Гриппым пэуцужьырэ вакцинэм ихэлъхьан епхыгъэ Iофтхьабзэр джы­ри республикэм щэкIо. Сыда пIомэ коронавирусым ыгъэсы­ма­джэхэрэм япчъагъэ хэхъо ыкIи а узитIур зэхэхьаным ищынагъо къэуцугъ. Арышъ, цIыфхэр нахь зы­фэсакъыжьынхэу, гриппым пэу­цужьырэ вакцинэр зыхарагъэлъхьанэу медицинэм иIофы­шIэ­хэр къяджэх.

ИкIыгъэ тхьамафэм гриппым пэуцужьырэ вакцинэм иятIонэрэ Iахь Адыгеим къэсыгъ. Чъэ­пыогъур къызихьагъэм къы­щегъэжьагъэу вакцинэ мини 188,4-рэ республикэм къыIэ­кIэхьагъ. Ащ щыщэу мин 47-р — кIэлэцIыкIухэм апай. Вак­цинацием пае агъэфедэхэрэр Урысыем къыщашIыгъэ препаратхэу «Совигрипп» ыкIи «Флю-М» зыфиIохэрэр ары.

Адыгэ Республикэм псау­ныгъэр къэухъумэгъэнымкIэ и Ми­нистерствэ къызэритыгъэмкIэ, чъэпыогъум и 15-м ехъулIэу нэбгырэ мини 106,2-м ехъурэр Iофтхьабзэм хэлэжьагъэх (вакцинэр зыхалъхьанэу агъэнэ­фагъэм ипроцент 37-рэ). Къэ­блэгъэрэ уахътэм вакцинэхэм яящэнэрэ къэкIогъу ежэх. Ащ ишIуагъэкIэ блэкIыгъэ илъэсым егъэпшагъэмэ, прививкэр зыхалъхьагъэхэм япчъагъэ процент 20-кIэ нахьыбэ ашIыщт. ЗэрагъэнафэрэмкIэ, шэкIогъум и 1-м нэс республикэм щы­псэурэ нэбгырэ мин 280-рэ фэ­дизмэ гриппым пэуцужьырэ вакцинэр ахалъхьащт.

Вакцинацие Iофтхьабзэр рес­публикэм щылъагъэкIотэным фэшI хэушъхьафыкIыгъэ ме­ди­цинэ бригадэхэр районхэм ащы­зэхащагъэх. КъэлэдэсхэмкIэ нахь Iэрыфэгъуным фэшI поликлиникэхэм ачIэт кабинетхэм ямызакъоу, культурэм и Унэу «Гигантым» прививкэр ащыхалъхьанэу чIыпIэ къыщызэ­Iуахыгъ. Хабзэ зэрэхъугъэу, блэ­кIыгъэ шэмбэтым шIоигъоныгъэ зиIэ пстэуми вакцинэр зыхарагъэлъхьан амал яIагъ, ащ такъикъи 10 нахьыбэ ыхьырэп. А мафэм нэбгырэ 50 къяо­лIагъ.

Мэхьанэ зиIэр — эпидемиер къемыжьэзэ прививкэр зыхябгъэлъхьаныр ары. Ащ цIыфыр къыухъумэнэу зыригъажьэрэр тхьамэфитIу зытешIэкIэ ары ыкIи илъэс псаум екъу. ШэкIогъум и 1-м нэс вакцинациер кIощт. ШIоигъоныгъэ зиIэ пстэури рагъэблагъэх!

Iэшъынэ Сусанн.