Къулыкъу зэфэшъхьафхэм ялIыкIохэр зыхэ­хьэгъэхэ IофшIэкIо куп мыекъопэ бэ­дзэр­­хэм мы мафэхэм къащекIокIы — сани­тар­нээпи­демиологие шапхъэхэр зэра­щагъэцакIэхэ­рэр еуплъэкIу.

Роспотребнадзорым къыгъэ­нэфэгъэ шапхъэхэр амыукъоным лъыплъэхэрэр хэбзэухъу­мэкIо къулыкъухэмрэ Адыгеим икъэлэ шъхьаIэ иадминист­рациерэ яIофышIэхэр арых.

ЩакIохэмрэ щэфакIохэмрэ нэгуихъохэр, Iалъэхэр зэрагъэфедэхэрэр, дезинфекцие чIыпIэхэм зэращашIырэр зылъыплъэхэрэм ащыщых.

ШIокI имыIэу зэрахьан фаехэр мыщ фэдэх: щакIо ыкIи щэфакIо пэпчъ маскэхэмрэ Iа­лъэхэмрэ яIэнхэ, ахэр агъэфедэнхэ фае; IофышIэ къэкIогъэ щакIохэм апкъышъол иплъы­рыгъэ ауплъэкIунэу щыт; узыр зыгъэкIодыхэрэр аIэкIэ­лъынхэ, щапIэхэр, агъэфедэрэ пкъыгъохэр зэратхьакIыщтхэр

ыкIи зэраухъумэщтхэр икъоу яIэнхэ фае. ЩэфакIохэм язэпэчыжьагъэ зыфэдизынэу щытым, маскэхэмрэ Iалъэхэмрэ агъэфедэнхэ зэрэфаем афэгъэ­хьыгъэ къэбарыр нэпэеплъэу алъагъэIэсыныр шапхъэхэм къы­дыхалъытэ. Ахэр зымыгъэцакIэхэу цIыфхэм ящыIэныгъэрэ япсауныгъэрэ щынэгъо чIыпIэ изыгъэуцохэу къыхагъэщыхэрэм алъэныкъокIэ протоколхэр зэхагъэуцох, нэужым ахэр хьыкумым агъэхьых.

Джащ фэдэу бэдзэрхэм ямызакъоу, уплъэкIокIо купхэр гъэ­сэныгъэм иучреждениехэм, цIыфхэр жъугъэу зыщагъашхэ­хэрэм, хьакIэщхэм, щэкIо гуп­чэхэмрэ тучанхэмрэ ащэIэх, общественнэ транспортымрэ таксимрэ шапхъэхэр зэраща­гъэцакIэхэрэри ауплъэкIу. БэмышIэу мыщ фэдэ чIыпIэхэр ащауплъэкIугъэх псэупIэу Ханскэмрэ къутырэу Гавердовскэмрэ. Анахьэу анаIэ зыты­рагъэтыгъэхэр Ханскэм идэхьа­гъурэ игупчэрэ — Мые­къуапэрэ Шытхьалэрэ къарыкIыхэрэр мебельнэ ыкIи шхын па­вильонхэм жъугъэу якIуалIэх.

Гавердовскэм общественнэ транспортыр ары щауплъэкIу­гъэр.

Къэлэ оперативнэ штабым пстэуми агу къегъэкIыжьы общественнэ чIыпIэхэр, транспортыр нэгуихъо зыIумылъхэм ыкIи Iалъэ зыпымылъхэм арагъэгъэ­федэ зэрэмыхъущтыр.

Джащ фэдэу кальяныр чъэпыогъум и 21-м къыщыублагъэу агъэфедэ хъущтэп нэмыкI унашъо щыIэ охъуфэкIэ.

Пандемиер къызежьагъэм къыщыублагъэу Мыекъуапэ чIыпIэ мини 6 фэдиз щауплъэ­кIугъ, административнэ пшъэ­дэкIыжь ягъэхьыгъэным тегъэ­псыхьэгъэ протокол 70-рэ зэха­гъэуцуагъ ыкIи хьыкумыр ахэплъэнэу агъэхьыгъ.

Сурэтхэр Н. Гусевам тырихыгъэх.