Къызщатыщтыгъэ пIалъэр къэнэжьынэу
НахьыпэкIэ цIыфым ипенсие къыIэкIэзгъахьэрэ банкыр зызэблихъукIэ, пIалъэу ар къызщыкIощтыгъэр зэхъокIыгъэ хъущтыгъэ. Джы ар зытетым тетэу къэнэжьынэу УФ-м IофшIэнымкIэ и Министерствэ унашъо ышIыгъ.
Адыгеим пенсионер мини 128-рэ фэдиз ис. Ащ ипроцент 57-мэ япенсие банкхэм къаIакIагъахьэ, адрэхэм почтэм е пенсиер цIыфхэм афэзыхьырэ организациехэм яфэIо-фашIэхэр агъэфедэх.
Нахьыпэрэм фэдэу, пенсиер къыIэкIэзгъэхьащтыр нэбгырэ пэпчъ зэблихъун фит. Ащ пае ПенсиехэмкIэ фондым лъэIу тхылъ ритын фае. Ар фондым икъулыкъоу цIыфхэм Iоф адэзышIэрэм екIуалIэмэ Iахыщт, ау мы уахътэм коронавирусым зызэриушъомбгъурэм ыпкъ къикIыкIэ, пэшIорыгъэшъэу заригъэтхын фае.
Джащ фэдэу лъэIу тхылъыр почтэмкIэ МФЦ-м фэбгъахьымэ хъущт, фондым иинтернет нэкIубгъо щыгъэпсыгъэ «унэе кабинетым» е къэралыгъо фэIо-фашIэхэм япортал ащыптыни плъэкIыщт.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу.