Зэнэкъокъум дышъэ медалитф къыщихьыгъ
Мыекъопэ пивэшI заводым 2009-рэ илъэсым къыщегъэжьагъэу псыIэшIухэр къыщыдагъэкIых. Джыдэдэм псыIэшIу лъэпкъих: «Майкопский Лимонад», «Майкопский Тархун», «Майкопский Буратишка», «Майкопский Колокольчик», «Майкопская с ароматом Груша», «Майкопская Крем-сода» зыфиIохэрэр ащ къыщашIы.
Мыекъопэ пивэшI заводым псыIэшIухэр къыдигъэкIхэу зиублэгъагъэр я ХХ-рэ лIэшIэгъум ия 50-рэ илъэсхэм агузэгу ары. Советхэм ялъэхъан цIыфхэм якIэсэгъэ псыIэшIу лъэпкъхэу «Груша», «Лимонад», «Тархун», «Колокольчик», «Буратино» зыфиIохэрэр ащ къыщашIыщтыгъэх. 1994-рэ илъэсым къыщегъэжьагъэу 2008-рэ илъэсым нэс ахэм якъыдэгъэкIын зэпыугъо фэхъугъагъ.
Джыдэдэм заводым советскэ технологием тетэу псыIэшIухэр къыщыдагъэкIых. Ароматизатор дэгъухэмрэ шъоущыгъупс Iужъумрэ ащкIэ къызфагъэфедэх. ПсыIэшIухэр советскэ, урысые ГОСТ-м дештэх.
Минералхэр зыхэлъ къушъхьэпсым шъонхэр нахь гохь къешIы. Кавказ биосфернэ заповедникым ит Лэгъо-Накъэ ипсы къыкIэчъыпIэхэр ащкIэ къызфагъэфедэх. Илъэс миллион заулэкIэ узэкIэIэбэжьмэ мыщ океан итыгъэу, ар зегъукIым минералыпсхэр къытфигъэнагъэу цIыфхэм къаIуатэ. Пивэр пшIапшIэ зыхъукIэ углекислэ газэу аугъоирэр шъонхэр бэшэрэбхэм арагъахъо зыхъукIэ агъэфедэ. Ащ мылъкури кIарегъэугъуае, къэзыуцухьэхэрэ дунаими зэрар рахырэп.
Мыекъопэ пивэшI заводым къыдигъэкIырэ псыIэшIухэр кIэлэцIыкIухэми, нахьыжъхэми агу рехьы. ЩэфакIохэм апае заводым Iофтхьэбзэ зэфэшъхьафхэр: кIэлэцIыкIу мэфэкIхэр, квасымрэ псыIэшIумрэ яфестиваль, зэнэкъокъухэр зэхещэх, шIушIэ Iофтхьабзэхэм ахэлажьэ. Къэлэдэсхэмрэ хьакIэхэмрэ продукциер къызэрэдагъэкIырэ шIыкIэм нэIуасэ зыфашIыным пае экскурсиехэр, пчъэ зэIухыгъэм имафэхэр мыщ щызэхащэх. ЩэфакIохэм яклубэу «Эксперт» зыфиIорэм хахьэхэрэр продукцием идэгъугъэ иуплъэкIункIэ IэпыIэгъу къафэхъух.
Пивэмрэ спирт зыхэмыт шъонхэмрэ яя ХIХ-рэ дунэе зэнэкъокъоу Шъачэ щыкIуагъэм Мыекъопэ пивэшI заводыр хэлэжьагъ. Урысыем ипредприятие зэфэшъхьафхэм япродукцие лъэпкъи 140-рэ ащ къырахьылIэгъагъ. Зэнэкъокъум икIэуххэр зэфахьысыжьыгъэх. Жюрим Мыекъопэ шъонхэм осэшхо къаритыгъ, дышъэ медалитф къафигъэшъошагъ. ПсыIэшIухэу «Майкопский Буратишка», «Майкопская Груша» зыфиIохэрэр анахьэу агу рихьыгъэхэм ащыщых. Мыекъопэ пивэшI заводым къыдигъэкIырэ шъонхэр тиреспубликэ имызакъоу, нэмыкI шъолъырхэми ащызэлъашIэ.