ПэIудзыгъэ шIыкIэм тетэу

Мы мафэхэм, джыри корона­вирусым ищынагъо зыщыIэ уахътэм, цIыфхэр, анахьэу нэжъ-Iужъхэр, общественнэ чIыпIэхэм нахь макIэу ащыIэнхэм фэшI, къэралыгъо фэIо-фашIэ­хэр электроннэ шIыкIэм тетэу къызIэкIагъэхьанхэр бэкIэ нахьышIу.

ПенсиехэмкIэ фондым иинтернет нэкIубгъо «унэе кабинетэу» щыбгъэпсыгъэр ащкIэ IэпыIэгъу къыпфэхъущт. Пенсионерхэм ямызакъоу, пенсиер е нэмыкI социальнэ ахъщэ тын зыгъэпсыхэрэм, фондым ичIыпIэ органэу зэпхыгъэм тхылъ горэ къыгъэхьазырынэу зищыкIагъэхэм, IофшIапIэм Iутэу икоэффициентхэр, пенсиеу зэIукIагъэр зыфэдизхэр зэзгъашIэмэ зышIоигъохэм, ны мылъкум исертификат къызэратыгъэхэм электроннэ шIыкIэр агъэфедэн амал яI.

«Унэе кабинетымкIэ» ахъщэ тынэу къыптефэрэр бгъэпсын, пенсиер е социальнэ фэIо-фашIэхэр къызэрэпIэкIагъэхьащт шIыкIэр зэблэпхъун плъэ­кIыщт. Пенсионерым, сэкъатныгъэ зиIэ кIэлэцIыкIум е ицIыкIугъом къыщегъэжьагъэу сэкъатныгъэ зиIэм алъыплъэ­хэрэм ахъщэ тынэу къафакIорэри щагъэпсынэу амал яI.

Ежь цIыфым ышъхьэкIэ лъэIу тхылъыр электроннэ шIыкIэм тетэу ымытышъугъэми, цыхьэ зыфишIэу законым тетэу ыгъэнэфагъэм фигъэпсын ылъэкIыщт. Ахъщэ тынхэу фагъэпсыгъэм е нэмыкIэу ПенсиехэмкIэ фондым ипшъэрылъхэм ахахьэхэрэм алъэныкъокIэ упчIэ зиIэм, онлайн-приемнэмкIэ ар ыгъэхьын фит.

Адыгеим щыпсэоу мыщ нахь игъэкIотыгъэу зыщызгъэгъуазэмэ зышIоигъохэр УФ-м ПенсиехэмкIэ ифонд и Къутамэу АР-м щыIэм «илиние плъыр» ителефонхэм ащыщ къытеонхэ алъэкIыщт. Мары ахэр: 8(8772) 53-88-57, 8(8772) 21-01-86.

ПенсиехэмкIэ фондым иотделениехэм «ялиние плъырхэм» ятелефонхэр:

1. Къалэу МыекъуапэкIэ ГъэIорышIапIэм: +7(8772) 21-03-61, 21-03-57, 21-03-75 2. АдыгэкъалэкIэ фондым иотдел: +7(87772) 9-18-96, 9-14-75 3. Джэджэ районымкIэ ГъэIорышIапIэм: +7(87779) 9-15-47 4. Кощхьэблэ районымкIэ ГъэIорышIапIэм +7(87770) 9-10-76, 9-13-73 5. Красногвардейскэ районымкIэ ГъэIорышIапIэм: +7(87778) 5-30-14 6. Мыекъопэ районымкIэ ГъэIорышIапIэм: +7(87771) 2-14-76, 2-13-12 7. Тэхъутэмыкъое районымкIэ ГъэIорышIапIэм +7(87771) 96-9-06, 8(938)431-08-63 8. Теуцожь районымкIэ ГъэIорышIапIэм: +7(87772) 9-75-13, 9-76-20 9. Шэуджэн районымкIэ ГъэIорышIапIэм: +7(87773) 9-24-97, 9-26-57.

ЗыгорэкIэ ПенсиехэмкIэ фондым ичIыпIэ отделениеу шъузэпхыгъэм шъуемыкIуалIэмэ мыхъущтмэ, чэзыум шъуемыжэным пае, пэшIорыгъэшъэу зяжъугъэтхымэ нахьышIу. Уахътэу шъузщыкIощтыр шъузщыфаем зэблэшъухъужьын шъулъэкIыщт.

