«Единэ Россием» и Генеральнэ совет исекретарэу Андрей Турчак Премьер-министрэу Михаил Мишустиным зэIукIэгъоу дыриIагъэм мы аужырэ мазэхэм министерствэхэм ягъусэу партиер бюджетым ипроект зэрэдэлэжьагъэр щыхигъэунэфыкIыгъ.

«Бюджетыр зэпэщэчыгъэу, социальнэ Iофтхьабзэхэм афытегъэпсыхьагъэу тэлъытэ. Пшъэ­рылъ шъхьаIэу тиIэр цIыфхэм тафэгумэкIыныр, ахэм ящы­Iэ- кIэ-псэукIэ зыкъедгъэIэтыныр ары. Къалэхэр нахь зэтегъэ­псы­хьэгъэнхэмкIэ, апэрэ чэзыоу къуаджэхэм адэт поликлиникэхэр джырэ уахътэм диштэу гъэпсыжьыгъэнхэмкIэ, культу­рэмрэ спортымрэ япсэуалъэхэр ахэм ащышIыгъэнхэмкIэ «Единэ Россием» ипрограммэхэмрэ ипроектхэмрэ къадырагъэштагъэх. АщкIэ тхьашъуегъэ­псэу ятIо тшIоигъу», — хигъэу­нэфыкIыгъ Андрей Турчак.

КультурэмкIэ къоджэ унэхэм яшIынрэ ягъэцэкIэжьынрэ апаекIэ джыри мылъку тедзэ къэтIупщыгъэн зэрэфаеми игугъу ащ къышIыгъ. Джащ фэдэу цIыфхэм япсауныгъэ зыщагъэпытэщт, физкультурэм зыщыпылъыщтхэ комплекс шъхьэи­хыгъэхэу шъолъырхэм ащагъэ­псыщтхэм бюджет мылъкушхо къафэтIупщыгъэн фае.

«Единэ Россием» ифракциеу Къэралыгъо Думэм щыIэм ипащэ игуадзэу Андрей Исаевым къызэриIуагъэмкIэ, сабый ибэхэм унэ къафэгъотыгъэнымкIэ ищыкIэгъэ мылъкур бюджетым къыщыдэлъытагъ.

«Социальнэ Iофыгъо шъхьа­Iэхэр бюджетым ипроект къыщыдэлъытагъэх. КIэлэцIыкIу ибэ­хэм унэ ягъэгъотыгъэныр шъолъырхэмкIэ Iофыгъошхоу щыт. Правительствэм иIэпэчIэгъэнэ фонд щыщ мылъку къызэрэхэжъугъэкIыгъэмкIэ лъэшэу тышъуфэраз», — къыIуагъ Андрей Исаевым.

Парламентариехэм зэIукIэ­гъум зэрэщыхагъэунэфыкIы­гъэмкIэ, Iэзэгъу уцхэм яIэкIэгъэхьанкIэ хъарджэу ашIыщтхэм къащыкIэщтэп, илъэсищым къы­кIоцI ахэм нахь къахэхъощт. Социальнэ пшъэрылъхэм ягъэцэкIэн тегъэпсыхьэгъэ мылъкур икъоу бюджетым къыщыдэ­лъытагъ. Бюджетым епхыгъэу Iоф зышIэхэрэм ялэжьапкIэ, кIэлэцIыкIухэм ахъщэ IэпыIэгъоу аратырэм, ублэпIэ еджапIэхэм ачIэсхэр зэрагъэшхэщтхэм, гурыт еджапIэхэм чIыпIакIэхэр къащызэIухыгъэнхэм ар апэIуагъэхьащт.

«2021-рэ илъэсымкIэ бюджетым ипроект тетэу триллион 1,3-рэ хъурэ бюджет трансфертхэр шъолъырхэм атырагоща-гъэх. ЯтIонэрэ хэплъэгъум джыри триллион 1,5-м ехъу атырагощэнэу щыт. Зафэу ахэр шъолъырхэм атырагощэнхэ, зы­фытегъэпсыхьэгъэ гухэлъхэмкIэ агъэфедэнхэ фае. Ти­фракциехэу шъолъырхэм ащы­Iэхэри, тидепутатхэри ащ чанэу хэлэжьэщтых», — къыIуагъ Андрей Исаевым.

