетьхэм камерэ 20 фэдиз ащагъэуцугъ, джащ фэдэу автомобиль гъогоу М-4 «Дон» зыфиIорэм камери 7 тырагъэуцонэу щыт.

Федеральнэ мэхьанэ зиIэ гъогухэм камерэ 25-рэ ащагъэуцунхэу ары. Тыгъэгъазэм и 1-м ехъулIэу камерэ 52-мэ Iоф ашIэнэу рагъэжьэщт.

Аргун Даур къызэриIуагъэмкIэ, Iоф­шIэнэу агъэцэкIагъэхэм сомэ миллион 11,4-рэ къырагъэлыгъ. А мылъкумкIэ автомобиль гъогоу Красногвардейское – Улап – Зарево зыфиIорэм камерэхэр тырагъэуцонхэу агъэнэфагъ, джащ фэдэу Мыекъуапэ идэкIыгъо жъы хъугъэ комплексищэу тетхэр зэблахъущтых. Iоф­шIэнхэр тыгъэгъазэм и 10-м нэс зэшIуа­хынхэу агъэнафэ.

КIАРЭ Фатим.