Нэбгырэ пэпчъ щыIэныгъэ гъогум сэнэхьат гъэнэфагъэ къыщыхехы. Ау зыхэм ар агу рихьэу агъэцакIэ, адрэхэм фэгъэзагъэхэ зэрэхъу­гъэм къыхэкIыкIэ рылэжьэнхэ фаеу мэхъу.

Непэ нэIуасэ шъузыфэтшIыщт кIалэр зиIофшIэн гухахъо хэзыгъуатэхэрэм ащыщ. Ар Урысые гвардием вневедомственнэ ухъумэнымкIэ иотделэу Мые­къуапэ щыIэм икъулыкъушIэу Хьакурынэ Бислъан. Сэнэхьат ыкIи физическэ ухьазырыны­гъэмкIэ инструкторэу отделым Iоф щешIэ.

Бислъан къуаджэу ХьакIэмзые къыщыхъугъ ыкIи щапIугъ. Гурыт еджапIэр къызеухым, Мыекъопэ къэралыгъо техно­логическэ университетым чIэ­хьагъ. Ар дэгъу дэдэу къыу­хыгъ ыкIи еджэныр аспирантурэм щылъигъэкIотагъ. Зэрэхабзэу, дзэ къулыкъур ыхьыныр хэтрэ кIэлэ ныбжьыкIи ипшъэрылъэу зэрэщытыр къыгурэIоти, Бис­лъан ащ кIуагъэ. Къызегъэзэ­жьым Iоф зэришIэщт упчIэр къэуцугъ.

— Ащ дэжьым сшынахьыжъ вневедомственнэ ухъумэным хэтыгъ, — къеIуатэ сигущыIэгъу, — «угу рихьыщтмэ дэгъуба ащ Iоф щыпшIэмэ» ыIуи сынаIэ тырысигъэдзэнэу хъугъэ. Зы мафи сыкIэгъожьэу къыхэкIыгъэп, IофшIэнэу сызыпылъыр 2012-рэ илъэсым къыщегъэ­жьагъэу сигуапэу сэгъэцакIэ. СиIофшIэн епхыгъэ сэнэхьатми сыфеджэжьыгъ, МВД-м иака­демиеу Волгоград дэтыр къэсыухыжьыгъ.

Шъыпкъэр къэпIон зыхъукIэ, IофшIэн псынкIэп Бислъан ыгъэ­цакIэрэр. Отделым хэт къулыкъушIэхэм тхьамафэм тIо пред­мети 7-кIэ егъэджэгъу сыхьат- хэр афызэхащэх. АхэмкIэ зэ­кIэ­ми Бислъан конспектхэр зэ­хегъэуцох. Вневедомственнэ ухъумэным иIофышIэхэм яфизическэ ухьазырыныгъэ тхьамэфитIу тешIэ къэс хагъахъо, ащ дыхэт кIэрахъокIэ уоныр. Инструкторыр а Iофтхьабзэхэм алъэплъэ.

— ТиIофшIэнкIэ анахь шъхьа­Iэхэм ащыщ къулыкъушIэр иIоф­шIэн зэрэфытегъэпсыхьагъэр илъэсым тIо къыгъэшъыпкъэ­жьыныр, ащкIэ мэхьанэшхо зиIэр физическэ ухьазырыныгъэр ары, — къыIуагъ Хьакурынэ Бислъан. — Ащ ушэтынхэм ащыщ горэмкIэ «2» къызи­хьыкIэ, мэзитIу пIалъэкIэ агъэ­тIысышъ зегъэхьазыры. ИкIэрыкIэу дэгъоу зитыжьыкIэ IофшIэным лъыпедзэжьы, къызыдэмыхъукIэ хагъэкIы.

Бислъан къызэриIуагъэмкIэ, вневедомственнэ ухъумэнымкIэ отделым Iоф щызышIэ­хэрэм япчъагъэ имыкъоу бэрэ къыхэкIырэп. ГущыIэм пае, блэкIыгъэ илъэсым икIэух зы нэбгыр зыщыкIэщтыгъэхэр. Мы уахътэм кIэлэ ныбжьыкIи 6 — 7-мэ дзэ комиссиер акIунэу тхьапэхэр аратыгъэхэу яжэх.

СигущыIэгъу кадрэхэмкIэ IофшIэныр зэригъэцакIэрэм дакIоу, хэгъэгу кIоцI IофхэмкIэ Министерствэм испорт клу­бэу «Динамо» зыфиIорэм хэт. СамбэмкIэ, дзюдомкIэ зэнэ­къокъухэм чанэу ахэлажьэ.

Бислъан унэгъо зэкIужь дахэ иI. Ишъхьэгъусэу Симэрэ ежьыррэ сабыищ зэдапIу. Ана­хьы­жъыр Сэтэнай, ащ къы­кIэлъэкIо Салимэ, анахьыкIэр Сэлмэн.

СигущыIэгъу иунагъо гупсэфыгъорэ псауныгъэрэ илъынхэу, иIофшIэнкIэ лъэгэпIэшIухэм афэкIонэу фэтэIо.

Iэшъынэ Сусан.