Чъэпыогъум и 29-м Урысыем ивневедом­ст­вен­нэ ухъумэн икъулыкъушIэ и Мафэ хагъэу­нэфыкIыгъ. Ащ ипэгъокIэу Урысые гвардием вневедомственнэ ухъумэнымкIэ иот­делэу Мыекъуапэ щыIэм ипащэ гущыIэгъу тыфэхъугъ.

Мы къулыкъур хэгъэгу кIоцI IофхэмкIэ Министерствэм зэ­рэхэмытыжьым, ащ зэхъокIыныгъэу къафихьыгъэм, яIофшIэн изэфэхьысыжьхэм афэгъэхьыгъэу упчIэхэр фэдгъэзагъэх.

2016-рэ илъэсым къыщегъэ­жьагъэу вневедомственнэ ухъу­мэным икъулыкъу Лъэпкъ гвар­дием хэт хъугъэ ыкIи Урысыем и Президент занкIэу фэIорышIэ. Ау ащ къикIырэп хэ­гъэгу кIоцI IофхэмкIэ Минис­терствэм зэпхыныгъэрэ зэдэлэжьэныгъэрэ дыримыIэу.

— Тизэдэлэжьэныгъэ нахь лъэш мыхъугъэмэ, къыщыкIа­гъэп, — къеIуатэ Бгъанэ Аскэр. — Джащ фээу шъолъыр гъэцэ­кIэкIо хабзэми зэпхыныгъэ дытиI. Республикэм Iофтхьэбзэ зэфэшъхьафыбэу щызэхащэ­хэрэм цIыфхэм ярэхьатныгъэ къащэтэухъумэ, хэбзэукъоны­гъэ­хэм якъыхэгъэщын тынаIэ тетэгъэты. Ау тиIофшIэнкIэ анахь пшъэрылъ шъхьаIэу тиIэр цIыфхэр ямылъку темыщыны­хьэхэу шэпхъэ лъагэхэм ате­тэу къэдгъэгъунэныр, бзэджэшIа­гъэм тыпэуцужьыныр ары. Унэе мылъку бзэджэшIагъэхэм зэрахахъохэрэм апкъ къикIэу бэмэ зыкъытфагъазэ хъугъэ. Объект 431-рэ, цIыфхэр зыщыпсэухэрэ ыкIи ямылъку зыщагъэтIылъырэ чIыпIэ 1679-рэ мы уахътэм ехъулIэу къэтэгъэ­гъу­нэ. Къэралыгъом ылъэны­къо­­кIэ ахэр ухъумагъэ зэрэ­хъу­хэрэр къагурыIозэ вневедомст­веннэ къулыкъум зыкъыфагъазэ.

ЯIофшIэн шIуагъэ къытыным ыкIи агъэлъэшыным фэшI гупчэ ухъумэным ипультхэм (ПЦО) языкI сеть зыпашIэнэу цIыфхэм ыкIи организациехэм ялIыкIохэм зафагъазэ. 2020-рэ илъэсым имэзи 9 пштэмэ, вневедомственнэ ухъумэнымкIэ отделым иIофышIэхэм пэшIо­рыгъэшъ ыкIи зэхэф Iофтхьэбзи 114-рэ зэрахьагъ, рекламнэ тхьэпэ 1890-рэ агощыгъ, мэкъу­мэщ къулыкъухэм зэIукIэгъу 1890-рэ адашIыгъ. Республикэм ит предприятии 145-мэ зэхэф IофшIэнэу ащызэрахьагъэм ишIуагъэкIэ къагъэгъунэрэ псэуалъэхэм 33-рэ къахэхъуагъ.

Вневедомственнэ ухъумэ­нымкIэ къулыкъум зигугъу къэт­шIыгъэ пIалъэм къыкIоцI Iоф­шIэныбэ ыгъэцэкIагъ. Лъыплъэ­нымкIэ гупчэ пунктым гъогогъу 635-рэ макъэ къырагъэIугъ, ащ епхыгъэ дэкIыгъо 822-рэ ашIыгъ. Административнэ хэ­бзэукъоныгъэ 43-рэ къыхагъэщыгъ, нэбгырэ 62-рэ къаубытыгъ, уголовнэ Iофи 2 къызэ­Iуахыгъ.

— ЫпшъэкIэ къызэрэщысIуа­­гъэу лъэпкъ гвардием идзэ­хэм тахэт зэрэхъугъэм пае об­щест­веннэ рэхьатныгъэр ыкIи щы­нэгъончъагъэр къэтыу­хъумэнхэр щыгъэзыягъэ хъу­гъэп, — хигъэунэфыкIыгъ А. Бгъанэм. — Полицием и Мыекъопэ отдел икъулыкъушIэхэм гъогогъу 53-рэ IэпыIэгъу арагъэгъотыгъ. БзэджэшIагъэ зыщызэрахьэгъэ чIыпIэхэм къащаубытыгъэ нэбгыри 144-рэ къэлэ отделым ратыгъэх, зылъыхъущтыгъэхэ нэбгыри 2 къагъотыгъ. Вне­ведомственнэ ухъумэным иIофышIэхэм тапэкIи общественнэ рэхьатныгъэр къаухъумэщт.

Къыхэбгъэщымэ хъущт, полицием иIофышIэхэм анахьи, Урысые гвардием идзэхэм ясэнэхьат епхыгъэ IофшIэным нахь фитыныгъабэ къазэрэритыгъэр ыкIи япшъэрылъхэр нахь макIэ зэрэхъугъэхэр. ГущыIэм пае, цIыфхэм зафагъэзэ зы­хъукIэ ежь ацIэ, алъэкъуацIэ, IофшIэнэу агъэцакIэрэр арамыIонхэ, удостоверениер арамыгъэлъэгъун фитых.

Джащ фэдэу тигущыIэгъу къыхигъэщыгъэхэм ащыщ кад­рэхэм ягъэхьазырын, хэушъхьафыкIыгъэ амалхэр гъэфедэгъэн­хэм, бзэджашIэхэр къызэраубы­тырэ шIыкIэхэр тэрэзэу къы­хэхыгъэнхэм вневедомственнэ ухъумэн къулыкъум иIофшIэн бэкIэ зэрелъытыгъэр.

IофшIэным шIуагъэ къытэу зэхэщэгъэныр зэлъытыгъэхэм ащыщ гъэхъагъэ зышIыхэрэ къулыкъушIэхэр къыхэгъэщы­гъэнхэр. Мы илъэсым имэзи- бгъу пштэмэ, рэзэныгъэ тхылъ нэбгыри 4-мэ, зым ахъщэ шIу­хьафтын, медаль, щытхъу тхылъ нэбгырищмэ аратыгъэх.

Iэшъынэ Сусан.