Адыгеим игуфакIохэу Урысые Iофтхьабзэу «Мы вместе» зыфиIорэм изэхэщэн зиIахьышIу хэзышIыхьагъэхэу Урысыем и Президент имедаль къызыфагъэшъошагъэхэм лъэпкъхэм языкIыныгъэ и Мафэ ехъулIэу республикэм и Къэралыгъо филармоние щафэгушIуагъэх. Зэпахырэ узым зызыщиушъомбгъугъэ лъэхъаным республикэм исхэм IэпыIэгъушIу язытыгъэ гуфакIохэр ары Президентым итын зыфагъэшъошагъэхэр.

Iофтхьабзэм хэлажьэхэрэм шIуфэс къарихи, Адыгеим и ЛIышъхьэу КъумпIыл Мурат лъэпкъхэм языкIыныгъэ и МафэкIэ къафэгушIуагъ.

«Медальхэр ятыжьыгъэнымрэ мэфэкIымрэ аукъодыеу зэтедгъэфагъэ­хэп. Тихэгъэгу щыпсэурэ лъэпкъхэм языкIыныгъэ, патриотизмэм, зэдэIэпыIэжьыныгъэм ятамыгъэу ар щыт», — къыIуагъ КъумпIыл Мурат.

Республикэм и ЛIышъхьэ зэрэхигъэ­унэфыкIыгъэмкIэ, Адыгеим игуфэкIо 1000-м ехъу Урысые Iофтхьабзэм хэлэжьагъ. Шъолъыр волонтер штабым хэтыгъэх республикэм игуфэкIо объединениехэр, партиеу «Единэ Россием» иреспубликэ къутамэрэ Урысые народнэ фронтым ишъолъыр къутамэрэ ягуфакIохэр, апшъэрэ еджапIэхэм ачIэс волонтерхэр, предпринимательхэр, Адыгеим иорганизацие зэфэшъхьафхэм ялIыкIохэр.

«Шъо ныбжькIи шъузэтефэрэп, сэнэхьат зэфэшъхьафхэми шъуарэлажьэ, ау шъузэзыпхырэр нэмыкIхэм IэпыIэгъу шъуафэхъу зэрэшъушIои­гъор ары. Урысыем и Президентэу Вла­димир Путиным зэриIуагъэу, «тызэгъусэу» зыфиIорэ гущыIэр тиобществэкIи, хэгъэгумкIи гугъапIэм итамыгъэу хъугъэ. ЧIыпIэ къин къызэрэрамынэщтхэр цIыфхэм ашIэщтыгъ», — хигъэунэфыкIыгъ КъумпIыл Мурат.

Зыныбжь хэкIотагъэхэм Iэзэгъу уцхэмрэ гъомылапхъэхэмрэ къафэзыщэфыгъэ, аIэкIэзыгъэхьэгъэ пстэуми республикэм ипащэ тхьашъуегъэпсэу ариIуагъ.

Урысые политикэ партиеу «Единэ Россием» и Адыгэ шъо­лъыр къутами, Урысые общественнэ движениеу «Волонтеры-медики» зыфиIорэми ащкIэ бэ зэрашIагъэр хигъэунэфы­кIыгъ. Ахэм яшIуагъэкIэ Адыгеим ис нэбгырэ мин 70-м ехъумэ гъомылапхъэхэр зэрылъ Iалъмэкъхэр пкIэ хэмылъэу аратыгъэх. Джащ фэдэу КъумпIыл Мурат ТекIоныгъэм и Мафэ ихэгъэунэфыкIынкIэ IэпыIэгъу къафэхъугъэхэм, Хэгъэгу зэошхом иветеранхэм зынаIэ атезыгъэтыхэрэм зэрафэразэр къыIуагъ. Iофтхьабзэу «Мы вместе» зыфиIорэр зырагъэжьагъэм къыщегъэжьагъэу «лъэныкъо плъы­жьым» щылэжьэхэрэ волонтер-медик 52-мэ тхьашъуегъэ­псэушхо ариIуагъ.

«Псауныгъэм икъэухъумэн­кIэ зишIуагъэ къэзыгъэкIогъэ, чIыпIэ хьылъэ ифагъэхэм Iэпы­Iэгъу афэхъугъэ бизнесменхэм, Урысые Федерацием ФедерациемкIэ и Совет хэтхэу Хъопсэрыкъо Мурат, Олег Селезневым, Урысые Федерацием и Къэралыгъо Думэ идепутатхэу Владислав Резник, Хьасанэкъо Мурат, респуб­ликэм идепутатхэм лъэшэу сафэраз», — къыщиIуагъ зэIукIэгъум КъумпIыл Мурат.

Урысые Iофтхьабзэу «Мы вместе» зыфиIорэм изэхэщэн зиIахь хэзышIыхьагъэхэу Урысые Федерацием и Президент имедаль къызыфагъэшъошагъэхэм Адыгеим и ЛIышъхьэ ахэр аритыжьыгъэх. Пандемием илъэ­хъан цIыфхэм IэпыIэгъу ягъэгъотыгъэ­нымкIэ республикэм иволонтер гупчэ иIофшIэн иIахь зэрэхишIыхьагъэм фэшI Урысые политикэ партиеу «Единэ Россием» ирэзэныгъэ тхылъ гуфа­кIохэм ядвижение иресурснэ гупчэу «Волонтеры Адыгеи» зыфиIорэм къыфигъэшъошагъ.

Регион штабэу «Мы вместе» зыфиIорэм ипащэу Ованес Шекерьянц, мы организацием хэт­хэу Светлана Сабельниковам, Игорь Жихаревым республикэм игуфакIохэм ацIэкIэ тхьашъуегъэпсэу къараIуагъ, хэбзэ къулыкъухэм ягъусэхэу гуфакIохэм ядвижение тапэкIи республикэм зызэрэщырагъэушъомбгъущтыр къыхагъэщыгъ.

ЗэIукIэгъум икIэух респуб­ликэм ипащэхэм тапэкIи регион волонтер организациехэм яIоф­шIэн шIуагъэ къытэу зэхащэнымкIэ ищыкIэгъэ амалхэр зэрэзэрахьащтхэр Адыгеим и ЛIышъхьэ хигъэунэфыкIыгъ.

«Тызэгъусэмэ ары ныIэп къи­ныгъохэр зэпытчынхэ, те­кIоныгъэхэр тшIын зытлъэкIыщтыр. Зэпахырэ узымкIэ Iоф­хэм язытет зэрэхьылъэу къэ­нэжьы, шъуиIэпыIэгъу джыри лъэшэу фэныкъох. Шъори, нэмыкI гуфакIохэми тицыхьэ тапэкIи къышъутелъын зэрэтлъэ­кIыщтыр къызгурыIуагъ», — къыхигъэщыгъ КъумпIыл Мурат.

Адыгэ Республикэм и ЛIышъхьэ ипресс-къулыкъу