Адыгэ Республикэм и ЛIышъхьэу КъумпIыл Мурат шъолъырым социальнэ-экономикэ хэхъоныгъэ ышIыным иунэе программэ къы­дыхэлъытагъэу Мыекъуапэ щагъэпсыгъэ апэ­­рэ псэуалъэу медицинэ гупчэр зэрэзэ­ты­ра­гъэпсыхьагъэр тыгъуасэ зэригъэлъэгъугъ.

Iофтхьабзэм хэлэжьагъэх АР-м и Премьер-министрэу Геннадий Митрофановыр, рес­публикэм псауныгъэр къэухъу­мэгъэнымкIэ иминистрэу Мэ­рэ­тыкъо Рустем, медицинэ ин­­ститутыр зыхэхьэрэ Мые­къопэ къэралыгъо технологическэ университетым иректорэу Къуижъ Саидэ, псэолъэшI Iоф­шIэнхэр зыгъэцэкIэгъэ фирмэм илIыкIохэр.

ЦIыфхэр нахьыбэу зыщы­псэухэрэ район цIыкIоу Черемушкэм квадратнэ метрэ мини 5,5-м ехъу зэрылъ къатыбэу зэтет псэуалъэр щашIыгъ. Псау­ныгъэр къэухъумэгъэным епхыгъэ организацие заулэ ащ чIэт: медицинэ реабилитациемкIэ Адыгэ республикэ гупчэр, стоматологическэ поликлиникэр (нахьыжъхэм ыкIи кIэлэцIыкIу­хэм афытегъэпсыхьагъэхэр, техническэ лабораториер).

Мы медучреждениехэм Iоф­шIэнымкIи, нэмыкI лъэныкъо­хэмкIи амалэу аIэкIэлъхэм бэ­шIагъэу ахэгъэхъогъэн фэягъ. Ащ къыхэкIыкIэ республикэм ипащэхэм унашъо ашIыгъ псэо­лъакIэхэр ыкIи шэпхъэшIухэм адиштэрэ медооборудование зэрагъэгъотынэу. Ащ сомэ миллион 227,5-рэ пэIуагъэхьагъ.

Адыгеим и ЛIышъхьэ псэуа­лъэр зэрэзэтырагъэпсыхьагъэр зэригъэлъэгъугъ. ЦIыфхэм зэри­фэшъуашэу медицинэ фэIо-фашIэхэр афагъэцэкIэнхэмкIэ амалэу аIэкIэлъ хъугъэхэм къа­тегущыIагъэх медицинэ реа­билитациемкIэ Адыгэ респуб­ликэ гупчэм иврач шъхьаIэу ХьакIэгъогъу Ларисэрэ стомато­логическэ поликлиникэм иврач шъхьаIэу Шэуджэн Вячеславрэ.

Медицинэм игупчэ икабинетхэр аужырэ шапхъэхэм адиштэрэ оборудованиемкIэ зэтегъэ­псы­хьагъэх, IофшIэнымкIэ ищыкIагъэр зэкIэ IэкIэлъ.

Республикэм ипащэ цIыфхэм ыкIи ыпшъэкIэ зигугъу къэтшIыгъэ медицинэ организациехэм ялIыкIохэм гущыIэгъу афэхъугъ. Ахэр КъумпIыл Мурат къыфэ­рэзагъэх. КъызэраIуагъэмкIэ, реабилитационнэ гупчэм зы сменэм кIэлэцIыкIу 40 ыкIи нахьыжъ нэбгыри 120-рэ ыштэнхэ елъэкIы.

КIэлэцIыкIухэм ыкIи нахьыжъхэм ателъытэгъэ стоматологическэ поликлиникэм зы мафэм нэбгырэ 1000 къекIолIэн алъэ­кIыщт, кабинет 45-рэ агъэпсыгъ.

— Адыгеим хэхъоныгъэ ышIыным фытегъэпсыхьэгъэ унэе программэм игъэцэкIэн мы илъэсым тыфежьагъ. Ащ къыдыхэлъытагъэу мы медицинэ гупчэр апэрэ псэуалъэу ттыгъэ. Мыщ ишIуагъэ непэ дэгъоу зэ­хэтшIагъ — шэпхъэшIухэм ади­штэрэ къэралыгъо фэIо-фашIэр тицIыфхэм зэрагъэгъотын амал щыIэ хъугъэ. АщкIэ УФ-м и Президент, Урысыем и Правительствэ, тикураторэу — УФ-м мэкъу-мэщымкIэ и Министерст­вэ инэу тафэраз, — къыIуагъ Адыгеим и ЛIышъхьэ.

КъумпIыл Мурат къызэрэхигъэщыгъэмкIэ, медицинэм иучреждениехэм яматериальнэ-­тех­ническэ зытет нахьышIу шIы­гъэнымкIэ республикэм щы­зэшIуахырэр бэ, а IофшIэныр та­пэкIи лъагъэкIотэщт.

АР-м и ЛIышъхьэ ипресс-къулыкъу