Телефонхэр ашIуатыгъух

ХэбзэухъумэкIо къулыкъухэм язэфэхьысыжьхэм къызэрагъэлъагъорэмкIэ, урамхэм нахьыбэу ащызэрахьэрэ бзэджэшIагъэхэм ащыщ сотовэ телефонхэр цIыфхэм зэрашIуатыгъухэрэр. Ахэм ауасэ минипшI пчъагъэм кIэхьан ылъэкIыщт.

Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм уголовнэ лъыхъонымкIэ иоперативникхэм республикэм икъэлэ шъхьаIэ щыпсэурэ ыкIи ыпэкIэ хьапсым дэсыгъэ хъулъфыгъэр къау­бытыгъ. ЗэрагъэунэфыгъэмкIэ, мэфэ заулэкIэ узэ­кIэIэбэжьмэ илъэс 48-рэ зыныбжь хъулъфыгъэм имобильнэ телефонитIу ащ ытыгъугъ. Мыр зыщыпсэурэ унэм хэбзэухъумакIохэр зэкIохэм ытыгъугъэ телефонхэр ащ къырагъотагъэх.

Мыекъопэ районым щыпсэурэ илъэс 47-рэ зы­ныбжь хъулъфыгъэм ылъэныкъокIи мыщ фэдэ Iоф къызэ­Iуахыгъ. Полицейскэхэм зэрагъэунэфыгъэмкIэ, са­тыушIыпIэ учреждением чIэтыгъэ икъоджэгъу бзылъфыгъэм исотовэ телефонрэ иахъщэрэ шIуитыгъугъэх.

Мыщ фэдэ бзэджэшIагъэхэр Тэхъутэмыкъое районым щагъэунэфыгъэх.

Урамым шъутет зыхъукIэ, цIыфхэр бэу зыщызэхэхьэрэ чIыпIэхэм, тучанхэм шъуащыIэ зыхъукIэ сакъыныгъэ къызхэжъугъэфэнэу хэбзэухъумакIохэр къышъоджэх. Сыда пIомэ мыщ фэдэ чIыпIэхэр арых нахьыбэрэмкIэ бзэджашIэхэм къызфагъэфедэрэр шъуимылъку атыгъунымкIэ.

Уголовнэ Iоф къызэIуахыгъ

Урысыем хэгъэгу кIоцI IофхэмкIэ и Министерствэ иотделэу «Кощхьабл» зыфиIорэм икъулыкъушIэхэм Iофтхьэбзэ гъэнэфа­гъэхэр рагъэкIокIызэ къэбар къаIэкIэхьагъ Шэуджэн районым щыпсэурэ илъэс 52-рэ зыныбжь хъулъфыгъэм иунэ хэбзэнчъэу наркотикхэр щигъэбылъынхэ ылъэкIыщтэу. ЗауплъэкIум, арэущтэу къычIэкIыгъ.

Хъулъфыгъэм иунэ гъэбылъыпIэ щишIыгъагъ, ащ зэкIоцIыщыхьэгъэ пкъыгъо къыщагъотыгъ. Эксперт-криминалистым зэригъэунэфыгъэмкIэ ар грамм 20 хъурэ кIэп. Уголовнэ Iоф къызэIуахыгъ.

Красногвардейскэ районым ис илъэс 34-рэ зыныбжь хъулъфыгъэм ылъэныкъокIи Iоф къызэIуахыгъ. Ащ иунэ хэбзэнчъэу кIэп грамми 10 щиIыгъыгъэу агъэу­нэфыгъ.

Мы нэбгыритIум илъэси 3-м нэс хьапс къахьын алъэкIыщт.

Iофтхьабзэм иятIонэрэ едзыгъу

Наркотикхэр хэбзэнчъэу къырамы- ­гъэкIокIынхэм фытегъэпсыхьэгъэ Iоф­тхьабзэу «Сообщи, где торгуют смертью!» зыфиIорэм иятIонэрэ едзыгъо чъэпыогъум и 19-м щегъэжьагъэу и 30-м нэс Адыгеим щыкIуагъ.

