2020-рэ илъэсым Iоныгъом къыщегъэжьагъэу Адыгеим щыщ кIэлэцIыкIу 4485-мэ аужырэ шапхъэмэ адиштэрэ шIэныгъэ тедзэ зэрагъэгъотын амал яIэ хъугъэ. Ащ фытегъэпсыхьэгъэ программэр лъэныкъуихэу зэтеутыгъ: техническэ, естественнэ-научнэ, физкультурнэ-спортивнэ, художественнэ, зекIо-краеведческэ, социальнэ-педагогическэ.

Лъэпкъ проектэу «Гъэсэныгъ» зыфиIорэм къыдыхэлъытэгъэ федеральнэ проектэу «Успех каждого ребенка» зыфиIорэмкIэ кIэлэцIыкIухэм шIэныгъэ тедзэ защарагъэгъотыщт чIыпIэхэм ахэгъэхъогъэным фытегъэпсыхьэгъэ субсидиеу Адыгеим къыIэкIэхьагъэм ишIуагъэкIэ Iофтхьабзэр гъэцэкIагъэ хъугъэ. 2020-рэ илъэсым ар зэшIохыгъэ хъуным фэшI федеральнэ бюджетым сомэ 29685,9-рэ къытIупщыгъ.

КIэлэцIыкIухэм шIэныгъэ тедзэ защарагъэгъотырэ гъэсэныгъэм иорганизациехэм IофшIэнышхо зэшIуахыгъ. Обору­дованиер зэрагъэгъотыгъ, шапхъэхэм адиштэу псэуалъэхэр агъэпсыгъэх, учреж­дениехэм Iоф ащызышIэхэрэмрэ кIэлэегъаджэхэмрэ яшIэныгъэхэм зыщахагъэхъорэ курсхэр акIугъэх.

2021-рэ илъэсми мы Iофтхьабзэр лъагъэкIотэщт. Федеральнэ бюджетым къытIупщыгъэ сомэ 119490,5-рэ ащ пэIуагъэхьащт. Мы мылъкумкIэ чIыпIэ 18601-рэ ашIынэу агъэнафэ.

АР-м гъэсэныгъэмрэ шIэныгъэмрэкIэ и Министерствэ къызэритырэмкIэ, проектыр гъэцэкIагъэ зыхъукIэ, 2024-рэ илъэсым ехъулIэу илъэси 5-м къыщегъэжьагъэу 18-м нэс зыныбжь кIэлэцIыкIухэмрэ ныбжьыкIэхэмрэ япроцент 80-мэ шIэныгъэ тедзэ арагъэгъотыщт.

(Тикорр.).