Хьасанэкъо Мурат: «ПсэупIэ-коммунальнэ хъызмэтым епхыгъэ Iофыгъохэр Адыгэ Республикэм щагъэцэкIэ зэпытых, пэшIорыгъэшъэуи адэлажьэх»
ШэкIогъу мазэм и 3-м, партиеу «Единэ Россием» пшъэрылъ къызэрэфишIыгъэм тетэу, Къэралыгъо Думэм физическэ культурэмкIэ, спортымкIэ, зекIонымкIэ ыкIи ныбжьыкIэ IофхэмкIэ и Комитет хэтэу Хьасанэкъо Мурат зэпэчыжьэ шIыкIэм тетэу цIыфхэм гущыIэгъу афэхъугъ.
Skype-р, Viber-р, WhatsApp-р ыгъэфедэхэзэ Урысые политическэ партиеу «Единэ Россием» и Тхьаматэу Дмитрий Медведевым Адыгэ РеспубликэмкIэ ишъолъыр общественнэ егъэблэгъапIэ псэупIэ-коммунальнэ хъызмэтым епхыгъэ Iофыгъохэр къызщаIэтыгъэхэ зэдэгущыIэгъур щыкIуагъ.
Щагухэм язэтегъэпсыхьан, унэм къыпэIут гъэфэбапIэм гъэцэкIэжьынхэр щышIыгъэнхэм, кIэлэцIыкIу джэгупIэм игъэпсын афэгъэхьыгъэ гумэкIыгъохэр цIыфхэм къаIэтыгъэх.
Республикэм икъэлэ шъхьаIэ фэтэрыбэу зэхэт унэу дэтхэм ащыщ илIыкIоу ащ щыпсэухэрэм къызхагъэкIыгъэм лъэIу иIагъ ущыпсэу хъунэу щыт псэуалъэр узщыпсэу мыхъущтэу зэрагъэпсыгъэм хэбзэ лъапсэ иIэмэ зэгъэшIэгъэнэу. Фэтэрыр сатыум тегъэпсыхьагъэ зыхъукIэ, унэ чIэхьапIэм иуцышъо теплъэ зэрэчIинэщтыр бзылъфыгъэм къыIуагъ.
Псэуалъэм истатус зэблэхъугъэным лъапсэу иIэр зэгъэшIэгъэным тегъэпсыхьэгъэ уплъэкIунхэр зэхащэнхэм Хьасанэкъо Мурат икIэщакIо хъугъэ.
Тишъолъыр ирайон гупчэхэм ащыщ щыпсэухэрэм кIэлэцIыкIу джэгупIэм игъэпсынрэ гъэфэбапIэм изэтегъэпсыхьажьынрэ афэгъэхьыгъэ Iофыгъохэр къаIэтыгъэх. Ахэр зэшIохыгъэнхэм пае гъэцэкIэкIо хабзэм икъулыкъухэу мы Iофыгъохэм афэгъэзагъэхэмрэ чIыпIэ зыгъэIорышIэжьын къулыкъухэмрэ тхылъхэр афигъэхьыгъэх.
— Непэрэ егъэблэгъэным къызэригъэлъэгъуагъэмкIэ, псэупIэ-коммунальнэ хъызмэтым епхыгъэ Iофыгъохэр Адыгэ Республикэм щагъэцэкIэ зэпытых, пэшIорыгъэшъэуи адэлажьэх партийнэ проектхэм ягъэцэкIэн Адыгеим и ЛIышъхьэу, «Единэ Россием» ишъолъыр къутамэ исекретарэу КъумпIыл Мурат пэщэныгъэ дызэрихьэзэ шIуагъэ къытэу зэрэзэшIуахырэм ихьатыркIэ. Ау щыIэх гумэкIыгъо зырызхэу хабзэм ылъэныкъокIэ сэ сиIэпыIэгъуи зыщязгъэгъотын фаехэр ыкIи ахэр зэшIосхынхэм сыпылъыщт, — къыIуагъ хэбзэгъэуцум.
Анахьэу къыхэгъэщыгъэн фае мы Iофтхьабзэр Адыгэ Республикэм игъэцэкIэкIо хабзэ икъулыкъухэу Iофыгъоу зэдэгущыIэгъур зыфэгъэхьыгъэм фэгъэзагъэхэр чанэу къыхэлажьэхэзэ зэхэщагъэ зэрэхъугъэр.
Къандор Анзор, УФ-м и ФЗ и Къэралыгъо Думэ идепутат иIэпыIэгъу.