Урысые Федерацием и Федеральнэ ЗэIукIэ ФедерациемкIэ и Совет и Тхьаматэ ителеграмм
Сихэгъэгогъу лъапIэхэр! Лъэпкъхэм языкIыныгъэ и Мафэ фэшI сыгу къыздеIэу сышъуфэгушIо!
ШэкIогъум и 4-р патриотическэ мэхьанэ зиIэ хъугъэ-шIэгъэшхокIэ тихэгъэгу итарихъ хэхьагъ. Илъэс 400-кIэ узэкIэIэбэжьмэ, Кузьма Мининымрэ Дмитрий Пожарскэмрэ зипэщэгъэхэ цIыф жъугъэхэм Москва шъхьафит ашIыжьыгъагъ, Польшэм итехакIохэм ар къатырахыжьыгъагъ. Урысые Федерацием хэхъоныгъэ ышIынымкIэ а текIоныгъэм мэхьанэшхо иIагъ. Лъэпкъ зэфэшъхьафхэм къахэкIыгъэхэу дин зэфэмыдэхэр зылэжьыщтыгъэхэм я Хэгъэгу икъэухъумэнкIэ лIыгъэшхоу зэрахьагъэм джы къызнэсыгъэм тыгу къегъэкIыжьы тызэкъозыгъэуцорэмрэ нахь лъэш тызышIырэмрэ. Урысыем ис лъэпкъхэм лIэшIэгъубэхэм къакIоцI зэкъошныгъэу азыфагу илъ хъугъэмрэ зэдыряунэм зэрэфэсакъщтыгъэхэмрэ ары ушэтыпIэхэр зэпачын языгъэлъэкIыщтыгъэр, непи щыIэныгъэм къыгъэуцурэ Iофыгъуабэхэм язэшIохынкIэ ахэм яшIогъэшхо къэкIо.
Урысыем исхэм языкIыныгъэрэ язэкъотныгъэрэ зэрэпытэр Хэгъэгу зэошхом ТекIоныгъэр къызыщыдахыгъэр илъэс 75-рэ зыщыхъугъэм анахьэу къэлъэгъуагъ. Советскэ цIыфхэм зэрэцIыфлъэпкъэу фашизмэм зэрэщаухъумагъэр, зэолIхэми, тылым щылэжьагъэхэми лIыгъэшхо зэрэзэрахьагъэр зыкIи тщыгъупшэщтэп.
Тэ гухэлъэу тиIэр Урысыем икIэн бай къэтыухъумэныр, тихэгъэгу нахь псынкIэу хэхъоныгъэ ышIынымкIэ тфэлъэкIыщтыр зэкIэ тшIэныр ары. Псауныгъэ пытэрэ щыIэкIэшIурэ шъуиIэнэу, мамырэу шъупсэунэу, шIум шъущымыкIэнэу сышъуфэлъаIо!
Валентина Матвиенко