Урысые агропромышленнэ къэгъэлъэгъонэу «Дышъэ бжыхь» зыфи­Iо­рэм иIофшIэн программэ чанэу зыкъыщигъэлъэгъуагъ Адыгэ Рес­публикэм мэкъу-мэщымкIэ и Министерствэ.

2020-рэ илъэсым чъэпыогъум и 7-м къыщегъэжьагъэу и 9-м нэс ведомствэм пшъэдэкIыжь зыхьырэ икъулыкъушIэхэр къэгъэлъэгъоным иIофтхьэбзэ 27-мэ ахэлэжьагъэх. Фермерскэ движением хэхъоныгъэ ышIыным, АПК-м ипродукцие Iэ­кIыбым щыIугъэкIыгъэным, мэ­къумэщ страхованием, нэ­мыкIхэм япхыгъэ Iофыгъохэм защатегущыIэгъэхэ форумхэр, зэдэгущыIэгъухэр, Iэнэ хъураехэр рагъэкIокIыгъэх.

Хабзэ зэрэхъугъэу къыдэ­гъэкIыжьын промышленностым иIофышIэ ыкIи аграрий анахь дэгъухэр къэгъэлъэгъоным къы­щыхагъэщыгъэх, джащ фэдэу Урысыем мэкъу-мэщымкIэ и Министерствэ зэхищэгъэ зэнэ­къокъухэм зэфэхьысыжьхэр афа­шIыгъэх. ТекIоныгъэр къыдэзыхыгъэхэм Адыгеим илIыкIохэри ахэтых.

Зэнэкъокъум изэхэщэн фэгъэзэгъэ комиссием унашъоу ышIыгъэмкIэ лъэныкъоу «Ез­гъэжьэгъэкIэ фермер анахь дэ­гъу» зыфиIорэм дышъэ медаль къыщихьыгъ Красно­гвар­дейскэ районым Iоф щызышIэрэ мэкъумэщ-фермер хъыз­мэтшIапIэу Галина Дурневар зипащэм. Шэуджэн районым щыщ Елбэшэ Аслъан зипэщэ хъызмэтшIапIэм тыжьыныр ­къыфагъэшъошагъ. 2017-рэ илъэсым мыщ грант къыратыгъагъ былымышъхьэ ыкIи мэкъумэщ техникэ къыщэфынымкIэ. Лъэныкъоу «Лучшая се­мей­ная животноводческая фер­ма» зыфиIорэм тыжьын медалыр къыщихьыгъ Шэуджэн районым илIыкIоу ХьакIэмыз Руслъан зипэщэ хъызмэтшIапIэм. 2016-рэ илъэсым мыщи грант къыфагъэшъошэгъагъ.

— СичIыпIэгъухэм сафэгушIо, тапэкIи гъэхъэгъэшIухэр ашIынхэу сафэлъаIо, — къыщитхыгъ Адыгеим и ЛIышъхьэу КъумпIыл Мурат иинстаграм нэкIубгъо.