Зыныбжь хэкIотагъэхэм афагъэцэкIэщт
Лъэпкъ проектэу «Демографием» къыдыхэлъытэгъэ Iофыгъоу «Старшее поколение» зыфиIорэм къыпкъырыкIызэ АР-м IофшIэнымрэ социальнэ хэхъоныгъэмрэкIэ и Министерствэ социальнэ проект зэхигъэуцуагъ. «Санаторий на дому» зыфиIорэ Iофтхьабзэр цIыфхэм социальнэ фэIо-фашIэхэр зыщафагъэцэкIэрэ гупчэхэм шэкIогъум и 1-м къыщегъэжьагъэу зэхащэщт.
Проектым пшъэрылъ шъхьаIэу иIэр нэжъ-Iужъхэм социальнэ-медицинэ IэпыIэгъоу арагъэгъотырэр нахь дэгъу шIыгъэныр, апкъышъол псыхьэгъэныр ары. Нэжъ-Iужъхэу, сэкъатныгъэ зиIэхэу ыкIи зипсихикэ зэщыкъуагъэхэр ары программэр зытегъэпсыхьагъэр.
Джырэ уахътэ Адыгеим Iоф зышIэн амал зиIэ нахьыжъ нэбгырэ мини 114-рэ щэпсэу. Ахэм ащыщэу мини 5-мэ пенсионнэ ныбжь яIэу социальнэ фэIо-фашIэхэр унэм ащафагъэцакIэ. ЦIыфым къыгъэшIагъэм хахъо къэс ипсауныгъэ изытет зэщыкъуагъэ мэхъу, ащ къыхэкIэу мыщ фэдэ фэIо-фашIэхэр ищыкIэгъэ дэдэу щытых.
«Санаторий на дому» зыфиIорэ къулыкъум ишIуагъэкIэ зыныбжь хэкIотагъэхэу, япсауныгъэ изытет ыпкъ къикIэу медицинэм иучреждениехэм якIолIэн амал зимыIэхэм социальнэ-медицинэ ыкIи нэмыкI фэIо-фашIэхэр унэм ащафагъэцэкIэщтых. ШIоигъоныгъэ зиIэхэм социальнэ-правовой ыкIи социальнэ-психологическэ IэпыIэгъу арагъэгъотыщт. Зыныбжь хэкIотагъэ, сэкъатныгъэ зиIэ ыкIи зипсихикэ зэщыкъуагъэ нэбгырэ пэпчъ Комплекснэ гупчэм иIофышIэхэм мэфипшIым телъытэгъэ хэушъхьафыкIыгъэ программэ афызэхагъэуцощт.
АР-м IофшIэнымрэ социальнэ хэхъоныгъэмрэкIэ и Министерствэ къызэриIорэмкIэ, проектыр гъэцэкIагъэ зыхъукIэ, зыныбжь хэкIотагъэхэм ыкIи сэкъатныгъэ зиIэхэм япсауныгъэ агъэпытэщт, апкъышъол псыхьагъэ хъущт.
Абрэдж Сэтэнай.