ПэIудзыгъэ шIыкIэм тетэу яIофшIэн лъагъэкIуатэ
АР-м и Къэралыгъо Совет — Хасэм я LV-рэ зэхэсыгъо мы тхьамафэм иIагъ. Аужырэ мазэхэм хабзэ зэрэхъугъэу, видеоконференцие шIыкIэм тетэу ар кIуагъэ.
Зэхэсыгъом АР-м иминистрэхэм я Кабинет хэтхэр, федеральнэ ыкIи республикэ къулыкъухэм, ведомствэхэм япащэхэр хэлэжьагъэх. Парламентым и Тхьаматэу Владимир Нарожнэм Iофтхьабзэр зэрищагъ.
Пстэумэ апэу Бэшкэкъо Заур АР-м и УплъэкIокIо-лъытэкIо палатэ ипащэ игуадзэу, Къушъхьэ Раситэ ащ иаудиторэу гъэнэфэгъэнхэм тегущыIэхи, дырагъэштагъ. Нэужым Ф. Н. УдыкIакомрэ Е. М Курбановамрэ АР-м и Очыл палатэ иквалификационнэ комиссие хэгъэхьэгъэнхэу зэдаштагъ.
Республикэм ипащэ кIэщакIо фэхъугъэу, Адыгеим и Конституцие депутатхэм зэхъокIыныгъэхэр фашIыгъэх. АР-м и ЛIышъхьэ ихэдзынхэм язэхэ-щэн, чIыпIэ зыгъэIорышIэжьыпIэхэм яIофшIэн, медицинэм иIофхэм, унагъом, ныгъом, тыгъом ыкIи кIэлэцIыкIугъом якъэухъумэн, республикэм ихьыкум системэ, нэмыкIхэм ахэр афэгъэхьыгъэх.
БлэкIыгъэ 2019-рэ илъэсым ибюджет гъэцэкIагъэ зэрэхъугъэми къыфагъэзэжьыгъ. ХахъохэмкIэ сомэ миллиард 24-рэ миллион 282,8-рэ, хъарджхэмкIэ сомэ миллиард 24-рэ миллион 595,3-рэ ар хъущтыгъэ.
Джащ фэдэу муниципальнэ образованиехэм япащэхэм, чIыпIэ депутатхэм, Къэралыгъо Советым — Хасэм идепутатхэм яхэдзынхэм, къэралыгъо мылъкур приватизацие шIыгъэнымкIэ пэшIорыгъэшъ планым, мэфэкI ыкIи шIэжь мафэхэм, социальнэ псэупIэхэм ятын, хэушъхьафыкIыгъэ цIыф купхэм IэпыIэгъу ягъэгъотыгъэным, никотин зыхэлъ продукциер зыныбжь имыкъугъэхэм IуагъэкIын фимытхэу шIыгъэным, республикэм иныбжьыкIэхэм къэралыгъо IэпыIэгъу ягъэгъотыгъэным, нэмыкIхэм афэгъэхьыгъэ хэбзэгъэуцугъэхэм зэхъокIыныгъэхэр афэшIыгъэнхэм афэгъэхьыгъэ законопроектхэм, законхэм атегущыIагъэх, апэрэ ыкIи ятIонэрэ еджэгъухэмкIэ аштагъэх.
Ахэм анэмыкIэу УФ-м и Правительствэ и Тхьаматэ игуадзэу Татьяна Голиковам фэгъэзэгъэ джэпсалъэу агъэхьазырыгъэм зэдытегущыIэхи, дырагъэштагъ. ФэгъэкIотэнхэр зиIэхэм Iэзэгъу уцхэр аIэкIэгъэхьэгъэнхэм пае республикэм ахъщэ IэпыIэгъу къыфэтIупщыгъэным ар фэгъэхьыгъ.
НэмыкI субъектхэм яхэбзэихъухьэ къулыкъухэр кIэщакIо зыфэхъугъэхэми Адыгеим и Парламент идепутатхэр ахэплъагъэх, зыдырагъэштагъи, зыдырамыгъэштагъи къахэкIыгъ.
ХЪУТ Нэфсэт.