Коронавирусым пэуцужьырэ медицинэ ыкIи нэмыкI IофышIэхэм апае Адыгеим джыри мылъку тедзэ къыфыхэгъэкIыгъэнэу Урысые Федерацием и Правительствэ унашъо ышIыгъ. А мылъкур Правительствэм иIэпэчIэгъэнэ фонд къыхэкIыщт.

ГущыIэм пае, Адыгеим имедицинэ ыкIи инэмыкI IофышIэхэу коронавирусыр къызэутэлIагъэ­хэм медицинэ IэпыIэгъу языгъэ­гъотыхэрэм сомэ миллион 30 къафыхагъэкIыщт. GOVID-19-р къызэузыхэрэм ыкIи ар къызыпыпкIэнкIэ щынэгъуапIэ итхэм Iоф адэзышIэрэ медицинэ Iофы­шIэхэм сомэ миллион 18,4-рэ фэдиз аратыщт.

Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, хэгъэгум ипащэхэм коронавирусым пэуцужьыгъэным иIофыгъохэм ренэу анаIэ зэратырагъэтырэм къыхэкIэу зэпахырэ узым лъэшэу зызыщиушъомбгъурэ лъэхъаным псауныгъэм икъэухъумэнкIэ Iофхэр шIуагъэ къытэу зэхащэн, медицинэ IофышIэхэм ахъщэ IэпыIэгъу аратын алъэкIы.

«Бжыхьэм коронавирусым ятIонэрэу къытыригъэзэжьын ылъэ­кIынэу экспертхэм алъы­тэ. Адыгейми, хэ­гъэгум инэмыкI шъо­лъырхэми зэпахырэ узым зызэрэщаухъумэщт амалхэр нахь щагъэ- пхъашэх. Iэзэгъу уцхэр, зызэраухъу­мэрэ пкъы­гъохэр, цIыфхэм зыщяIэ­зэщтхэ чIыпIэхэр на­хьыбэнхэм гъунэ лъытэфы. Медикхэм яIофшIэн къы­хэхъуагъ, джыдэдэм ахэм IэпыIэгъу ящыкIэгъэ шъыпкъ. Урысые Федерацием и Правительствэ медицинэ IофышIэхэм джыри ахъщэ IэпыIэгъу тедзэ къафыхэгъэкIыгъэнэу унашъо зэришIыгъэм къыгъэлъагъорэр федеральнэ пащэхэм мы Iофыгъом лъэшэу анаIэ зэрэтырагъэтырэр ары», — хи­гъэунэфыкIыгъ респуб­ликэм и ЛIышъхьэ.

Урысыем и Правительствэ иунашъоу мылъку тедзэ къыхэгъэкIыгъэным ехьылIагъэр заштагъэр Адыгеим ыцIэкIэ Къэралыгъо Думэм идепутатэу Владислав Резник яIэпыIэгъоу Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъаштэр ары.

Адыгэ Республикэм и ЛIышъхьэ ипресс-къулыкъу