«Единэ Россием» волонтер гупчэхэр мыгъат­хэ Урысыем ишъолъыр 85-мэ ащызэхищагъ.

А уахътэм къыкIоцI гуфакIо­хэм медицинэ IофышIэхэм, шъолъырхэм ащыпсэухэрэм зызэраухъумэщт пкъыгъо миллионипшI пчъагъэ, врачхэм гъомылапхъэхэр аIэкIагъэхьагъэх. Сымаджэхэм адэжь зэрыкIощтхэ автомобиль 200-м ехъу сымэджэщхэмрэ поликлиникэ­хэмрэ аратыгъэх. Нахь фэныкъо шъолъырхэм реанимобили 10 аIэкIагъэхьагъ. Стратегическэ инициативэхэмкIэ Агентствэмрэ гъэсэныгъэмкIэ Министерствэмрэ ягъусэу партием Iоф­тхьабзэу «Помоги учиться дома» зыфиIорэр зэхищагъ. Мы Iофтхьабзэм къыдыхэлъытагъэу кIэ­лэцIыкIубэм, гъот макIэ зиIэ унагъохэм арыс кIэлэеджакIо­хэм, кIэлэегъаджэхэм компьютерхэмрэ планшетхэмрэ аратыгъэх. Дмитрий Медведевым игукъэкIыкIэ партием хэтхэм сомэ мииллиард ныкъом ехъоу къаугъоигъэр фэныкъохэм афагощыгъ.

«Единэ Россием» иволонтер гупчэхэм зэпымыоу Iоф ашIэ. ЧIыпIэ къин ифагъэхэм волонтерхэм зафагъэзэныр хабзэ хъугъэ. ГущыIэм пае, «Волонтерская такси» зыфиIорэ Iоф­тхьабзэр Москва щызэрахьэ. Оренбургрэ Великий Новгородрэ ягуфакIохэр ветеранхэмрэ зыныбжь хэкIотагъэхэмрэ афэгумэкIых. Тверьрэ Кемероворэ адэсхэр хьэ гъорыкIохэр зыщаIыгъырэ чIыпIэхэм IэпыIэгъу афэхъух. Хакасиемрэ Хабаровскэрэ ащыпсэухэрэр чъыгхэм ягъэтIысхьанрэ хэкIхэм яугъоинрэ атегъэпсыхьэгъэ Iофтхьабзэхэм ахэлэжьагъэх. ИлъэсыкIэ еджэгъур зырагъэжьэжьыгъэм къыщыублагъэу шъолъырыбэмэ яволонтерхэр кIэлэеджа­кIохэр зэрагъашхэхэрэм лъэплъэх.

«COVID-19-м» джыри зыкъызыщигъэлъэшыгъэ лъэхъаным цIыфыбэ IэпыIэгъум фэныкъу. Пандемием зыкъызишта­гъэм щегъэжьагъэу шъо­лъыр пэпчъ волонтер гупчэхэр къыщызэIуахыгъэх. Ау зэпахырэ узыр уцужьыгъэкIи, IэпыIэгъу зищыкIагъэхэр щыIэщтых. «Единэ Россием» иволонтер гупчэхэм яIоф­шIэн зэпыущтэп», — къыIуагъ Андрей Турчак.

«ГуфакIохэм яныбджэгъухэм, янэIуасэхэм, къа­пэгъунэгъу нэжъ— Iужъхэм ятелефон номерхэр яIэх. Зэкъоуцохэ ахэм ашIоигъу. «Единэ Россием» иволонтерхэм а пшъэрылъыр афэгъэцэкIэшъунэу тэгугъэ», — къыIуагъ партием и Генеральнэ совет икуп итхьамэтэгъоу Ольга Амельченковам.

Ащ зэрилъытэрэмкIэ, волонтерхэр зыщагъэсэнхэ алъэкIыщт чIыпIэхэм язэхэщэн движением ипащэхэр егупшысэнхэ фае. Экологие Iофтхьабзэхэр зэхэзыщэщтхэр, пенсионер шъхьэзакъохэмрэ сэкъатныгъэ зиIэ­хэмрэ IэпыIэгъу афэхъущтхэр, чIыпIэхэм язэтегъэпсыхьанкIэ проектхэм ахэлэжьэщтхэр, тхьа­мыкIагъохэм ялъэхъан цIыфхэр къэзыгъэнэжьыхэрэм ягъусэхэу Iоф зышIэщтхэр ахэм ащагъэсэн алъэкIыщт.

«Тиреспубликэ щыпсэу­хэрэм бэшIагъэ зэгъунэгъушIу зэфыщытыкIэхэр азыфагу зилъыр, — къыIуагъ Урысые общественнэ организациеу «Единэ Россием и НыбжьыкIэ гвардие» и Адыгэ шъолъыр къутамэ ипащэу, партийнэ проектэу «Тинахьыжъхэр» зыфиIорэм икоординаторэу, Мыекъуапэ идепутатэу Бэрзэдж Асыет. — Адрэ кавказ республикэхэм афэдэу, яцIыкIугъом къы­щегъэжьагъэу нахьыжъхэм лъытэныгъэ афашIэу Адыгеим исхэр агъасэх. Волонтерхэм азыныкъо нахьыбэр студентых, кIэлэеджакIох. Ахэм ягъунэгъухэми, зыныбжь хэкIотагъэхэми анаIэ атет, зэрафэлъэкIэу яшIуагъэ арагъэкIы. Гъо­мылапхъэхэмрэ Iэзэгъу уцхэмрэ зэрафахьыхэрэм, пхъэр зэрафакъутэрэм, чэур зэрафагъалэрэм нэмыкIэу, пшъэрылъ нахь къинхэр агъэцэкIэнхэми ахэр фэхьазырых».