Кощхьэблэ еджапIэр анахь дэгъу
Адыгэ Республикэм «ИскусствэхэмкIэ кIэлэцIыкIу еджэпIэ анахь дэгъу» зыфиIорэр яплIэнэрэу щыкIуагъ.
2020-рэ илъэсым республикэм икIэлэцIыкIу еджэпIи 4 зэнэкъокъум хэлэжьагъ.
— Адыгэ Республикэм имызакъоу, Урысыем, дунаим яфестивальхэм, щытхъуцIэхэр къащызыхьыгъэ еджапIэхэр республикэм искусствэхэмкIэ икIэлэцIыкIу зэнэкъокъу щызэIукIагъэх, — къытиIуагъ Адыгеим культурэмкIэ изаслуженнэ IофышIэу Шэуджэн Бэлэ. — ШIэныгъэм, пIуныгъэм афэгъэхьыгъэ зэнэкъокъум кIэлэеджакIохэм яIэпэIэсэныгъэ къыщагъэлъэгъуагъ.
Искусствэр куоу зэрагъэшIэным фэшI кIэу къежьэгъэ техникэр, тарихъ къэбархэр еджакIохэм къызыфагъэфедагъэх.
Кощхьаблэ искусствэхэмкIэ икIэлэцIыкIу еджапIэу Хьагъэудж Мыхьамэт ыцIэ зыхьырэм апэрэ чIыпIэр фагъэшъошагъ, еджапIэм ипащэр Зэхъохъу Нурыет.
— Апэрэ чIыпIэр къызэрэдэтхыгъэм тигъэгушIуагъ, — къытиIуагъ Зэхъохъу Нурыет. — Адыгэ Республикэм ыцIэкIэ хэгъэгум икIэух зэнэкъокъу тыхэлэ-жьэщт.
Адыгэ Республикэм ихудожественнэ кIэлэцIыкIу еджапIэ, пащэр Ирина Бредихина, искусствэхэмкIэ Инэм кIэлэцIыкIу еджапIэм, пащэр Людмила Шумная, республикэ зэнэкъокъум шIэныгъэ куухэр къыщагъэлъэгъуагъэх, Дипломхэр афагъэшъошагъэх.
Адыгэ Республикэм и Къэралыгъо программэу «Культурэм ихэхъоныгъэхэр» зыфиIорэр 2018 — 2022-рэ илъэсхэм ателъытагъ. Республикэм культурэмкIэ и Министерствэрэ искусствэхэмкIэ кIэлэцIыкIу еджапIэу N 1-мрэ зэхащэгъэ зэнэкъокъум икIэуххэр зэфахьысыжьыгъэх.
Республикэм искусствэхэмкIэ икIэлэцIыкIу еджэпIэ анахь дэгъур къызэрэхахыгъэм дакIоу, IофшIэкIэшIум иамалхэр къызэрагъотыщтхэм зэхэщакIохэр зэдегупшысагъэх. Лъэхъаным диштэу искусствэ лъагэр зэрэлъыкIуатэрэр республикэ зэIукIэгъум къыщыхагъэщыгъ.