Лэжьыгъэм и Мафэ мыгъэ видеоконференцие шIыкIэм тетэу хагъэу­нэфыкIыгъ. Хыныгъом кIэухэу фэхъугъэхэр мыщ къыщаIуагъэх, пэрыт­ныгъэр зыубытыгъэхэм щафэгушIуагъэх.

Адыгэ Республикэм и ЛIы­шъхьэу КъумпIыл Мурат рес­публикэм имуниципальнэ об­разованиехэм ячIыгулэжьхэм шIуфэс къарихыгъ, лэжьыгъэм и МафэкIэ къафэгушIуагъ.

Джащ фэдэу Iофтхьабзэм хэлэжьагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Адыгэ Республикэм и Премьер-министрэ игуа­дзэу Сапый Вячеслав, Адыгэ Рес­публикэм мэкъу-мэщымкIэ ими­нистрэу Къуанэ Анзаур, му­ниципальнэ образованиехэм япащэхэр.

Лэжьыгъэм иIухыжьын хэлэжьагъэхэу чIыопсым изытет зэрэдэигъэм, коронавирусым ыпкъ къикIыкIэ шэпхъэ гъэнэфагъэхэр зэрагъэуцугъагъэ- хэм ямылъытыгъэу гъэхъагъэхэр зышIыгъэхэм зэрафэразэр Адыге­им и ЛIышъхьэ къыIуагъ.

«Мы илъэсыр къызэрыкIуагъэп. Коронавирусым зыкъы­зыщиштэгъэ лъэхъаным гъэтхэ пхъэн IофшIэнхэр зэрахьагъэх. ЧIыопсым изытет дэигъэ, ау чIыгулэжьхэм а къиныгъохэр зэпачын алъэкIыгъ. Лэжьыгъэм иIухыжьынкIэ ыкIи бжыхьасэхэр игъом пхъыгъэнхэмкIэ тэри IэпыIэгъу зэрэтфэлъэкIэу та­фэхъугъ. Гъэхъэгъэ дэгъухэри тичIыгулэжьхэм ашIыгъэх», — хигъэунэфыкIыгъ КъумпIыл Мурат.

Мыгъэ республикэм лэжьыгъэ тонн мин 729-рэ щаугъои­жьыгъ. ГъэрекIорэм егъэпшагъэ­мэ, ар процент 15-кIэ на­хьыб. Зы гектарым гурытымкIэ центнер 51,4-рэ къырахы­жьыгъ. ГъэрекIорэм егъэпша­гъэмэ, ар центнери 6-кIэ на­хьыб. Къыблэ федеральнэ шъо­лъырхэмкIэ Адыгеим бжы­хьасэхэмкIэ пэ- рытныгъэр ыубы­тыгъ.

Адыгеим и ЛIышъхьэ зэрэхигъэунэфыкIыгъэмкIэ, АПК-мрэ къуаджэхэмрэ хэхъоныгъэ ягъэ­шIыгъэным тегъэпсыхьэгъэ къэ­ралыгъо программэ зэфэшъхьафхэм атетэу бюджет мылъкушхо къыхагъэкIыгъ.

Адыгэ Республикэм мэкъу­-мэщымкIэ и Министерствэ къы­зэритыгъэмкIэ, мэкъу-мэщым хэхъоныгъэ егъэшIыгъэным те­гъэпсыхьэгъэ къэралыгъо программэм диштэу сомэ миллион 578,5-рэ мыгъэ къыха­гъэкIыгъ. 2019-рэ илъэсым егъэпшагъэмэ, ар процент 25-кIэ нахьыб. Къуаджэхэм язэтегъэпсыхьан телъытэгъэ къэралыгъо программэм диштэу мы­гъэ сомэ миллион 917,3-рэ къыхагъэкIыгъ. 2019-рэ илъэсым елъытыгъэмэ, ар фэди 4-кIэ нахьыб.

Адыгэ Республикэм мэкъу­-мэщымкIэ иминистрэу Къуанэ Анзаур чIыгулэжьхэу, мэкъумэщ предприятиехэу, муниципалитетхэу мыгъэ гъэхъагъэ зышIыгъэхэм ацIэ къыриIуагъ. Лэжьыгъэ бэгъуагъэ къызэра-­ хьыжьыгъэм фэшI Шэуджэн, Мыекъопэ районхэм Адыгэ Республикэм и ЛIышъхьэ идип­ломрэ ахъщэ шIухьафтынэу сомэ мини 100 зырызрэ аратыгъ.

Лэжьыгъэм иугъоижьынкIэ атекIуагъэхэм: Шэуджэн районымкIэ механизаторэу Василий Заволодько, Джэджэ районымкIэ трактористэу Иван Поповым, Тэхъутэмыкъое районымкIэ механизаторэу Андрей Лукониным, Красногвардейскэ районымкIэ механи­за­торэу Андрей Ляховым, Мые­къопэ районымкIэ тракторист­-машинистэу Андрей Янковым, Кощхьэблэ районымкIэ меха­низаторэу Мышъхъожь Валерэ, Теуцожь районымкIэ механи­заторэу Блэгъожъ Юныс, къалэу МыекъуапэкIэ механизаторэу Андрей Большаковым шIухьафтынхэмрэ Адыгэ Рес­публикэм и ЛIышъхьэ идипломрэ афагъэшъошагъэх.

ХъызмэтшIэпIи 4-мэ япащэ­хэм Адыгэ Республикэм и Къэралыгъо Совет — Хасэм и Щытхъу тхылъ аратыгъ. Мэ­къумэщ предприятии 10-мэ яIофышIэхэм Адыгэ Респуб­ликэм иминистрэхэм я Кабинет идипломрэ ахъщэ шIухьафтынхэмрэ афагъэшъошагъэх. ЧIыгулэжь пэрыт заулэмэ щытхъуцIэу «Адыгэ Республикэм мэкъу-мэщымкIэ изаслуженнэ IофышI» зыфиIорэр афагъэ­шъошагъ.

Адыгэ Республикэм и ЛIы­шъхьэ мэкъу-мэщым лэжьыгъэ къыщызыхьыжьыхэрэм тхьа­шъуегъэпсэу ариIуагъ гъот макIэ зиIэхэм IэпыIэгъу зэрафэ­хъугъэхэм, пандемием илъэ-хъан шIушIэн Iофтхьабзэхэм зэрахэлэжьагъэхэм афэшI. Къум­пIыл Мурат чIыгулэжьхэм афэлъэIуагъ тапэкIи яIофхэр дэгъоу зэпыфэнхэу, пхъэнэу рагъэжьагъэмкIи гъэхъагъэхэр ашIынхэу.

Зэхэсыгъом икIэух муниципальнэ образование пэпчъ хы­ныгъом щатекIуагъэхэр щагъэшIуагъэх.

Адыгэ Республикэм и ЛIышъхьэ ипресс-къулыкъу