ЗекIуакIэм елъытыгъэр макIэп

НыбжьыкIэхэр зыхэфэрэ гъогу хъугъэ-шIагъэхэр нахь макIэ шIыгъэнхэм фэгъэхьыгъэ зэIукIэгъухэр Адыгеим и Къэралыгъо автоинспекцие бэрэ зэхещэх.

Гъогум щынэгъончъэу узэрэщызекIощт шIыкIэхэр къазыщафаIотэгъэ зэIукIэгъу бэмышIэу Мыекъопэ къэрэлагъо технологическэ университетым щыкIуагъ. Ащ хэлэжьагъэх Урысыем гъогурыкIоныр щынэгъончъэнымкIэ и Къэралыгъо автоинспекцие и ГъэIорышIапIэу АР-м щыIэм ипащэ игуадзэу, полицием иполковникэу Мамыекъо Казбек, гъогу инспекцием икъэлэ отдел ипащэ игуадзэу, подполковникэу Александр Выходцевыр, апшъэрэ еджапIэм ипроректорэу БрантIэ Мурат.

НыбжьыкIэхэм гъогум зекIокIэ-шIыкIэу щызэрахьэхэрэм бэ зэрелъытыгъэр къараIуагъ, яныбджэгъухэм хэукъо­ныгъэу ашIыхэрэр тапэкIэ ежьхэм къызыхамыгъэ­фэжьынхэу къяджагъэх.

Iофтхьабзэм ипэублэ гъогу-транспорт хъугъэ-шIагъэхэм ушъхьагъоу афэхъухэрэр ыкIи ахэм къакIакIорэр къизыIотыкIырэ видеофильмэ къафагъэлъэгъуагъ. Нэужым ныбжьыкIэхэр зыхэфэгъэ авариехэу зэплъы­гъэхэр къызхэкIыгъэ ушъхьагъухэм, зэрарэу къафихьыгъэм, пчъагъэхэм къэзэрэугъоигъэхэр атегущыIагъэх.

ЛъэсрыкIохэм апае щыIэ шэпхъэ анахь шъхьаIэхэр зэрамышIэхэрэм къыхэкIыкIэ тхьамыкIагъоу къэхъун ылъэкIыщтхэр студентхэм къафаIотагъ. Пчъагъэхэм къызэрагъэлъагъорэмкIэ, нахьыбэрэм ныбжьыкIэхэр ары нэфрыгъозэ плъыжьыр къэнэфызэ гъогум телъа­дэхэрэр, ащ дакIоу телефонхэм тхьакIумэ Iулъхэр адагъэфедэхэзэ.

ГъогурыкIоным ишапхъэхэр шIокI имыIэу ныбжьыкIэхэм агъэцэкIэнхэу, хэбзэукъоныгъэхэр зэрамыхьанхэу, ялэгъухэм дэеу къахафэхэрэр дагъэзыжьынхэу Мамыекъо Казбек закъыфигъэзагъ.

Зымылъэгъухэрэм апай

Адыгеим и Къэралыгъо автоинспекцие икъулыкъушIэхэм «Хьафизэхэм я Урысые обществ» зыфиIорэм и Адыгэ шъолъыр къутамэ илIыкIохэр ягъусэхэу Iофтхьабзэу «Бэщ фыжьыр» рагъэкIокIыгъ.

БэмышIэу «Бэщ фыжьым» и Дунэе мафэу хагъэу­нэфыкIыгъэм къыдыхэлъытагъэу, пэшIорыгъэшъ Iоф­тхьабзэр дэеу зылъэгъухэрэм апае инспекцием зэхищагъ. Хьафизэхэм ыкIи дэеу зылъэгъухэрэм щынэгъончъэу гъогур зэпачыным, ащкIэ Iофыгъоу къэуцу­хэрэм атегущыIагъэх.

Ащ епхыгъэ зэдэгущыIэгъухэр водительхэм адашIыгъэх, фэдэ купым хэхьэрэ лъэсрыкIохэм мы мафэм имызакъоу, сыдигъокIи нахь афэсакъынхэу араIуагъ. «Бэщ фыжьым» имэхьанэр — къызэрыкIо тамыгъэу мыр щыт, IэпыIэгъу зищыкIэгъэ ыкIи хэушъхьафы­кIы­гъэу анаIэ зытетын фэе цIыфхэр къыд­готхэу зэрэпсэухэрэм обществэм ащ ынаIэ тырырегъа­дзэ.

