Адыгэ Республикэм псауныгъэр къэухъумэгъэнымкIэ и Министерствэ къызэритырэмкIэ, Красногвардейскэ район сымэджэщым «Гериатрия» зыфиIорэ лъэныкъомкIэ чIыпIэ 22-рэ къыщызэIуахынэу агъэнафэ. Красногвардейскэ, Шэуджэн, Кощхьэблэ районхэм ащыщхэу зыныбжь илъэс 60-м ехъугъэмэ медицинэ IэпыIэгъу ащ ащарагъэгъотыщт.

Мыщ къеолIагъэ пэпчъ ипсауныгъэ изытет ауплъэкIущт ыкIи хэушъхьафыкIыгъэ программэ фызэхагъэуцощт. Ащ ишIуагъэкIэ узыр хэужъыныхьанэу игъо имыфэзэ къыхагъэщын ыкIи агъэ­хъужьын амал яIэщт.

Шъугу къэтэгъэкIыжьы, 2019-рэ илъэсым Мыекъопэ къэлэ клиническэ сымэджэщым гериатрическэ къулыкъу щызэхащэгъагъ. Зыныбжь хэкIотэгъэ цIыфхэм гу-лъынтфэ системэм, неврологием ылъэныкъокIэ, нэмыкI узхэр къызэутэкIыгъэхэм ящыIэныгъэ нахьышIу шIыгъэныр, къагъашIэрэм хэгъэхъогъэныр ары ащ иIофшIэн зыфэгъэхьыгъэр.

Лъэпкъ проектэу «Псауныгъ» зыфиIорэм хэт шъолъыр проектэу «Апэрэ медикэ-санитарнэ IэпыIэгъум исистемэ хэхъоныгъэхэр ышIынхэр» зыфиIорэм къыдыхэлъытагъэу паллиативнэ IэпыIэгъур нахьышIоу зэхэщэгъэным фытегъэпсыхьэгъэ ахъщэ тедзэ Мыекъопэ район сымэджэщым къыфатIупщыгъ. Сомэ миллион 1,4-рэ зыосэ тхьабылхэм Iоф языгъэшIэрэ (ИВЛ) аппарат къащэфыным пае ищыкIэгъэ фэIо-фашIэхэр джырэ уахътэ агъэцакIэх. ДэкIызэ паллиативнэ IэпыIэгъур цIыфхэм аIэкIэзыгъэхьащт бригадэхэм ящыкIэгъэщт кислороднэ концентраторхэу сомэ мин 440-рэ зыуасэхэри къызIэкIагъэхьаным ыуж итых. Мыекъопэ районым игупчэ сымэджэщ 2019-рэ илъэсым республикэмкIэ апэрэу мыщ фэдэ къутамэ къыщызэIуахыгъагъ. Сымэджэ хьылъэхэм зыщяIазэхэрэ чIыпIэ 15 ащ иI. Отделением дэкIыгъо паллиативнэ бригадэ хэт, Мыекъуапэрэ Мыекъопэ районымрэ ар алъэIэсы. АР-м псауныгъэр къэухъумэгъэнымкIэ и Министерствэ къызэрэщаIуа­гъэмкIэ, мыщ фэдэ IофшIэным пшъэрылъ шъхьаIэу иIэр мыхъужьын уз зиIэ сымаджэхэм IэпыIэгъу афэхъугъэныр, ахэм агу къыдэщэегъэныр ары.

Абрэдж Сэтэнай.