Зэпахырэ узэу «коронавирус COVID-19» зыфиIорэм икъэбар зэ­рэ­дунаеу щызэлъашIагъ, а гумэкIыгъом зэлъиубытыгъэх. Ар зылъы­мы­Iэсыгъэ къэралыгъо щыIэп пIоми ухэукъощтэп.

Къызэузырэ цIыфхэм япчъагъэ мафэ къэс зэхъокIыныгъэ гъэнэфагъэхэр фэхъух: зэм хэхъо, етIанэ хэкIы, нэбгы­рабэхэми ядунай ахъожьы. Зэ­хъокIыныгъэхэр къэбар жъугъэм иамалхэм зэпымыоу къа­рэхьэ.

Илъэс хъущт ащ зебэныхэрэр. Экспертхэм кIымафэм къызэраIощтыгъэмкIэ, фабэр къызысыкIэ коронавирусыр кIодыжьынэу арыгъэ. Ау ылъэ нахь пытэу ар темыуцуагъэмэ, къыкIичыгъ пфэIощтэп. Адыгеим коронавирусым изыщиушъом­бгъун ижъотыпIэ дэд. Чэщ-зымафэм коронавирусыр нэбгырэ 70-м ехъумэ къяузы. Псауныгъэр къэухъумэгъэнымкIэ Дунэе организацием цIыфхэм за­фегъазэ профилактикэм епхыгъэ Iоф­тхьабзэхэр шIокI имыIэу агъэцэкIэнхэу. Джа зыр ары пандемиер къызэтезгъэуцон зы­­лъэкIыщтыр.

Анахь шъхьаIэу жъугъэцэкIэщтыр

ШъуIэхэмкIэ шъунэгу шъукIэмыIэбэжь! ШIэныгъэлэжьхэм къызэралъытагъэмкIэ, непэ зы сыхьатым къыкIоцI гурытымкIэ гъогогъу 25-рэ цIыфыр ынэгу нэсы. Ащ дакIоу, а IэхэмкIэ пкъыгъо зэфэшъхьафхэу ви­русыр зытелъын ылъэкIыщтхэм атеIабэ.

Бэрэ шъуIэхэр шъутхьакIых. COVID-19-р профилактикэ шIыгъэнымкIэ джа амалыр ары непэкIэ анахьэу шIуагъэ къэ­зытырэр. НэгъэупIэпIэгъу 40 — 60-м къыкIоцI сабынкIэ Iэр птхьакIын фае. Общественнэ чIыпIэм щыIэ краныр жъугъэфедагъэмэ, зэгъэфедэгъу тхы­лъыпIэкIэ ар ежъугъэтыжь. Са­бын пытэр шъумыгъэфедэмэ нахь тэрэз, ащ организмэ цIыкIухэр къытенэнхэ елъэкIы.

Антисептикхэр жъугъэфедэх. Ахэр къэшъущэфынхэ зыхъукIэ язэхэлъыкIэ шъунаIэ тешъудз. Этанолыр — процент 80-м, глицериныр — процент 1,45-м ыкIи «перекись водорода» ­зыфиIорэр — процент 0,125-м фэдизэу хэлъынхэ фае.

Шъукъэпсы ыкIи шъупскэ зыхъукIэ пэр ыкIи жэр тхы­лъыпIэ IэплъэкIыкIэ шъуубытынхэ фае, ар щымыIэмэ Iэнтэгъу къэуфапIэр жъугъэфедэ. Iэплъэ­кIыжъыеу жъугъэфедэгъахэр зэу хэкIидзыпIэм ишъудзэжь. Нэбгы­рабэхэр къэпсыхэ зыхъукIэ аIэгу агъэфедэу тэлъэгъу, ар санитарнэ шапхъэхэм адиштэ­рэп. Сыда пIомэ IэгушъокIэ пкъыгъохэм татеIабэшъ, вирусыр къатедгъэнэн ылъэкIыщт.

Маскэхэр жъугъэфедэх! Сымаджэм ыкIи ащ къыпекIокIырэм нэгуихъор аIулъынэу щыт. Ар пытэу нэгум кIэлъын ыкIи сыхьати 2 — 3-м къыкIоцI зэ­блъэпхъузэ пшIын фае. Благъэу цIыфхэм шъуакIэрымыхь. IаплI яшъумыщэкI, сэлам IэкIэ зэ­шъу­мых. Амал иIэмэ унэм уисы­мэ нахь тэрэз.

Жьы къабзэм мэхьанэшхо иI. Унэ кIоцIым бэрэ жьы къабзэ ибгъэхьаныр дэгъу. Ащ вирусыр нахь макIэ ешIы.

Iэшъынэ Сусанн.