Экодиктант атхыщт
Бжъэ къыдэгъэкIыжьыгъэм футболкэ тхьапша хэпшIыкIын плъэкIыщтыр? Мэзхэм машIом закъыщиштэным цIыфыр ушъхьагъу шъхьаIэ сыда зыкIафэхъурэр? Пыдзафэхэр зэхэшыпыкIыгъэхэу ратэкъу зыхъукIэ сыдэущтэу тыкъэзыуцухьэрэ дунаим ишIуагъэ къекIыщта? Урысые экологие диктантыр зытхырэм мы упчIэхэм яджэуапхэр ыгъотыжьыщт.
ШэкIогъум и 15 ыкIи и 16-м тикъэралыгъо экодиктант щатхыщт. Экологием ылъэныкъокIэ шIэныгъэу аIэкIэлъхэр кIэлэеджакIохэм, студентхэм, федеральнэ ыкIи шъолъыр хэбзэ къулыкъухэм, нэмыкIхэми аушэтыщт. ПстэумкIи миллионитIум ехъу Iофтхьабзэм хэлэжьэнэу агъэнафэ. Диктантыр зытхыгъэхэм зэкIэми сертификатхэр аратыщтых, текIоныгъэ къыдэзыхыгъэхэм щытхъу тхылъхэмрэ шIухьафтынхэмрэ къафагъэшъошэщт.
Порталэу «экодиктант.рус» зыфиIорэм онлайн шIыкIэм тетэу ар щыптхын плъэкIыщт. Чъэпыогъу мазэм ыкIэм къыщыублагъэу ащ Iоф ешIэ. ШIэныгъэ къызхэпхын плъэкIыщт видеохэр ащ итыщтых. Ахэм яшIуагъэкIэ экодиктантым зыфэбгъэхьазырын плъэкIыщт.
Iофтхьабзэм изэхэщакIохэм ащыщэу Алексей Майоровым къызэрэхигъэщыгъэмкIэ, тикъэралыгъо щыпсэурэ цIыфхэм тыкъэзыуцухьэрэ дунаим анаIэ тырадзэным диктантыр фэIорышIэ.
Экологэу, кIэщакIохэм ащыщэу Наталья Соколовам къызэриIуагъэмкIэ, мыщ изэхэщакIохэм чIыпIэхэм чанэу Iоф ащашIэ.
Федеральнэ министерствипшIымэ яIэпыIэгъукIэ проектыр рагъэкIокIы. Экодиктантым культурэм, шIэныгъэм, нэмыкI лъэныкъохэм ащыцIэрыIохэу Олег Газмановыр, Никас Сафроновыр, Лео Бокерия, Оксана Федоровар, Елена Денисова-Радзинскаяр ыкIи Владимир Маториныр хэлэжьэнхэу агъэнафэ.
Абрэдж Сэтэнай.