Наркотикхэр хэбзэнчъэу зыгъэфедэхэрэр, зыщэхэр, къезыгъэкIокIыхэрэр къыхэгъэщыгъэнхэм, ахэм атефэрэ пшъэдэкIыжьыр ягъэхьыгъэным, джащ фэдэу наркотикхэм апыщагъэхэм алъэныкъокIэ пэшIорыгъэшъ Iофтхьабзэхэр регъэкIокIыгъэнхэм, ахэм IэпыIэгъу афэхъугъэным акциер фытегъэпсыхьагъ. Наркотикхэр хэбзэнчъэу зэращэу, агъэфедэу е ащэу шъущыгъуазэмэ, хэбзэухъумакIохэм зафэжъугъэ­зэнэу къышъоджэх. Телефон номерхэр: (8772) 57-17-27, 59-62-48, 59-62-54 е 02 (мобильнэмкIэ — 102).

Хъугъэ-шIагъэм шъурихьылIа­гъэмэ…

2019-рэ илъэсым тыгъэгъазэм и 22-м автомобиль гъогоу «Инэм-Бжъэдыгъухьабл» зыфиIорэм ия 23-рэ километрэ дэжь автомобилитIу щызэутэкIыгъ.

ВАЗ-2114-м кIэрысыгъэ водителыр игъогу текIи, ыпэкIэ къичъэщтыгъэ IэкIыбым къыщыдагъэкIыгъэ машинэм еутэкIыгъ. Мы хъугъэ-шIагъэм ыпкъ къикIыкIэ ВАЗ-м иводительрэ ащ къыдисыгъэ бзылъфыгъэмрэ а чIыпIэм ядунай щахъожьыгъ. ЯтIонэрэ водителым шъобж хьылъэхэр тещагъэхэу сымэджэщым нагъэсыгъ.

Мы хъугъэ-шIагъэм рихьылIагъэхэр IэпыIэгъу къа­фэхъунхэу следствием зафегъазэ. Къэбар горэ шъуIэ­кIэлъымэ МыекъуапэкIэ телефон номерхэу (8772) 59-67-37, 59-64-00-м шъуакъытеон шъулъэкIыщт.

Зэнэкъокъум изэфэхьысыжьхэр

Республикэ обществэу «Динамэм» футбол цIыкIумкIэ зэхищэгъэ зэнэкъокъум изэфэхьысыжьхэр ашIыгъэх. ХэбзэухъумэкIо къулыкъухэм якомандэхэр ащ хэлэ­жьагъэх.

Финалым ихьагъ ыкIи текIоныгъэр къыдихыгъ Росгвардием и ГъэIорышIапIэ вневедомственнэ ухъу­мэнымкIэ икуп. ЯтIонэрэ ыкIи ящэнэрэ чIыпIэхэр къыдахыгъэх хьыкум приставхэмрэ УФ-м хэгъэгу кIоцI IофхэмкIэ и Министерствэ иотделэу Мыекъуапэ щыIэмрэ якомандэхэм.

ХагъэунэфыкIырэ чIыпIэхэр къыдэзыхыгъэхэм дипломхэр, медальхэр, щытхъу тхылъхэр афагъэшъошагъэх.

Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъугъэм спорт зэнэкъокъур фэгъэ­хьыгъагъ.

Сакъыныгъэ къызхэжъугъаф

Республикэм щыпсэухэрэм кушъхьэфа­чъэхэр ашIуатыгъухэу бэрэ къыхэкIы. ЦIыфхэм сакъыныгъэ къызхагъэфэн зэрэфаер хэбзэухъумакIохэм агу къагъэкIыжьы. Ау мыщ фэдэ бзэджэшIагъэхэр джыри макIэхэп.

Чъэпыогъур къызихьагъэм щыублагъэу кушъхьэфачъэхэр ашIуатыгъугъэу хъугъэ-шIэгъитIу агъэунэфыгъ.

Мыекъуапэ щыпсэурэ илъэс 51-рэ зыныбжь хъулъфыгъэм полицейскэхэм закъыфигъэзагъ. Ащ къызэриIотагъэмкIэ, осэшхо зиIэ икушъхьэфачъэ амыгъэу­нэфыгъэ бзэджашIэм ытыгъугъ.

ХэбзэухъумакIохэм зэхащэгъэ оперативнэ-лъыхъун Iофтхьабзэхэм яшIуагъэкIэ мы бзэджэшIагъэр зезыхьагъэр агъэунэфын ыкIи къаубытын алъэкIыгъ. Ар Мыекъуапэ щыщ, илъэс 23-рэ ыныбжь. Кушъхьэфа­чъэр зыем ратыжьыгъ.

НэкIубгъор зыгъэхьазырыгъэр

ТХЬАРКЪОХЪО Адам.