Метрэ 75-рэ зикIыхьэгъэ георгиевскэ кусэ­хэр, Урысыемрэ Адыгеимрэ ябыракъхэр зы­­Iыгъыгъэ мотопарапланеристхэм шэмбэтым Мыекъуапэ къызэлъабыбыхьагъ.

Мыекъуапэ иадминистрацие ипресс-къулыкъу къызэриты­гъэмкIэ, Iофтхьабзэу «Уашъом дэплъый» зыфиIорэм къыды­хэлъытагъэу, ТекIоныгъэм ия 75-рэ илъэсрэ цIыфхэм язы­кIыныгъэ и Мафэрэ яхъулIэу ар зэхащагъ.

Iофтхьабзэр зырагъэжьагъэр мы илъэсым имэкъуогъу ары. А уахътэм къыкIоцI проектэу «Перелет-2020» зыфиIорэм хэ­лажьэхэрэм Петербург къы­щырагъажьи Владивосток нэсынхэ, километрэ мини 10 хъу­рэ гъогууанэ зэпачын алъэ­кIыгъ. МотопарапланымкIэ дунэе рекордыкIэ агъэуцугъ: ыпэ­рэм фэди 10-кIэ шъхьадэкIы­гъэх.

«Загъорэ пщагъом тыхэтэу, ошъуапщэхэм ашъхьагъкIэ тыбыбын, автомобиль гъогум ты­тебыбыкIын, хьацIэ-пIацIэхэм защытыухъумэн, хыое жьыбгъэ­шхом тыпхырыкIын, чIыпIэ зэ­жъу тызефэм тыкъетIысэхын фаеу хъугъэ», — къыIуагъ проектым ипащэу, дунаимрэ Ев­ропэмрэ ячемпионэу, спортымкIэ мастерэу дунэе класс зиIэ Игорь Потапкиным.

Джащ фэдэу Iофтхьабзэм хэлэжьагъэх Мыекъуапэ ипарапланернэ клубэу «Полет» зыфиIорэм хэтхэу Василий Рожковскэр, Андрей Пташник, Василиса Карпухинар, Виталий Решитняк.

Мотопарапланеристхэр Мые­къуапэ имикрорайонэу Михайловэм щыдэбыбаехи, къалэм ипчэгухэм ашъхьэрыбыбыкIы­гъэх, республикэ шыкъэгъэчъа­пIэм къыщетIысэхыжьыгъэх.

Iофтхьабзэм изэхэщэнкIэ Адыгэ Республикэм и ЛIышъхьэ и Администрацие, муници­пальнэ образованиеу «Къалэу Мыекъуапэ» иадминистрацие, республикэм и Общественнэ палатэ, Урыс географическэ обществэм и Адыгэ шъолъыр къутамэ IэпыIэгъу къафэхъугъэх.