Зымылъэгъурэ цIыфхэмкIэ ар Iэрыфэгъоу щыт, анэхэм ачIыпI, гъогум теохэзэ зырыкIохэкIэ макъэу пыIукIырэмкIэ къяшIэкIыгъэм щыхъурэр зэхахы. Iофтхьабзэм икIэух гъогурыкIоным ишапхъэхэр агу къэзгъэкIыжьырэ тхьапэхэр водительхэм аратыгъэх, дэеу зылъэгъухэрэм — нэфынэр къэзытырэ пкъыгъо­хэр.

Зэрафэразэр къыриIотыкIыгъ

ГъогурыкIоныр щынэгъончъэнымкIэ автоинспекцием итхын-ушэтын отделэу Мыекъуапэ щыIэм иIофышIэхэм зэрафэразэр къизыIотыкIырэ тхыгъэ зефэныр езыгъэжьэгъэкIэ бзылъфыгъэм къыригъэхьыгъ.

Ащ къызэриIуагъэмкIэ, МРЭО N 1-м иIофышIэхэм ясэнэхьат хэшIыкI куу фыряI, къяолIэрэ цIыфхэм екIолIэкIэ гъэнэфагъэ къафагъоты, япшъэрылъхэр дэгъоу агъэцакIэх.

Письмэр къэзытхыгъэм дэгъоу къыгурыIуагъ еджа­кIохэр автоеджапIэхэм зэрагъэхьазырхэрэм изытет пхъашэу ауплъэкIу зэрэхъугъэр. Ушэтынхэм ятын иедзыгъо пэпчъ ар гумэкIыгъо ин хэтыгъ. Ащ полицейскэхэм гу зылъатэм, нахь зигъэIэсэнэу, ынаIэ упчIэхэм атыридзэнэу, шIэныгъэу зэригъэгъотыгъэр ыгъэфедэнэу къыраIуагъ.

Нэужым ушэтыным иедзыгъохэр зэкIэ дэгъоу бзылъфыгъэм зэпичыгъэх. Хэгъэгу кIоцI IофхэмкIэ къулыкъухэм ямэхьанэ зыкъезыгъэIэтырэр мыщ фэдэ IофышIэхэр полицием зэрэхэтхэр ары ыкIи ахэм гущыIэ фабэхэр яфэшъуашэх.

КъулыкъушIэхэм псауныгъэ пытэ яIэнэу, яIофшIэн гъэхъагъэхэр щашIынхэу тхыгъэм икIэух къыщеIо.

Хъулъфыгъэр сымэджэщым нагъэсыгъ

Ростов хэкум щыщ бзылъфыгъэм рэзэныгъэ тхыгъэ Адыгэ Республикэм хэгъэгу кIоцI IофхэмкIэ и Министерствэ къыфигъэхьыгъ. Гъогу-патруль къулыкъум иIофышIэхэу Къанэкъо Азэмат, Шыумэфэ Залим ыкIи Нэфышъ Мурат зэрафэразэр ащ къыщеIо.

Мыекъопэ районым изекIо шъолъырхэм ащыщ къу­лыкъур щахьызэ, машинэ горэ къакIэрыхьагъ.

— Гузэжъогъу хэт хъулъфыгъэу машинэм къикIыгъэм къытиIуагъ къыдис нэмыкI хъулъфыгъэу зы­ныбжь нахь хэкIотагъэм ипсауныгъэ къызэрэзэIыхьагъэр, — къеIуатэ Къанэкъо Азэмат. — ТыкIэрыхьи зэтэуплъэкIум, медицинэ IэпыIэгъу зэрищыкIагъэр къыдгурыIуагъ.

Полицейскэхэм дежурнэ частым макъэ рагъэIуи, амал зэриIэкIэ псынкIэу автомобилыр район гупчэ сымэджэщым нэс агъэкIотагъ. Республикэм къэкIогъэ хьакIэхэу IэпыIэгъу зищыкIагъэу закъыфэзгъэзагъэхэм ялъэIу зэшIуахыным фэшI мэкъэгъэIур хагъани, машинабэ зытет гъогум пхыращыгъ. Медикхэм IэпыIэгъу афэхъухэзэ, хъулъфыгъэр сымэджэщым чIащагъ.

— Адыгеим хэгъэгу кIоцI IофхэмкIэ икъулыкъухэм ащ фэдэ гукIэгъу зыхэлъхэр зэрахэтхэр сигуапэ ыкIи лъэшэу тызэрафэразэмкIэ гущыIэ фабэхэр афэсэгъэ­хьых, — къыщеIо тхыгъэм.

НэкIубгъор зыгъэхьазырыгъэр Iэшъынэ Сусанн.