ШэкIогъум и 4-р — лъэпкъ зыкIыныгъэм и Маф. Ащ ипэгъокIэу Урысые политическэ партиеу «Единая Россия» зыфиIорэм и Адыгэ шъолъыр къутамэ и Секретарэу КъумпIыл Мурат игукъэкIыкIэ Хэгъэгу зэошхом иветеран 70-мэ гъомылэпхъэ Iалъмэкъхэр афашIыгъэх. Iофтхьабзэу «Мы вместе» зыфиIорэм къыдыхэлъытагъэу ахэр волонтерхэм къырагощэкIыгъэх.

Мыекъопэ къэлэ администрацием пIуныгъэмкIэ ыкIи ныбжьыкIэ политикэмкIэ иотдел ипащэу Пхэнэе Саидэ къызэриIуагъэмкIэ, политическэ партиеу «Единэ Россием» къыгъэ­хьазырыгъэ къэмланхэм пхъэшъхьэ-мышъхьэ ыкIи къое лъэпкъ зэфэшъхьафхэр, псыIэшIухэр арылъых. Ахэр унэгъо шъхьарыкIэу волонтерхэм къырагощэкIыгъэх.

Апэу зэблэгъагъэхэм ащыщ Евдокия Кустовам дэжь. Ыныбжь емылъытыгъэу, илъэс 99-м ит, чанэу ветераныр къытпэ­гъо­кIыгъ, губзыгъэу къэгущы­Iагъ.

— Апэрэ мафэм къыщегъэ­жьагъэу заор аухыфэ сыкъэ­тыгъ, — къеIуатэ Евдокие. — 1941-рэ илъэсым мэкъуогъум и 28-м къухьэ медикэу экспедицие Арктикэм сыкIонэу щытыгъ. Ау мэкъуогъум и 22-м заор къе­жьагъэу къызаIом, джа чэщым Архангельскэ сыкIонэу мэхъу, ащ госпитальхэм якъызэIухын щытыублагъ. Нэужым Мурманск, Ленинград сащыIагъ, уIагъэ зытещагъэхэм сяIазэщтыгъ. Зэо ужым лагъымэхэр къэзыугъой­хэрэм сахэтыгъ.

Евдокия Кустовар 1951-рэ илъэсым Адыгеим къэкIуагъ щыпсэунэу. Ишъхьэгъусэрэ ежьыррэ кIэлэцIыкIуи 4 зэдапIугъ. Джы ахэм къакIэхъу­хьажьыгъэ лъфыгъэхэм, ахэм къапыхъожьыгъэхэм агъэгушIо. Ветераным сэмэркъэоу къы­зэриIуагъэмкIэ, илъэси 100-м нэс къыгъэшIэнэу гущыIэ ытыгъ.

Шъугу къэдгъэкIыжьын, коронавирусыр къызежьагъэм щегъэжьагъэу политическэ партием ишъолъыр къутамэ мыщ фэдэ шIушIэ IэпыIэгъу гъого­гъуищэ зэхищагъ.

Iэшъынэ Сусан.