Статистикэм къызэригъэлъагъорэмкIэ, коронавирусыр къызэузыхэрэм япчъагъэ хэпшIыкIэу хахъо зэрэхъугъэм медикхэм ямызакъоу, общественностыри егъэгумэкIы. Хъужьыгъэхэм япчъагъи макIэп, арэу щыт нахь мышIэми, пандемиер джыри тымыухыгъэу елъытэ УрысыемкIэ IофшIэным и ЛIыхъужъэу, УФ-м и Общественнэ палатэ хэтэу, Адыгеим, Къэбэртэе-Бэлъкъарым, Къэрэщэе— Щэрджэсым янароднэ тхакIоу МэщбэшIэ Исхьакъ.

— Лъытэныгъэ зыфэсшIырэ сичIыгогъухэр! Уз мэхъаджэу къежьагъэм тызэрэпэуцу­жьыщт закъор тызэкъотмэ ары. Эпидемием тэри тыкъэзыуцухьэхэрэми япсауныгъэ язытет щынэгъончъагъэм иамал­хэр зэрэдгъэцакIэхэрэм ялъытыгъ. Коронавирусым къыз­дихьын ылъэкIыщт тхьамыкIагъохэр, нэбгырэ пэпчъ пшъэ­дэкIыжьэу ыхьырэр зыщыдгъэгъупшэхэ хъущтэп, зэкIэми узыр псынкIэу апэкIэкIырэп. Анахь ыгъэфы­къохэрэр зыныбжь хэкIотагъэ­хэр ыкIи уз гъэтIылъыгъэ зиIэхэр ары. Ау ныбжьыкIэхэми къафэкъинэу бэрэ къыхэкIы, — къыIуагъ народнэ тхакIом.

Джащ фэдэу ащ зэрилъытэрэмкIэ, сакъыныгъэ зэпымыоу тхэлъын, тизэхахьэхэр нахь макIэ тшIынхэ фае.

— Зэпахырэ узэу коронавирусым зызэриушъомбгъурэм пэуцужьыгъэнымкIэ, пандемием къыздихьыгъэ гумэкIыгъохэр дэгъэзыжьыгъэнхэмкIэ, экономикэм IэпыIэгъу фэхъугъэнымкIэ тишъолъыр ипащэхэм Iоф­шIэнышхо зэрахьэ. Тэ, цIыф­хэм, къызэрэтэлъэIухэрэ закъор къызэрыкIо шапхъэхэу типсауныгъэ зыпкъ итыным ыкIи уз бзаджэм тытекIоным фэIорышIэхэрэр дгъэцэкIэнхэр ары, — хигъэунэфыкIыгъ МэщбэшIэ Исхьакъ.

Санитарнэ шапхъэхэр зэрэдгъэцакIэхэрэр дгъэлъэшынхэу, цIыфыбэ зыщызэрэугъоирэ чIыпIэхэм тямыкIолIэнэу, нэгуихъор дгъэфедэнэу, медикхэм цыхьэ афэтшIынэу тигущыIэгъу зыкъышъуфегъазэ. Джа зэпстэур зыдгъэцакIэкIэ, сымаджэхэрэм япчъагъэ нахь макIэ хъущтэу, медицинэ учреждениехэм ыкIи гъэпсэфыгъо зимыIэу Iоф зышIэрэ медикхэм хьылъэу ателъым къыщыкIэщтэу зэлъашIэрэ тхакIом елъы­тэ.

Iэшъынэ Сусан.