Илъэсым ыкIэм нэс

Пенсионерхэмрэ социальнэ ахъщэ тын къызфакIохэрэмрэ банкым икартэу «Мир» зыфиIорэм техьажьынхэу чъэпыогъум и 1-м нэс пIалъэу яIагъ. Джы ар илъэсэу тызыхэтым итыгъэгъэзэ мазэ и 31-м нэс афылъагъэкIотагъ.

Мыщ фэзгъэзэжьын фаехэр ахъщэ тыныр нэмыкI картэхэмкIэ, гущыIэм пае, VISA, MasterCard зыфэпIощтхэмкIэ, къыз­IэкIахьэщтыгъэхэр ары. Сберкнижкэ иIэу ащ къихьэщтыгъэмэ е поч­тэмкIэ къыфакIощтыгъэмэ, зэхъокIыныгъэ зыпари фэхъурэп, къы­фэкIощт.

ЦIыфым картэр зэблихъугъэу, счетэу къызэрыхьащтыри нэмыкI хъугъэмэ, ар ПенсиехэмкIэ фондым IэкIигъэхьан фае. Ащ пае «унэе кабинетыр» ыгъэ­федэн ылъэкIыщт, почтэмкIэ ыгъэхьыми е МФЦ-м, фондым ичIыпIэ органэу зыпэблагъэм якIуалIэми хъущт. Счетыр зэмыхъокIыгъэмэ, картэу «Мир-м» зэрэтехьажьыгъэм щигъэгъозэнхэу ищыкIагъэп.

Чъэпыогъум и 31-м нэс

ЦIыфым IофшIэгъэ илъэсэу иIэр зыщыгъэнэфэгъэ тхылъыр (трудовая книжка) электроннэ шIыкIэм тетэу гъэпсыгъэщтмэ, хьауми зытетым тетэу къэнэжьыщтмэ ежь къыхихын фит. IофшIэпIэ чIыпIэхэр къэ­зы­­тыхэрэм яIофшIапIэхэм аIут­хэр ащ щагъэгъозэнхэу япшъэрылъ. Хэбзэгъэуцугъэм къызэ­рэщыдэлъытагъэмкIэ, ар агъэцэкIэным пае мэфэ заул ныIэп пIалъэу къафэнагъэр. «Трудовой книжкэр» зыфэдэщтыр теубытагъэ хэлъэу къагъэ­нэфэнэу зэрытхэгъэ тхылъхэр чъэпыогъум и 31-р имыкIызэ аIэкIагъэхьанхэ фае.

Электроннэ шIыкIэр егъэзыгъэу щытэп, шъхьадж зэрэшIоигъу. Адыгеим щыпсэоу нэбгырэ 31733-мэ зыфаер къыхахыгъах. Адрэхэм мы илъэсым итыгъэгъазэ и 31-м шIомыкIэу къыхахын фае. ЗыгорэкIэ ащ нэс цIыфыр ушъхьагъу гъэнэфагъэ иIэу IофшIапIэм мыкIощтыгъэмэ, къыгъэнэфэнэу амал имыIагъэмэ, зыщыхъурэм къыхихыми хъущт.

IофшIапIэм апэрэу Iухьэхэрэм IофшIэгъэ илъэсэу яIэр зыщыгъэнэфэгъэщт тхылъыр электроннэ шIыкIэу афагъэ­псыщт, джы непэ зытетым фэдэ афашIыжьыщтэп.

IофшIэгъэ илъэсхэр зыфэдизхэр, нэмыкIэу ащ епхыгъэу цIыфым ищыкIагъэр ПенсиехэмкIэ фондым иинтернет нэкIубгъо щыгъэпсыгъэ «унэе кабинетым» е къэралыгъо фэIо-фашIэхэм япортал щызэригъэшIэнхэ ылъэкIыщт. «Трудовой книжкэр» тхьапэм тетымэ, IофшIапIэр къезытыгъэм екIолIэн фае, ПенсиехэмкIэ фондым е МФЦ-м зафигъазэми хъущт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.