Патриотическэ пIуныгъэм пэ­Iухьащт мылъку бюджетым къыщыдалъытэнэу партием хэт­хэм игъо алъэгъугъ. Урысыем и Президент кIэщакIо зэрэфэ­хъугъэм тетэу гурыт, апшъэрэ еджапIэхэм патриотическэ пIу­ныгъэм щапылъынхэм тегъэ­псыхьэгъэ законыр гъэмафэм аштагъ.

Михаил Мишустиным «Единэ Россием» хэтхэм зэдэлэжьэ­ныгъэ дэгъу къазэрадыряIэм, Правительствэри, Къэралыгъо Думэри непэ зыгъэгумэкIырэ Iофыгъуабэмэ партиер зэра­тегущыIагъэм афэшI тхьашъуегъэпсэу ариIуагъ.

«Республикэ бюджетым изэ­хэгъэуцонкIэ Адыгеим Iофышхо щашIэ, цIыфхэу фэныкъохэм IэпыIэгъу ягъэгъотыгъэнымкIэ социальнэ пшъэрылъэу яIэхэр дэх имыIэу гъэцэкIэгъэн­хэр ащ къыщыдэлъытагъ, — къыIуагъ партием и Адыгэ шъо­лъыр къутамэ исекретарь игуадзэу, шъолъыр гъэцэкIэкIо комитетым ипащэу, Мыекъуапэ идепутатэу АфэшIэгъо Рэ­мэзан. — Псауныгъэм икъэу­хъумэн мэхьанэшхо зиIэ лъэны­къохэм ащыщ. Ащ лъэшэу анаIэ тырагъэты. ТапэкIэ медицинэм хэхъоныгъэ егъэшIыгъэным, мы отраслэм иинфраструктурэ зегъэушъомбгъугъэным иамалхэр зехьэгъэнхэ фае. ЦIыфхэм япсауныгъэ зыщагъэпытэщт физкультурэ комплексыкIэхэм яшIын пае бюджет мылъку джыри къыхэгъэкIыгъэн фаеу «Единэ Россием» зэрилъытэрэм детэгъаштэ. Спортым тиреспуб­ликэ мэхьанэшхо щыраты: щы­IэкIэ-псэукIэ тэрэз зэрылъ шъо­лъырхэм Адыгеир ахэхьэ. Республикэм ит къоджэ еджапIэхэм яспортзалхэр агъэцэ­кIэжьых, спорт инфраструктурэр агъэпсы. Къоджэдэсхэми, зипсауныгъэ пыч фэхъугъэхэми спортым пылъынхэу амал яI».

Шъугу къэтэгъэкIыжьы партием ипащэхэр чъэпыогъум и 12-м вице-премьерхэм зэраIу­кIэгъагъэхэр, бюджетым ихъардж­хэм азыщанэр зыпэ­Iухьан фэе социальнэ Iофы­гъохэм мылъкоу къафатIупщыщтым зэрэтегущыIагъэхэр. Пар­тийнэ проектхэр шъолъыр­хэм ащыпхыращыхэ зэхъум «Единэ Россием» предложе-ниеу къыхьыгъэхэр ащ лъапсэ фэхъугъэх. Къоджэдэсхэм ящы­IэкIэ-псэукIэ зыкъегъэIэтыгъэныр, къэлэ шапхъэхэм ар алъы­кIэгъэхьэгъэныр ащ къыщы­дэлъытагъ. ГущыIэм пае, со­циальнэ псэуалъэхэм яшIын сомэ миллиард 20-м ехъу пэ­Iухьащт. Шъолъырхэм язэтегъэ­псыхьан пае бюджетым сомэ миллиард 34,65-рэ къыщыдэ­лъытагъ. Ащ нэмыкIэу шъолъыр заулэмэ общественнэ транспортым игъэкIэжьынкIэ субсидиехэр къаратыщтых. Нэбгыри 100-м нахь макIэ зыдэс псэу­пIэхэм мобильнэ медицинэ гупчэхэр афызэхащэщтых.