Адыгеим и ЛIышъхьэу КъумпIыл Муратрэ Адыгэ Республикэм идзэ комиссарэу Александр Аверинымрэ тыгъуасэ зызэIокIэхэм бжыхьэ дзэ дэщыгъор зэрэзэхащэщтым, ныбжьыкIэхэр зыщаугъоирэ чIыпIэхэм коронавирусым закъыщимыштэным, дзэм къулыкъу щызыхьыщтхэм ме­дицинэ уплъэкIунхэр арагъэкIунхэ, COVID-19-р къяутэлIагъэмэ зэ­гъэшIэгъэнымкIэ тестхэр аIыхыгъэнхэ зэрэфаем ыкIи нэмыкI Iофы­гъохэм атегущыIагъэх.

Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженецрэ Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рус­темрэ зэIукIэгъум хэлэжьагъэх.

КоронавирусымкIэ респуб­ликэм Iофхэр зэрэщыхьылъа­гъэхэм емылъытыгъэу гъатхэм ныбжьыкIэхэр дзэ къулыкъум щэгъэнхэмкIэ Iофтхьабзэхэр икъоу зэрэзэрахьагъэхэр, зэпахырэ узым зыкъызэригъэ­лъэ­шыгъэм епхыгъэу бжыхьэ дзэ дэщыгъом илъэхъани яшъып­къэу Iоф зэрашIэн фаер КъумпIыл Мурат хигъэунэфыкIыгъ.

«Анахь шъхьаIэр цIыфхэм япсауныгъэ къэухъумэгъэныр ары. Ащ дакIоу тишъолъыркIэ шапхъэу агъэуцугъэхэр дгъэцэ­кIэнхэмкIэ тфэлъэкIыщтыр зэ­кIэ тшIэн фае. Зэпахырэ узым зы­къызэригъэлъэшыгъэм елъытыгъэу министерствэхэм, ведом­ствэхэм, муниципальнэ обра­зованиехэм яадминистрациехэм зэдэлэжьэныгъэу зэдыряIэр нахь агъэпытэн фае», — къыIуагъ КъумпIыл Мурат.

Адыгэ Республикэм идзэ комиссар зэIукIэгъум зэрэщыхигъэунэфыкIыгъэмкIэ, гъатхэм ныбжьыкIэ 490-рэ дзэ къулыкъум ащэгъагъ. Бжыхьэ дзэ дэщыгъо лъэхъаным респуб­ликэм щыщ нэбгырэ 510-р УIэшыгъэ КIуачIэхэм ащэнхэу рахъухьэ. Урысые Федерацием и УIэшыгъэ КIуачIэхэм я Генеральнэ штаб ипащэрэ ЮВО-м идзэхэм япащэрэ унашъо зэрашIыгъэм тетэу Адыгэ Республикэм идзэ комиссариат санитарнэ шъолъыр ща­гъэпсыгъ. Зызэраухъумэрэ пкъы­гъохэм яIэпэчIэгъанэ мыщ щызэрагъэуIугъ. ДОСААФ-м ишъолъыр къутамэ игъусэу дзэ къулыкъум ащэхэрэр къызэращэлIэрэ чIыпIэм чIэтын фэе нэбгырэ пчъагъэр къыда­лъытэ. КIэлэеджакIохэм апае дзэ къулыкъум ащэрэм и Мафэ дистанционнэ шIыкIэм тетэу ОБЖ-мкIэ урокхэм ащызэхащэнэу рахъухьэ.

Адыгэ Республикэм и ЛIы­шъхьэу КъумпIыл Мурат псауныгъэр къэухъумэгъэнымкIэ министрэм ынаIэ тырыригъэ­дзагъ дзэ къулыкъум ащэщтхэм медицинэ уплъэкIунхэр зэрарагъэкIухэрэм, врачхэм документациер зэрагъэхьазырырэм лъэшэу гъунэ алъифын, дзэм ащэщтхэм COVID-19-р къяутэлIагъэмэ зэгъэшIэгъэнымкIэ тестхэр зэраIахыхэрэмкIэ район, къэлэ сымэджэщхэм яврач шъхьаIэхэм пшъэдэкIыжьэу ахьырэр ыгъэлъэшын зэрэфаем. Муниципальнэ образованиехэм япащэхэм пшъэрылъ афашIыгъ ныбжьыкIэхэр дзэ къулыкъум щэгъэнхэмкIэ Iофтхьабзэу зэрахьащтхэм гъунэ лъафынэу, зэпахырэ узымкIэ республикэм иIофхэм язытет хъугъэр мыщкIэ къыдалъытэнэу.

Адыгэ Республикэм и ЛIышъхьэ ипресс-къулыкъу